ଇସ୍ଲାମାବାଦ,୧୯ ।୧୦: ପାକିସ୍ତାନରେ ବିଗିଡି ଚାଲିଛି ରାଜନୈତିକ ସ୍ଥିତି । ରବିବାର ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ବିରୋଧରେ ବିରୋଧି ଏକ ବଡ ରାଲି ବାହାର କରିଥିବା ବେଳେ ଏଥିରେ ହଜାର ହଜାର ସଂଖ୍ୟାରେ ଜନତା ଯୋଗ ଦେଇଥିଲେ । ଏବେ ଏହି ରାଲିର ଗୋଟିଏ ଦିନ ପରେ ଅର୍ଥାତ୍ ସୋମବାର ଇମ୍ରାନ ବିରୋଧିଙ୍କ ଉପରେ କଡା ପଦକ୍ଷେପ ନେଇଛନ୍ତି । ସୋମବାର ପୂର୍ବତନ ପ୍ରଧାନମନ୍ତୀ ନୱାଜ ଶରିଫଙ୍କ ଜ୍ୱାଇଁ ତଥା ମରିୟମ ନୱାଜଙ୍କ ସ୍ୱାମୀ ସଫଦର ଅୱାନଙ୍କୁ ଗିରଫ କରାଯାଇଛି । ନୱାଜ ଶରିଫଙ୍କ ଝିଅ ତଥା ପାକିସ୍ତାନ ମୁସଲିମ ଲିଗ(ଏନ୍)ର ନେତ୍ରୀ ମରିୟମ ଶରିଫ ଏହି ସୂଚନା ଦେଇଛନ୍ତି । ସେ ଅଭିଯୋଗ କରିଛନ୍ତ କି ପୋଲିସ ସକାଳୁ ସକାଳୁ ତାଙ୍କ ହୋଟେଲ ରୁମକୁ ଆସି କବାଟ ଭାଙ୍ଗି ସଫଦରଙ୍କୁ ଗିରଫ କରିଛି । କରାଚିର ଏକ ହୋଟେଲରେ ସେ ରହୁଥିବା ପ୍ରକାଶ କରିଛନ୍ତି । ସୂଚନାଯୋଗ୍ୟ, ପାକିସ୍ତାନର କରାଚିରେ ବିରୋଧି ଇମ୍ରାନଙ୍କ ବିରୋଧରେ ଏକ ବଡ ରାଲି ଆୟୋଜନ କରିଥିଲେ । ଯେଉଁଠାରେ ମରିୟମ ଦେଇଥିବା ଭାଷଣ ଚର୍ଚ୍ଚାକୁ ଆସିଥିଲା । ଏଥିରେ ସେ ଇମ୍ରାନଙ୍କୁ ଭୟାଳୁ, ଅଯୋଗ୍ୟ ଆଦି କହିଥିଲେ । ଏହାସହ ସବୁଥିରେ ଇମ୍ରାନଙ୍କୁ ସେନାର ସହାୟତା ମିଳୁଥିବା ମଧ୍ୟ ଅଭିଯୋଗ ଆଣିଥିଲେ ମରିୟମ । କେବଳ ସେତିକି ନୁହେଁ ଇମ୍ରାନଙ୍କ ଉପରେ ଭ୍ରଷ୍ଟ୍ରାଚାର, କରୋନା ମୁକାବିଲାରେ ଫେଲ୍ ମାରିବା ଭଳି ଅଭିଯୋଗ ମଧ୍ୟ କରିଛନ୍ତି ମରିୟମ । ତେବେ ଇମ୍ରାନ ଖାଁ ସରକାରଙ୍କ ବିରୋଧରେ ବେଶ୍ କିଛିଦିନ ହେବ ବିରୋଧି ଦୋଷାରୋପ କରି ଆସୁଛନ୍ତି ।
