ମାଲକାନଗିରି,୨୮ା୭(ଦୁର୍ଯ୍ୟୋଧନ ପାତ୍ର): ଜୁଲାଇ ୨୮ରୁ ଅଗଷ୍ଟ ୩ ତାରିଖ ପର୍ଯ୍ୟନ୍ତ ମାଓବାଦୀଙ୍କ ଶହୀଦ ସପ୍ତାହ ପାଳନ ହେବାକୁ ଯାଉଥିବା ବେଳେ ଜିଲାରେ ଯେପରି ମାଓବାଦୀଙ୍କ ଦ୍ୱାରା କୌଣସି ଅଘଟଣ ନ ଘଟେ ସେଥିପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିବା ଏସ୍ପି ନିତିଶ୍ ବାଧ୍ୱାନୀ ସୂଚନା ଦେଇଛନ୍ତି। ଏଥିସହ ୬ଟି ସ୍ବତନ୍ତ୍ର ଟିମ୍ ଗଠନ କରାଯାଇ ବିଭିନ୍ନ ଅଞ୍ଚଳରେ କୋମ୍ବିଂକୁ ଅଗ୍ରାଧିକାର ଦିଆଯାଇଥିବା ବେଳେ ଗୋଇନ୍ଦା ବିଭାଗକୁ ସକ୍ରିୟ କରାଯାଇଛି। ଜିଲା ସୀମାନ୍ତରେ ଯାନବାହନ କଡାକଡି ଭାବେ ଯାଞ୍ଚ କରିବା ପାଇଁ ଆନ୍ଧ୍ରପ୍ରଦେଶ ସୀମାନ୍ତ ମୋଟୁ, ଛତିଶଗଡ ସୀମାନ୍ତ ଚଲାଣଗୁଡା ଓ ପଡିଆ ନିକଟ ଦର୍ଣାପାଲ୍ଠାରେ ପୋଲିସ ପକ୍ଷରୁ ଯାଞ୍ଚ କଡାକଡି କରାଯାଇଛି। ଜିଲାର ସମସ୍ତ ଟ୍ରାଫିକ ଅଞ୍ଚଳରେ ଅପରିଚିତ ଓ ସନ୍ଧିଗ୍ଧ ବ୍ୟକ୍ତିଙ୍କ ଉପରେ ତୀକ୍ଷ୍ମ ଦୃଷ୍ଟି ରଖାଯାଇଛି। ପୋଲିସ ମାଓବାଦୀଙ୍କ ସାମ୍ଭାବ୍ୟ ହିଂସାକାଣ୍ଡକୁ ଦୃଷ୍ଟିରେ ଓଡିଶା, ଛତିଶଗଡ, ଆନ୍ଧ୍ର ସୀମାକୁ ସିଲ କରି ଦିଆଯାଇଛି। ବିଏସଏଫ ପକ୍ଷରୁ ସ୍ବତନ୍ତ୍ର ପୋଲିସ ମୁତୟନ କରଯାଇଛି। ଅନ୍ୟ ପକ୍ଷରେ ମାଓବାଦୀଙ୍କ ଶହୀଦ ସପ୍ତାହକୁ ଦୃଷ୍ଟିରେ ରଖି ସମସ୍ତ ସରକାରୀ ବସ୍ ଶୁକ୍ରବାରରୁ ବନ୍ଦ ରହିବ। ମାଲକାନଗିରିଠାରୁ ଭୁବନେଶ୍ୱର, କଟକ, ବଲାଙ୍ଗୀର, ବିଶାଖାପାଟଣା, ବିଜୟନଗରମ୍ ଓ ହାଇଦ୍ରାବାଦକୁ ଯାଉଥିବା ସମସ୍ତ ସରକାରୀ ବସ୍ଗୁଡିକ ବନ୍ଦ ରହିବ।
