ନୂଆଦିଲ୍ଲୀ,୭।୧୨ : ଏମସିଡି ନିର୍ବାଚନର ଭୋଟ ଗଣନା ଜାରି ରହିଛି। ବର୍ତ୍ତମାନ ପର୍ଯ୍ୟନ୍ତ ୨୫୦ ଆସନ ମଧ୍ୟରୁ ୧୯୬ ଟି ଆସନର ଫଳାଫଳ ଆସିଛି। ସେଥିମଧ୍ୟରୁ ଆମ ଆଦମୀ ପାର୍ଟି ୧୦୬ ଟି ଆସନ, ଭାଜପା ୮୪, କଂଗ୍ରେସ ୫ ଏବଂ ଅନ୍ୟ ଦଳ ୧ ଟି ଆସନ ପାଇଛନ୍ତି। ଅବଶିଷ୍ଟ ୫୪ଟି ଆସନ ପାଇଁ ଗଣନା ଚାଲିଛି।
ଫଳାଫଳ ଅନୁସାରେ ଏମସିଡିର ୧୫ ବର୍ଷର ଭାଜପା କ୍ଷମତା ଉପରେ ଏଏପି ଝାଡୁ ପାହାର କରିଛି। ଆମ ଆଦମୀ ପାର୍ଟିର ବିଧାୟକ ସୌରଭ ଭରଦ୍ୱାଜ କହିଛନ୍ତି, ଦିଲ୍ଲୀର ଲୋକମାନେ ଆମ ଆଦମୀ ପାର୍ଟିକୁ ୧୫ ବର୍ଷ ପରେ ଏମସିଡି ଚଳାଇବାକୁ ସୁଯୋଗ ଦେଇଛନ୍ତି। ଭାଜପାକୁ ଦିଲ୍ଲୀର ଲୋକମାନେ ଉପଯୁକ୍ତ ଉତ୍ତର ଦେଇଛନ୍ତି।
ଆମ ଆଦମୀ ପାର୍ଟି ଏମପି ସଞ୍ଜୟ ସିଂ କହିଛନ୍ତି, ଆମେ ୧୫ ବର୍ଷର ଭାଜପା କ୍ଷମତାକୁ ପରାଜିତ କରିଛୁ। ସମଗ୍ର ଦେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏକମାତ୍ର ବିକଳ୍ପ। ଭାଜପା ବିରୋଧରେ ଆମ ଆଦମୀ ପାର୍ଟି ଏକମାତ୍ର ବିକଳ୍ପ ବୋଲି ସେ କହିଛନ୍ତି।
