ନୂଆଦିଲ୍ଲୀ,୨୪।୧୨: ଦେଶର ପ୍ରମୁଖ ଅଟୋମୋବାଇଲ କମ୍ପାନୀ ମାରୁତି ସୁଜୁକି ଇଣ୍ଡିଆ ଲିମିଟେଡ୍ (ଏମ୍ଏସ୍ଆଇଏଲ୍)ର ସମସ୍ତ ଯାନ (କାର୍)ର ଦର ବୃଦ୍ଧି ନେଇ ଘୋଷଣା କରାଯାଇଛି। ଏପରିକି ୨୦୨୩ ଜାନୁୟାରୀରୁ କମ୍ପାନୀ ତା’ର ସମସ୍ତ ଯାନର ଦର ବଢ଼ାଇବା ସମ୍ପର୍କରେ ଯୋଜନା କରୁଥିବା ଜଣାପଡ଼ିଛି। ବିଶେଷକରି ଯାନ ନିର୍ମାଣରେ ଆବଶ୍ୟକ ଇଲେକ୍ଟ୍ରୋନିକ୍ ଉପାଦାନଗୁଡ଼ିକର ଘୋର ଅଭାବ ସାଙ୍ଗକୁ ଅନ୍ୟାନ୍ୟ ଆବଶ୍ୟକ ଉପକରଣର ବଜାର ଦର ବୃଦ୍ଧି ଯୋଗୁ କମ୍ପାନୀ ଏଭଳି ପଦକ୍ଷେପ ଗ୍ରହଣ କରିଥିବା କୁହାଯାଉଛି। ସେହିପରି ୨୦୨୨ ନଭେମ୍ବରରେ ଏହାର ମୋଟ ବିକ୍ରିରେ ୧୪% ବୃଦ୍ଧି ହୋଇଥିବା ଜଣାପଡିଛି। ଏପରିକି ମାରୁତି ସୁଜୁକି ଚଳିତ ବର୍ଷ ନଭେମ୍ବରରେ ୧,୫୯,୦୪୪ ୟୁନିଟ୍ ଗାଡ଼ି ବିକ୍ରି କରିଥିଲା। ଗତ ବର୍ଷ ସମାନ ଅବଧି ମଧ୍ୟରେ ତାହା ୧,୩୯,୧୮୪ ୟୁନିଟ୍ରେ ରହିଥିଲା। ଅପରପକ୍ଷରେ ଘରୋଇ ବିକ୍ରି (୧,୩୫,୦୫୫ ୟୁନିଟ୍) ସହ ଅନ୍ୟ ଓଇଏମ୍କୁ (୪,୨୫୧ ୟୁନିଟ୍) ବିକ୍ରି ଏବଂ ରପ୍ତାନି (୧୯,୭୩୮ ୟୁନିଟ୍) ଅନ୍ତର୍ଭୁକ୍ତ ରହିଛି।
ଅପରପକ୍ଷରେ କମ୍ପାନୀର ଘରୋଇ ବିକ୍ରି ଚଳିତ ବର୍ଷ ନଭେମ୍ବରରେ ୧୮% ବୃଦ୍ଧି ପାଇ ୧,୩୯,୩୦୬ ରେ ପହଞ୍ଚିଛି। ହେଲେ ଗତ ବର୍ଷ ଏହି ସମୟ (ନଭେମ୍ବର ) ମଧ୍ୟରେ ୧,୧୭,୭୯୧ ୟୁନିଟ୍ ରହିଥିଲା।
ବିଶେଷକରି କମ୍ପାନୀର କମ୍ପାକ୍ଟ ମଡେଲ ମିନି କାର୍ (ଆଲ୍ଟୋ, ଏସ୍-ପ୍ରେସୋ)ର ବିକ୍ରି ଗତ ବର୍ଷ ସମାନ ମାସରେ ୧୭,୪୭୩ ୟୁନିଟ୍ରୁ ୧୮,୨୫୧ୟୁନିଟ୍ ପର୍ଯ୍ୟନ୍ତ ବୃଦ୍ଧି ପାଇଥିଲା। ସେହିଭଳି କମ୍ପାକ୍ଟ ସେଗ୍ମେଣ୍ଟରେ ବିକ୍ରି (ସ୍ବିଫ୍ଟ, ସେଲେରିଓ, ଇଗ୍ନିସ୍, ବାଲେନୋ ଏବଂ ଡିଜାୟାର) ଗତ ବର୍ଷ ନଭେମ୍ବରରେ ୫୭,୦୧୯ ୟୁନିଟ୍ରୁ ୭୨,୮୪୪ ୟୁନିଟ୍କୁ ବୃଦ୍ଧି ପାଇଥିଲା। ସେହିପରି କମ୍ପାନୀର ମଧ୍ୟମ ଆକାରର ସେଡାନ୍ ସିଆଜ୍ର ବିକ୍ରି ୧,୫୫୪ ୟୁନିଟ୍ ଥିବାବେଳେ ଚଳିତ ବର୍ଷ ନଭେମ୍ବରରେ ୟୁଟିଲିଟି ଗାଡି ସେଗ୍ମେଣ୍ଟ (ଭିଟାରା ବ୍ରେଜା, ଏସ୍-କ୍ରସ୍, ଏର୍ଟିଗା) ରେ ବିକ୍ରି ୩୨,୫୬୩ ୟୁନିଟ୍କୁ ବୃଦ୍ଧି ପାଇଛି। ଅପରପକ୍ଷରେ ରପ୍ତାନି ଗତ ବର୍ଷ ସମାନ ମାସରେ ୨୧,୩୯୩ ୟୁନିଟ୍ ତୁଳନାରେ ୧୯,୭୩୮ ୟୁନିଟ୍କୁ ଖସି ଆସିଛି। ସୂଚନାଯୋଗ୍ୟ, ମାରୁତି ସୁଜୁକି ଇଣ୍ଡିଆର ଶେୟାର ୧.୫୮% ହ୍ରାସ ପାଇ ବିଏସ୍ଇରେ ୮,୮୧୫ ମୂଲ୍ୟରେ ବିକ୍ରି ହୋଇଛି।
