ଦେବଗଡ଼,୨୩ା୫(ଡି.ଏନ୍.ଏ.): ବଳାତ୍କାର ଅଭିଯୋଗରେ ୪ ବର୍ଷ ଧରି ବିଚାରଧୀନ ବନ୍ଦୀ ଥିବା ଯୁବକଙ୍କ ସହ ପୀଡ଼ିତା ଯୁବତୀଙ୍କ ମଙ୍ଗଳବାର ବିବାହ ହୋଇଛି। ଜେଲ କର୍ତ୍ତୃପକ୍ଷ ଓ ପୋଲିସ ବିଭାଗ ପକ୍ଷରୁ ଏହା ଆୟୋଜନ କରାଯାଇଥିଲା। ଯୁବତୀ ଓ ଯୁବକ ହେଲେ ଦେବଗଡ଼ ଜିଲା ରିଆମାଳ ବ୍ଲକ କୁଣ୍ଢେଇଗୋଳା ଥାନା ଅନ୍ତର୍ଗତ କୁଶଖଳିଆ ଗ୍ରାମର ବଇକୁଳି ଶବର(୨୬)। ରେଜେଷ୍ଟ୍ରି କାର୍ଯ୍ୟାଳୟରେ ବିବାହ କରିବା ପରେ ଦେବଗଡ଼ ସହରର ଶାସନ ସାହିସ୍ଥିତ ଗୋକର୍ଣ୍ଣେଶ୍ବର ଶିବ ମନ୍ଦିରରେ ଉଭୟ ପରିବାରର ଉପସ୍ଥିତିରେ ଯୁବତୀଯୁବକ ପରସ୍ପରକୁ ମାଳ ପିନ୍ଧାଇ ଜୀବନ ସାଥି ଭାବେ ଗ୍ରହଣ କରିଛନ୍ତି। ପରିବାର ଲୋକ ଉଭୟଙ୍କୁ ଗ୍ରହଣ କରିବା ସହିତ ଖୁସିରେ ମିଠା ବଣ୍ଟନ କରିଥିଲେ ।
ସୂଚନାଯୋଗ୍ୟ, ୨୦୧୮ ମସିହାରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ତେବେ ସେମାନଙ୍କ ବିବାହ ପାଇଁ ଉଭୟଙ୍କ ପରିବାର ଲୋକ ଗ୍ରହଣ କରି ନ ଥିଲେ। ଏନେଇ ଝିଅର ବାପା ଝିଅକୁ ବଇକୁଳି ବଳାତ୍କାର କରିଥିବା ନେଇ ଥାନାରେ ଅଭିଯୋଗ କରିଥିଲେ। ତାଙ୍କ ଅଭିଯୋଗକୁ ଭିତ୍ତିକରି ପୋଲିସ ବଇକୁଳକୁ ଗିରଫ କରି କୋର୍ଟ ଚାଲାଣ କରିଥିଲା। ଉଭୟ ପରିବାରର ଆଗ୍ରହ ପ୍ରକାଶ ପାଇବା ପରେ ଦୀର୍ଘ ୪ ବର୍ଷ ଜେଲରେ ବିଚାରଧୀନ ବନ୍ଦୀ ଭାବେ ରହିବା ପରେ ବଇକୁଳି ଓ ଯୁବତୀଙ୍କ ବିବାହ ହୋଇଛି।
