ଭୁବନେଶ୍ୱର, ୨୫।୩ (ବ୍ୟୁରୋ): ବର୍ଷା ଦିନକୁ ଦୃଷ୍ଟିରେ ରଖି ଭୁବନେଶ୍ୱର ମହାନଗର ନିଗମ(ବିଏମ୍ସି) ଡ୍ରେନ ନିର୍ମାଣ କାର୍ଯ୍ୟକୁ ତ୍ୱରାନ୍ବିତ କରାଇବା ସହିତ ପଙ୍କ ଉଦ୍ଧାର ପାଇଁ ଯୋଜନା ପ୍ରସ୍ତୁତ କରୁଛି। ନିୟମିତ ଭାବେ ବିଏମ୍ସି କର୍ତ୍ତୃପକ୍ଷ ତିନୋଟି ଜୋନ୍ରେ ଚାଲୁ ରହିଥିବା ଡ୍ରେନ ମରାମତି ଓ ନିର୍ମାଣକୁ ପ୍ରଦକ୍ଷିଣ କରୁଛନ୍ତି। ଏହି କ୍ରମରେ ଶୁକ୍ରବାର ମେୟର ସୁଲୋଚନା ଦାସ ଦକ୍ଷିଣ-ପୂର୍ବ ଜୋନ୍ର ୱାର୍ଡ ନଂ. ୪୪ ଓ ୫୭ ଅନ୍ତର୍ଗତ ବିଭିନ୍ନ ଅଞ୍ଚଳ ପରିଦର୍ଶନ କରିଥିଲେ। ୱାର୍ଡ ନଂ. ୪୪ରୁ ବଡ଼ଗଡ଼ କଳିଙ୍ଗ ବସ୍ତି, ଝରଣାସାହି ଏବଂ ଚାରିଛକ ଅଞ୍ଚଳରେ ଚାଲୁ ରହିଥିବା ଡ୍ରେନ କାର୍ଯ୍ୟ ବୁଲି ଦେଖିଥିଲେ। ଚାରିଛକଠାରୁ ଝରଣାସାହି ପର୍ଯ୍ୟନ୍ତ ଚାଲୁ ରହିଥିବା ଡ୍ରେନ କାର୍ଯ୍ୟ ଶେଷ ହେଲେ କଳିଙ୍ଗବସ୍ତି, ଝରଣାସାହି, ଭାସ୍କରେଶ୍ୱର କଲୋନି, ବଡ଼ଗଡ଼ ବ୍ରିଟ କଲୋନି ଓ ବଡ଼ଗଡ଼ ଗ୍ରାମର ପ୍ରାୟ ୧୦ ହଜାର ନାଗରିକ ଉପକୃତ ହେବେ। ତେଣୁ ଧାର୍ଯ୍ୟ ସମୟରେ କାର୍ଯ୍ୟ ସମାପ୍ତ କରିବାକୁ ମେୟର ତାଗିଦ୍ କରିଥିଲେ। ଏହାପରେ ଜଗନ୍ନାଥ ଆଶ୍ରମ ନିକଟରେ ପୂର୍ତ୍ତ ବିଭାଗ ପକ୍ଷରୁ ଚାଲୁଥିବା ନାଳ କାର୍ଯ୍ୟ ବୁଲି ଦେଖିଥିଲେ। ନାଗରିକ ହିତ ଦୃଷ୍ଟିରୁ ଆବଶ୍ୟକ ପଦକ୍ଷେପ ନେବା ଓ ଯଥା ସମ୍ଭବ ଜଳବନ୍ଦୀକୁ ଏଡାଇବାର ଚେଷ୍ଟା ଜାରି ରହିଛି ବୋଲି ମେୟର କହିଛନ୍ତି। ଏଥିସହ ନାଳରେ ବର୍ଜ୍ୟବସ୍ତୁ ନ ଫିଙ୍ଗିବା ପାଇଁ ମଧ୍ୟ ସେ ଅନୁରୋଧ କରିଛନ୍ତି। ସେହିପରି ଆଗାମୀ ମୌସୁମୀକୁ ଦୃଷ୍ଟିରେ ରଖି ବିଭିନ୍ନ ନାଳରୁ ଆବଶ୍ୟକ ପରିମାଣର ପଙ୍କୋଦ୍ଧାର ପାଇଁ ବିଏମ୍ସିର ଯୋଜନା ପ୍ରସ୍ତୁତ ହୋଇଛି। ନିକଟରେ ଏଥିପାଇଁ ଟେଣ୍ଡର ଆହ୍ବାନ କରାଯିବ ବୋଲି ବିଏମ୍ସି ତରଫରୁ ସୂଚନା ଦିଆଯାଇଛି।
