ଛତ୍ରପୁର, ୯।୯ (ଦିଲ୍ଲୀପ ସାମଲ/ଦ୍ଵାରକା ପଟ୍ଟନାୟକ): ଗଞ୍ଜାମ ଜିଲା ଛତ୍ରପୁର ତହସିଲ ଅନ୍ତର୍ଗତ ନରେନ୍ଦ୍ରପୁର ମୌଜାରେ ଜମି କିଣାବିକାକୁ ନେଇ ଏକ ବଡ଼ ଧରଣର ଜାଲିଆତି ହୋଇଥିବା ଅଭିଯୋଗ ସାମ୍ନାକୁ ଆସିଛି। ନକଲି ପ୍ରମାଣପତ୍ର ଦାଖଲ କରି ପ୍ରାୟ ୧୪ ଏକର ଚାଷଜମି ବିକ୍ରି କରାଯାଇଥିବା ନେଇ ନରେନ୍ଦ୍ରପୁର ଗ୍ରାମର ଚାଷୀ ଓ ଅଞ୍ଚଳବାସୀ ଏକ ଖବରଦାତା ସମ୍ମିଳନୀ କରି ସାଂଘାତିକ ଅଭିଯୋଗ ଆଣିଛନ୍ତି। ଏହି ଜାଲିଆତି ଯୋଗୁଁ ଅନେକ ନିରୀହ ଚାଷୀ ଧାନ ପଞ୍ଜିକରଣରୁ ବାଦ୍ ପଡ଼ିଥିବା ଜଣାପଡ଼ିଛି।
ଚାଷୀମାନଙ୍କ କହିବା ଅନୁଯାୟୀ, ୧୯୬୪ ମସିହାରେ ଗ୍ରାମର ପାକଲା ଶ୍ରୀକୃଷ୍ଣ ପାତ୍ରଲୁ ଭୂସଂସ୍କାର ଆଇନ ଅନୁଯାୟୀ ପ୍ରାୟ ୭୦ ଏକର ଜମିରୁ ୩୫ ଏକର ଜମି ଗ୍ରାମର ଚାଷୀମାନଙ୍କୁ ରୟତ ଆକାରରେ ପ୍ରଦାନ କରିଥିଲେ। ପରବର୍ତ୍ତୀ ସମୟରେ ୧୯୮୦ ମସିହାରେ ଅବଶିଷ୍ଟ ୩୫ ଏକର ଜମି ମଧ୍ୟ ଚାଷୀମାନଙ୍କୁ ବିକ୍ରି କରାଯାଇଥିଲା। ସେବେଠାରୁ ପ୍ରାୟ ୨୦୦ ଚାଷୀ ପରିବାର ନିୟମିତ ଭାବେ ସରକାରୀ ଖଜଣା ପ୍ରଦାନ କରି ଚାଷକାର୍ଯ୍ୟ କରିଆସୁଛନ୍ତି। ତେବେ ୧୯୮୦ ମସିହାରେ ଜମି ବିକ୍ରି ଦସ୍ତାବିଜରେ ପାକଲା ଶ୍ରୀକୃଷ୍ଣ ପାତ୍ରଲୁଙ୍କ ପୁଅ ପାକଲା ସୂର୍ଯ୍ୟ ନାରାୟଣଙ୍କ ବୟସ ୭୫ ବର୍ଷ ଦର୍ଶାଯାଇଥିଲା।
ମାତ୍ର ଚଳିତ ବର୍ଷ ଜୁଲାଇ ମାସରେ ପାକଲା ଶ୍ରୀକୃଷ୍ଣ ପାତ୍ରଲୁଙ୍କ ତିନି ପୁଅ ନିଜ ନାମରେ ମିଥ୍ୟା ପ୍ରମାଣପତ୍ର ଦାଖଲ କରି ଉକ୍ତ ୭୦ ଏକର ଜମି ମଧ୍ୟରୁ ୧୪ ଏକର ଚାଷଜମି ବିକ୍ରି କରିଦେଇଥିବା ଚାଷୀମାନେ ଜାଣିବାକୁ ପାଇଛନ୍ତି। ଆଶ୍ଚର୍ଯ୍ୟର ବିଷୟ ଯେ, ଚଳିତ ବର୍ଷ ୧୪ ଏକର ଜମି ବିକ୍ରି ସମୟରେ ସେହି ସମାନ ବ୍ୟକ୍ତିଙ୍କ ବୟସ ୫୨ ବର୍ଷ ଦର୍ଶାଯାଇଛି, ଯାହା ଦସ୍ତାବିଜରେ ବଡ଼ ଧରଣର ଜାଲିଆତିକୁ ସ୍ପଷ୍ଟ କରୁଛି। ଏହା ସହିତ ପାକଲା ଶ୍ରୀକୃଷ୍ଣ ପାତ୍ରଲୁଙ୍କ ବହୁ ବର୍ଷ ପୂର୍ବରୁ ମୃତ୍ୟୁ ହୋଇସାରିଛି ଏବଂ ଗ୍ରାମରେ ତାଙ୍କ ସମାଧି ମଧ୍ୟ ରହିଛି। କିନ୍ତୁ ଜମି ବିକ୍ରି ସମୟରେ ତାଙ୍କୁ ଜୀବିତ ଦର୍ଶାଇ କିଛି ଅସାଧୁ ଦଲାଲଙ୍କ ମାଧ୍ୟମରେ ଏହି ଜାଲିଆତି କରାଯାଇଥିବା ଚାଷୀମାନେ ଅଭିଯୋଗ କରିଛନ୍ତି।
ଏହି ସମ୍ବେଦନଶୀଳ ଘଟଣା ପରେ ଚାଷୀମାନେ ଗଭୀର ଅସନ୍ତୋଷ ପ୍ରକାଶ କରିଛନ୍ତି। କାଗଜପତ୍ର ଜାଲିଆତି କରି କରାଯାଇଥିବା ଜମି ବିକ୍ରିକୁ ତୁରନ୍ତ ଖାରଜ କରିବା, ସମ୍ପୂର୍ଣ୍ଣ ଘଟଣାର ନିରପେକ୍ଷ ତଦନ୍ତ କରି ଚାଷୀମାନଙ୍କୁ ସେମାନଙ୍କ ଜମି ଫେରସ୍ତ କରିବା ଏବଂ ମିଥ୍ୟା ପ୍ରମାଣପତ୍ର ଦେଇ ଜମି ବିକ୍ରି କରିଥିବା ବ୍ୟକ୍ତି ଓ ସମ୍ପୃକ୍ତ ଦଲାଲଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି।
ଏହି ଖବରଦାତା ସମ୍ମିଳନୀରେ ଚାଷୀ ନେତା ଗୋପାଳ ସେଠି, କାଳୁ ସେଠି, କୃଷ୍ଣ ଜେନା, ପ୍ରାଣ ସେଠି, ପିଣ୍ଟୁ ଜେନା, ବୁଦ୍ଧିଆ ସେଠି, ସୁନା ବେହେରା, ପିତାମ୍ବର ସେଠି, ଶଙ୍କର ପରିଡା, ବିଜୟ କୁମାର, ଶଙ୍କର ବିଷୋୟୀଙ୍କ ସମେତ ବହୁ ସଂଖ୍ୟାରେ କ୍ଷତିଗ୍ରସ୍ତ ଚାଷୀ ଉପସ୍ଥିତ ଥିଲେ। ପ୍ରଶାସନ ପକ୍ଷରୁ ତୁରନ୍ତ କୌଣସି ସମାଧାନମୂଳକ ପଦକ୍ଷେପ ଗ୍ରହଣ ନକରାଗଲେ ସେମାନେ ରାଜରାସ୍ତାକୁ ଓହ୍ଲାଇବାକୁ ସ୍ପଷ୍ଟ ଚେତାବନୀ ଦେଇଛନ୍ତି।
