ଭୁବନେଶ୍ୱର, ୩୧ା୫(ସ୍ପୋଟର୍ସ ବ୍ୟୁରୋ): ଉତ୍ତର ପ୍ରଦେଶରେ ଚାଲିଥିବା ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସର ୬ଷ୍ଠ ଦିବସରେ କିଟ୍ ୟୁନିଭର୍ସିଟିର ପ୍ରତିଯୋଗୀମାନେ ୪ ସ୍ବର୍ଣ୍ଣ ପଦକ ହାସଲ କରିବା ସହ ଆଥଲେଟିକ୍ସ ଇଭେଣ୍ଟରେ ଦୁଇଟି ମିଟ୍ ରେକର୍ଡ କରିଛି। ପ୍ରଜ୍ଞା ପ୍ରଶାନ୍ତି ସାହୁ ମହିଳା ୧୦୦ମିଟର ହର୍ଡଲ୍ସ (୧୩.୬୩ ସେକେଣ୍ଡ)ରେ ଏବଂ ବିକ୍ରାନ୍ତ ମଲିକ ପୁରୁଷ ଜାଭେଲିନ୍ ଥ୍ରୋ (୮୦,୦୦ ମିଟର)ରେ ମିଟ୍ ରେକର୍ଡ କରିଛନ୍ତି। ସୁସ୍ମିତା ଟିଗା ମହିଳା ୩,୦୦୦ ମିଟର ଷ୍ଟିପଲଚେଜ୍ (୧୦:୪୨.୪୩ ସେକେଣ୍ଡ) ଓ ଅଜୟ କୁମାର ପୁରୁଷ ହାମର ଥ୍ରୋ (୫୮.୨୭ ମିଟର)ରେ ସ୍ବର୍ଣ୍ଣ ପଦକ ଲାଭ କରିଛନ୍ତି। ପୁରୁଷ ୫୫କେଜି ଭାରୋତ୍ତୋଳନରେ କୁଭେଶ୍ୱର ମଲିକ ମୋଟ ୨୧୨ କେଜି ଓଜନ (୯୬ ସ୍ନାଚ୍ ଓ ୧୧୬କେଜି କ୍ଲିନ ଆଣ୍ଡ୍ ଜର୍କ) ଏକ ରୌପ୍ୟ ପଦକ ଲାଭ କରିଛନ୍ତି। ଅନ୍ୟପକ୍ଷରେ ମଙ୍ଗଳବାର ଅନୁଷ୍ଠିତ ପୁରୁଷ ଟେବୁଲ ଟେନିସ ବ୍ରୋଞ୍ଜ ପଦକ ମ୍ୟାଚରେ କିଟ୍ ୧:୨ ଗେମ୍ସରେ ଗୁଜରାଟ ୟୁନିଭର୍ସିଟିଠାରୁ ହାରିଯାଇଛି।
ସମ୍ବଲପୁର ୟୁନିଭର୍ସିଟିକୁ ୨ ପଦକ
ସମ୍ବଲପୁର ୟୁନିଭର୍ସିଟି ଦୁଇ ପଦକ ସହ ଏହାର ଖାତା ଖୋଲିଛି। ମହିଳା ଲଙ୍ଗଜମ୍ପ ଇଭେଣ୍ଟରେ ମନୀଷା ମେରେଲ ସ୍ବର୍ଣ୍ଣ ପଦକ ଜିତିଥିବା ବେଳେ ସ୍ବାଧୀନ କୁମାର ମାଝି ପୁରୁଷ ହାଇ ଜମ୍ପ ଇଭେଣ୍ଟରେ ଏକ ରୌପ୍ୟ ଜିତିଛନ୍ତି। ସମ୍ବଲପୁର ପୁରୁଷ ହକି ଦଳ ବ୍ରୋଞ୍ଜ ପଦକ ମ୍ୟାଚରେ ପୂର୍ବାଞ୍ଚଳ ୟୁନିଭର୍ସିଟିକୁ ଭେଟିବ। ଖେଲୋ ୟୁନିଭର୍ସିଟି ଗେମ୍ସର ତୃତୀୟ ସଂସ୍କରଣରେ ଭାଗ ନେବା ଲାଗି ଓଡ଼ିଶାର ୩ ୟୁନିଭର୍ସିଟି ଯଥା କିଟ୍, ଉତ୍କଳ ଓ ସମ୍ବଲପୁର ଯୋଗ୍ୟତା ଅର୍ଜନ କରିଛନ୍ତି। ମଙ୍ଗଳବାର ସୁଦ୍ଧା ସେମାନେ ମୋଟ ୧୭ ପଦକ ( ୮ ସ୍ବର୍ଣ୍ଣ, ୮ ରୌପ୍ୟ ଓ ଗୋଟିଏ ବ୍ରୋଞ୍ଜ ପଦକ ହାସଲ କରିସାରିଛନ୍ତି।
