ନୂଆଦିଲ୍ଲୀ,୧୮।୧୦: ୧୯୮୩ ବିଶ୍ୱକପ୍ ବିଜେତା ଟିମ୍ର ସଦସ୍ୟ ଥିବା ରୋଜର ବିନ୍ନି ଏବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ନୂତନ ଅଧ୍ୟକ୍ଷ। ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲିଙ୍କ ସ୍ଥାନ ନେବେ ସେ। ମଙ୍ଗଳବାର ବିସିସିଆଇର ବାର୍ଷିକ ସାଧାରଣ ବୈଠକରେ ଏହି ନିଷ୍ପତ୍ତି ନିଆଯାଇଛି। ତେବେ ବିନ୍ନି ବିସିସିଆଇର ୩୬ତମ ଅଧ୍ୟକ୍ଷ ହୋଇଛନ୍ତି। ଆସନ୍ତୁ ଜାଣିବା ତାଙ୍କ ବିଷୟରେ କିଛି ସ୍ବତନ୍ତ୍ର କଥା:-
୮୩ ବିଶ୍ୱକପ୍ରେ ନେଇଥିଲେ ସବୁଠାରୁ ଅଧିକ ଉଇକେଟ:
ବିନ୍ନି ନିଜ ସମୟରେ ମିଡିୟମ ପେସ୍ ବୋଲର୍ ଥିଲେ। ସେ ଦେଶ ପାଇଁ ୧୯୮୩ ବିଶ୍ୱକପ୍ରେ ପ୍ରତିନିଧିତ୍ୱ କରିଥିଲେ। ସେତେବେଳେ ବିଶ୍ୱକପ୍ରେ ସେ ମୋଟ ୮ ମ୍ୟାଚ୍ ଖେଳି ସର୍ବାଧିକ ୧୮ ଉଇକେଟ ନେଇଥିଲେ।
ପ୍ରକୃତିକୁ ଭଲପାଉଥିବା ମଣିଷ ହେଉଛନ୍ତି ବିନ୍ନି:
ସ୍କୁଲ ଦିନରେ ମାଛ ଧରିବାଠାରୁ ଆରମ୍ଭ କରି ଆହତ କୁକୁରଙ୍କ ସେବା, ଗୋଲ୍ଫ ଖେଳିବା, ପ୍ରକୃତିକୁ ପ୍ରେମ ଏବଂ ଖାଲି ସମୟରେ ବାନ୍ଦିପୁରସ୍ଥିତ ନିଜ କ୍ଷେତରେ ସମୟ ବିତାଇବା ଆଦି ବିନ୍ନିଙ୍କୁ ବହୁତ ପସନ୍ଦ। ବିଶେଷକରି କୁକୁରଙ୍କୁ ସେ ବହୁତ ଭଲ ପାଆନ୍ତି।
ଭାରତରେ ଜନ୍ମ ହୋଇଥିବା ଆଙ୍ଗ୍ଲୋ-ଇଣ୍ଡିଆନ୍ ବିନ୍ନି:
ରୋଜର ବିନ୍ନିଙ୍କ ପୁରା ନାମ ରୋଜର ମାଇକେଲ ହମ୍ଫ୍ରି ବିନ୍ନି। ତାଙ୍କର ବଂଶଜ ସ୍କଟ୍ଲ୍ୟାଣ୍ଡରୁ ଭାରତ ଆସିଥିଲେ। ତାଙ୍କର ଜନ୍ମ ଭାରତରେ ହୋଇଥିଲା। ବାଙ୍ଗାଲୋରରେ ରହୁଥିବା ଆଙ୍ଗ୍ଲୋ-ଇଣ୍ଡିଆନ୍ ବିନ୍ନି ଅନେକ ପଦ ଅଳଙ୍କୃତ କରିଛନ୍ତି। ସେ ଜଣେ ଅଲରାଉଣ୍ଡର ହେବା ସହ ଭଲ ବୋଲର୍ ମଧ୍ୟ ଥିଲେ। କର୍ନାଟକ ଷ୍ଟେଟ୍ କ୍ରିକେଟ ଆସୋସିଏଶନରେ ସେ ଅଧିକାରୀ, କୋଚ୍ ଏବଂ ଜାତୀୟ ଚୟନକର୍ତ୍ତା ମଧ୍ୟ ଥିଲେ।
ପୁଅ ଷ୍ଟୁଆର୍ଟଙ୍କ ସିଲେକ୍ସନକୁ ନେଇ ବିବାଦକୁ ଆସିଥିଲେ ବିନ୍ନି:
ବିନ୍ନି ୩ ବର୍ଷ ଯାଏ ବିସିସିଆଇର ଚୟନକର୍ତ୍ତା ମଧ୍ୟ ଥିଲେ। ତାଙ୍କ କାର୍ଯ୍ୟକାଳ ସମୟରେ ପୁଅ ଷ୍ଟୁଆର୍ଟ ବିନ୍ନିଙ୍କ ଚୟନକୁ ନେଇ ମଧ୍ୟ ବିବାଦ ଦେଖାଦେଇଥିଲା। ସେତେବେଳେ ସେ କହିଥିଲେ ଯେ, ଯେତେବେଳେ ତାଙ୍କ ପୁଅର ନାମ ସିଲେକ୍ସନରେ ଆସିଥିଲା, ସେତେବେଳେ ସେ ମିଟିଂରୁ ବାହାରକୁ ଚାଲିଯାଇଥିଲା। ଏପରିକି ବିନ୍ନି ଯେତେଦିନ ଯାଏ ଚୟନକର୍ତ୍ତା ଥିଲେ ତାଙ୍କ ପୁଅଙ୍କ କ୍ରିକେଟ କ୍ୟାରିୟର ଚାଲିଥିଲା ବୋଲି କୁହାଯାଏ।
ବିନ୍ନିଙ୍କ ଅନ୍ତର୍ଜାତୀୟ ରେକର୍ଡ:
ବିନ୍ନି ୧୯୭୯-୮୭ ସମୟରେ ଭାରତ ଲାଗି ୨୭ ଯେଷ୍ଟ ଏବଂ ୭୨ ଦିନିକିଆ ଅନ୍ତର୍ଜାତୀୟ ମ୍ୟାଚ୍ରେ ଭାଗ ନେଇଥିଲେ। ସେ ୧୯୭୯ରେ ପାକିସ୍ତାନ ବିପକ୍ଷରେ ବାଙ୍ଗାଲୋର ଟେଷ୍ଟରୁ ନିଜର ଡେବ୍ୟୁ କରିଥିଲେ। ଟେଷ୍ଟ କ୍ୟାରିୟରରେ ସେ ୪୭ ଉଇକେଟ ନେଇଥିବା ବେଳେ ଦିନିକିଆରେ ୭୭ ଉଇକେଟ ନେଇଥିଲେ। ଅଲରାଉଣ୍ଡର ଭାବେ ମଧ୍ୟ ସେ ଟେଷ୍ଟରେ ୮୩୦ ଏବଂ ଦିନିକିଆରେ ୬୨୯ ରନ୍ କରିଥିଲେ।
