ପରଜଙ୍ଗ, ୨୫।୭ (ନିଗମାନନ୍ଦ ଦଳବେହେରା): ଢେଙ୍କାନାଳ ଜିଲା ପରଜଙ୍ଗ ପୋଲିସକୁ ଏକ ବଡ଼ ସଫଳତା ମିଳିଛି। ଢେଙ୍କାନାଳ ଓ ଅନୁଗୋଳ ଜିଲାରେ ବିଭିନ୍ନ ଚୋରି, ଲୁଟ୍, ଡକାୟତି ଓ ଭୟଭୀତ କରିବା ଭଳି ଅପରାଧରେ ସମ୍ପୃକ୍ତ ଅପରାଧୀ ବିଜୟ ପରିଡ଼ା ଓରଫ ’ହଟିଆ’ (୩୪) ଓ ସହଯୋଗୀ ବିଜନ ବେହେରା (୩୮)ଙ୍କୁ ପୋଲିସ ଗିରଫ କରିଛି। ସେମାନଙ୍କଠାରୁ ଏକ ସ୍କୁଟି, ତେଲେଙ୍ଗା କାତି, ୬ଟି ମୋବାଇଲ ଫୋନ ଏବଂ ନଗଦ ୬,୧୦୦ ଟଙ୍କା ଜବତ କରାଯାଇଛି।
ଶୁକ୍ରବାର ପରଜଙ୍ଗ ଥାନାରେ ଆୟୋଜିତ ଖବରଦାତା ସମ୍ମିଳନୀରେ କାମାକ୍ଷାନଗର ଏସ୍ଡିପିଓ ଚିତ୍ତରଞ୍ଜନ ବେହେରା ଏ ନେଇ ସୂଚନା ଦେଇଛନ୍ତି।
ଗୁରୁବାର ମଧ୍ୟାହ୍ନରେ ମହାବିରୋଡ଼ ଥାନା ଅଧୀନ କରଡ଼ାଖମଣ ଗ୍ରାମର ଯଶୋବନ୍ତ ସିଂ ତାଳଚେରରୁ ନିଜ ଘରକୁ ଫେରୁଥିବା ବେଳେ ୧୪୯ ନମ୍ବର ଜାତୀୟ ରାଜପଥର ଦୋମୁହାଣୀ ଛକ ନିକଟରେ ଏକ ସ୍କୁଟିରେ ଆସିଥିବା ୨ ଯୁବକ ତାଙ୍କୁ ଅଟକାଇଥିଲେ। ମାରଣାସ୍ତ୍ର ଦେଖାଇ ତାଙ୍କଠାରୁ ଦୁଇଟି ଦାମୀ ମୋବାଇଲ ଫୋନ ଓ କିଛି ନଗଦ ଟଙ୍କା ଲୁଟି ଫେରାର ହୋଇଯାଇଥିଲେ।
ଯଶୋବନ୍ତ ପରଜଙ୍ଗ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ନଂ. ୪୨୩/୨୬ ରୁଜୁକରି ତଦନ୍ତ ଆରମ୍ଭ କରିଥିଲା। ଥାନାଧିକାରୀଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା। ଗୁରୁବାର ରାତିରେ ଦଦରାଘାଟି ଫାଣ୍ଡି ଅଧୀନ ଦୋମୁହାଣୀ ଗେହ୍ଲେଇପଶି ସାହିରୁ ବିଜୟ ପରିଡ଼ା ଓ ତାଙ୍କ ସହଯୋଗୀ ବିଜନ ବେହେରାଙ୍କୁ ଗିରଫ କରାଯାଇଥିଲା। ଶୁକ୍ରବାର ସେମାନଙ୍କୁ କୋର୍ଟଚାଲାଣ କରାଯାଇଛି। ଗତ ମେ’ ୨୩ ତାରିଖ ରାତିରେ ପରମହଂସପୁର ଗ୍ରାମର ଦୁର୍ଯ୍ୟୋଧନ ସାହୁଙ୍କ ଘରେ ହୋଇଥିବା ଚୋରି ଘଟଣାରେ ମଧ୍ୟ ଉଭୟଙ୍କ ସମ୍ପୃକ୍ତି ଥିବା ସ୍ବୀକାର କରିଥିବା ପୋଲିସ କହିଛି। ଏହି ଘଟଣାରେ ପୂର୍ବରୁ ମାମଲା ନଂ. ୩୨୩/୨୬ ରୁଜୁ ହୋଇଥିଲା।
ପୋଲିସ ସୂଚନା ଅନୁଯାୟୀ, ମୁଖ୍ୟ ଅଭିଯୁକ୍ତ ବିଜୟ ପରିଡ଼ାଙ୍କ ନାମରେ ଢେଙ୍କାନାଳ ଓ ଅନୁଗୋଳ ଜିଲାର ବିଭିନ୍ନ ଥାନାରେ ୫୫ଟି ମାମଲା ରହିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି, ଲୁଟ୍ ଟଙ୍କାରେ ସେମାନେ ମଉଜମସ୍ତିରେ ଖର୍ଚ୍ଚ କରୁଥିଲେ।
ଖବରଦାତା ସମ୍ମିଳନୀରେ ପରଜଙ୍ଗ ଥାନାଧିକାରୀ ସୁବ୍ରତ କୁମାର ସାହୁ, ଏଏସ୍ଆଇ ଯୁଗଳ ପ୍ରଧାନ, ଜଳନ୍ଧର ବାରିକ ଓ ଦଦରାଘାଟି ଫାଣ୍ଡି ଅଧିକାରୀ ଅଜୟ ସାମଲ ଉପସ୍ଥିତ ଥିଲେ।
