ଭୁବନେଶ୍ୱର/ମହାକାଳପଡ଼ା,୨୦ା୮: ରାଜ୍ୟର ଅନୁଦାନରୁ ବଞ୍ଚିତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀମାନଙ୍କୁ ନେଇ ଭୁବନେଶ୍ୱର ସ୍ଥିତ ଆର୍ଯ୍ୟ ମନ୍ଦିରଠାରେ ଏକ ଗୁରୁତ୍ୱପୂର୍ଣ୍ଣ ସମନ୍ୱୟ ସମିତି ବୈଠକ ଅନୁଷ୍ଠିତ ହୋଇଯାଇଛି। ୩୦/୧୧/୨୦୧୩ ପୂର୍ବରୁ ବିଭିନ୍ନ ୪୮୮, ୬୬୨, ଅଣ-ଅନୁଦାନପ୍ରାପ୍ତ, +୨ ଓ +୩ ମହାବିଦ୍ୟାଳୟ ଏବଂ ସଂସ୍କୃତ ଅନୁଷ୍ଠାନଗୁଡ଼ିକରେ ପରିଚାଳନା କମିଟି ଦ୍ୱାରା ନିଯୁକ୍ତି ପାଇଥିବା କର୍ମଚାରୀମାନେ ଏହି ବୈଠକରେ ଏକତ୍ରିତ ହୋଇଥିଲେ।
ସମାବେଶରେ ଉପସ୍ଥିତ କର୍ମକର୍ତ୍ତାମାନେ କ୍ଷୋଭ ପ୍ରକାଶ କରି କହିଛନ୍ତି ଯେ, ଦୀର୍ଘ ୧୮ ବର୍ଷ ଧରି ମହାବିଦ୍ୟାଳୟଗୁଡ଼ିକରେ ନିରବଚ୍ଛିନ୍ନ ଭାବେ ଶିକ୍ଷାଦାନ ଓ ଅନ୍ୟାନ୍ୟ କାର୍ଯ୍ୟ କରିଆସୁଥିଲେ ସୁଦ୍ଧା ସରକାର ଏପର୍ଯ୍ୟନ୍ତ ସେମାନଙ୍କ ପାଇଁ କୌଣସି ଅନୁଦାନ ନୀତି (Grant-in-Aid Policy) ଘୋଷଣା କରିନାହାନ୍ତି। ନୂତନ ସରକାର କେବଳ ପ୍ରତିଶ୍ରୁତି ଦେଇ ସେମାନଙ୍କୁ ପ୍ରତାରିତ କରୁଥିବା ଅଭିଯୋଗ ହୋଇଛି।
ସରକାରଙ୍କ ଉପରେ ଚାପ ସୃଷ୍ଟି କରି ଅନୁଦାନ ନୀତି ତୁରନ୍ତ ଘୋଷଣା କରାଇବା ପାଇଁ ୦୧/୦୬/୨୦୦୮ ରୁ ୩୦/୧୧/୨୦୧୩ ମଧ୍ୟରେ ଗଠିତ ବିଭିନ୍ନ ସଂଗଠନକୁ ଏକତ୍ରିତ କରାଯାଇଛି। ଆବାହକ ସନ୍ତୋଷ ରାୟଙ୍କ ନେତୃତ୍ୱରେ ଅନୁଷ୍ଠିତ ଏହି ସମନ୍ୱୟ ସମିତି ବୈଠକରେ ରାଜ୍ୟର ବିଭିନ୍ନ ଜିଲ୍ଲାରୁ କର୍ମକର୍ତ୍ତା ଯୋଗଦେଇଥିଲେ।
