ମସ୍କୋ, ୧।୨: ଜେଲ୍ରେ ଥିବା ରୁଷିଆର ବିରୋଧୀ ଦଳ ନେତା ଆଲେକ୍ସି ନଭଲ୍ନିଙ୍କୁ ତୁରନ୍ତ ମୁକ୍ତ କରିବା ଦାବିରେ ରବିବାର ସାରା ଦେଶରେ ବିକ୍ଷୋଭ ପ୍ରଦର୍ଶନ କରାଯାଇଛି। ହଜାର ହଜାର ସଂଖ୍ୟାରେ ବିକ୍ଷୋଭକାରୀ ଏଥିରେ ଯୋଗଦେଇ ରାଷ୍ଟ୍ରପତି ଭ୍ଲାଡିମିର୍ ପୁଟିନଙ୍କ ବିରୋଧରେ ସ୍ଲୋଗାନ ଦେଇଥିଲେ। ଆନ୍ଦୋଳନ ସାରା ଦେଶକୁ ବ୍ୟାପିଥିବାବେଳେ ପୋଲିସ ୨,୭୦୦ ବିକ୍ଷୋଭକାରୀଙ୍କୁ ଗିରଫ କରିଛି।
ବିକ୍ଷୋଭକାରୀଙ୍କୁ ନିୟନ୍ତ୍ରଣ କରିବା ପାଇଁ ରୁଷିଆ କର୍ତ୍ତୃପକ୍ଷଙ୍କ ପକ୍ଷରୁ ଉଦ୍ୟମ କରାଯାଇଥିଲା। ପୋଲିସ ମସ୍କୋର କେନ୍ଦ୍ରସ୍ଥଳ ସମେତ ବିଭିନ୍ନ ସହରକୁ ଲକ୍ଡାଉନ କରିଦେଇଥିଲା। ହଜାର ହଜାର ପୋଲିସ ସକାଳଠାରୁ ରାଜଧାନୀ ରାସ୍ତାଘାଟରେ ପଇଁତରା ମାରୁଥିଲେ। ଏପରିକି ଚାଲିକରି ଯାଉଥିବା ଲୋକଙ୍କ ଉପରେ ମଧ୍ୟ କଟକଣା ଜାରି କରାଯାଇଥିଲା। ଏକ ବିରଳ ଘଟଣାକ୍ରମରେ ମସ୍କୋ ସହରର ଅଧିକାଂଶ ସେଣ୍ଟ୍ରାଲ ମେଟ୍ରୋ ଷ୍ଟେଶନକୁ ବନ୍ଦ କରିଦେବା ସହ ଭୂତଳ ପରିବହନକୁ ପରିବର୍ତ୍ତନ କରାଯାଇଥିଲା। ଗତ ସପ୍ତାହାନ୍ତ ବିକ୍ଷୋଭ ବେଳେ ୪ ହଜାରରୁ ଅଧିକ ବିକ୍ଷୋଭକାରୀଙ୍କୁ ଅଟକ ରଖାଯାଇଥିଲା। ରୁଷିଆରେ ଏଭଳି ରାଲି କେବେ ହୋଇ ନ ଥିଲା। ଏହା ଦେଶବାସୀଙ୍କ ବହୁବର୍ଷ ଅସନ୍ତୋଷର ପ୍ରତିଫଳନ ବୋଲି କୁହାଯାଉଛି। ଜେଲ୍ ଧମକ, ସୋସିଆଲ୍ ମିଡିଆ ଗ୍ରୁପ୍ଗୁଡ଼ିକୁ ଚେତାବନୀ ତଥା ପୋଲିସର ବ୍ୟାପକ କର୍ଡନ ସତ୍ତ୍ୱେ ରବିବାର ଅଧିକାଂଶ ସହରରେ ବିକ୍ଷୋଭକାରୀ ରାସ୍ତାକୁ ଓହ୍ଲାଇଥିଲେ।
ପୁଟିନ୍ଙ୍କ ସମାଲୋଚକ ଭାବେ ଜଣାଶୁଣା ୪୪ ବର୍ଷୀୟ ଆଲେକ୍ସି ଜଣେ ଦୁର୍ନୀତି ବିରୋଧୀ ତଦନ୍ତକାରୀ। ଗତ ୧୭ ତାରିଖରେ ସେ ଜର୍ମାନୀରୁ ଫେରୁଥିବା ବେଳେ ଗିରଫ ହୋଇଥିଲା। ସ୍ନାୟୁ ଜନିତ ବିଷକ୍ରିୟା ଯୋଗୁ ସେ ୫ ମାସ ଜର୍ମାନୀରେ ଚିକିତ୍ସିତ ହୋଇ ଫେରୁଥିଲେ। ବିଷକ୍ରିୟା ପାଇଁ ସେ କ୍ରେମ୍ଲିନ୍କୁ ଦୋଷ ଦେଇଥିବାବେଳେ ରୁଷିଆ କର୍ତ୍ତୃପକ୍ଷ ଏହାକୁ ଖଣ୍ଡନ କରିଛନ୍ତି। ପାରୋଲ ସର୍ତ୍ତ ଖିଲାପ କରିଥିବା ଅଭିଯୋଗରେ ତାଙ୍କୁ ଗିରଫ କରାଯାଇଛି। ଆଲେକ୍ସିଙ୍କୁ ଖଲାସ କରିଦେବା ପାଇଁ ଆମେରିକା ରୁଷିଆକୁ ଆହ୍ବାନ ଦେବା ସହ ବିକ୍ଷୋଭକାରୀଙ୍କ ଉପରେ କାର୍ଯ୍ୟାନୁଷ୍ଠାନକୁ ନିନ୍ଦା କରିଛି।
