ନୂଆଦିଲ୍ଲୀ,୨୬।୨: ଆଉ ଦୁଇ ଦିନ ପରେ ଆରମ୍ଭ ହେବ ମାର୍ଚ୍ଚ ମାସ। ପ୍ରତି ମାସରେ ଟଙ୍କା ସହ ଜଡ଼ିତ ନିୟମ ପରିବର୍ତ୍ତନ ହୋଇଥାଏ। ଏଥର ମଧ୍ୟ ଅନେକ ନିୟମ ପରିବର୍ତ୍ତନ ହେବାକୁ ଯାଉଛି, ଯାହାକି ଆପଣଙ୍କ ପକେଟ ଉପରେ ପ୍ରଭାବ ପକାଇପାରେ। ଜାଣନ୍ତୁ ସେଭଳି କିଛି:
-ମାର୍ଚ୍ଚ ୧ରେ ସ୍ଥିର ହେବ ଏଲ୍ପିଜି, ସିଏନ୍ଜି ଏବଂ ପିଏନ୍ଜିର ମୂଲ୍ୟ:
ଏଲ୍ପିଜି, ସିଏନ୍ଜି ଏବଂ ପିଏନ୍ଜିର ମୂଲ୍ୟ ପ୍ରତ୍ୟେକ ମାସ ପହିଲାରେ ସ୍ଥିର ହୋଇଥାଏ। ଗତ ଫେବୃୟାରୀ ୧ରେ କମ୍ପାନୀଗୁଡ଼ିକ ଘରୋଇ ରନ୍ଧନ ଗ୍ୟାସ ସିଲିଣ୍ଡରର ମୂଲ୍ୟ ବୃଦ୍ଧି କରି ନ ଥିଲେ। ଏଣୁ ଆଗାମୀ ମାସରେ ଏହା ବୃଦ୍ଧି ହୋଇପାରେ ବୋଲି ଆଶା କରାଯାଉଛି।
-ମାର୍ଚ୍ଚରେ ବ୍ୟାଙ୍କଗୁଡିକ ୧୨ ଦିନ ବନ୍ଦ ରହିବ:
ମାର୍ଚ୍ଚରେ ହୋଲି ଏବଂ ନବରାତ୍ରକୁ ମିଶାଇ ବ୍ୟାଙ୍କଗୁଡିକ ୧୨ ଦିନ ବନ୍ଦ ରହିବ। ଏଥିରେ ସାପ୍ତାହିକ ବ୍ୟାଙ୍କ ଛୁଟି ମଧ୍ୟ ଅନ୍ତର୍ଭୁକ୍ତ। ଭାରତର ବ୍ୟାଙ୍କଗୁଡିକ ମାସର ପ୍ରଥମ ଏବଂ ତୃତୀୟ ଶନିବାରରେ ଖୋଲା ରହିଥାଏ। ଦ୍ୱିତୀୟ ଏବଂ ଚତୁର୍ଥ ଶନିବାର ଦିନ ବ୍ୟାଙ୍କଗୁଡିକରେ ଛୁଟିଦିନ ଥାଏ। ମାର୍ଚ୍ଚ ୨୦୨୩ରେ ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ)ର କ୍ୟାଲେଣ୍ଡର ଅନୁଯାୟୀ ଘରୋଇ ଏବଂ ସରକାରୀ ବ୍ୟାଙ୍କଗୁଡିକ ୧୨ ଦିନ ପର୍ଯ୍ୟନ୍ତ ବନ୍ଦ ରହିବ।
-ବ୍ୟାଙ୍କ ଋଣ ମହଙ୍ଗା ହୋଇପାରେ:
ନିକଟରେ ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ) ରେପୋ ହାର ବୃଦ୍ଧି କରିଛି। ଯେଉଁଥିପାଇଁ ଅନେକ ବ୍ୟାଙ୍କ ଏମ୍ସିଏଲ୍ଆର୍ ହାର ବୃଦ୍ଧି କରିଛନ୍ତି। ଯେଉଁଥିପାଇଁ ଋଣ ଏବଂ ଇଏମ୍ଆଇ ଉପରେ ସୁଧ ହାର ବୃଦ୍ଧି ପାଇଛି। ତେଣୁ, ମାର୍ଚ୍ଚ ମାସରୁ ଅଧିକ ଇଏମ୍ଆଇ ଦେବାକୁ ପଡିବ।
-ସୋସିଆଲ ମିଡିଆ ସହିତ ଜଡିତ ନିୟମରେ ସମ୍ଭାବ୍ୟ ପରିବର୍ତ୍ତନ:
ନିକଟରେ ଭାରତ ସରକାର ଆଇଟି ନିୟମ ପରିବର୍ତ୍ତନ କରିଛନ୍ତି। ଟୁଇିଟର, ଫେସବୁକ, ୟୁଟ୍ୟୁବ ଏବଂ ଇନଷ୍ଟାଗ୍ରାମ ପରି ସୋସିଆଲ ମିଡିଆ ପ୍ଲାଟଫର୍ମକୁ ବର୍ତ୍ତମାନ ଭାରତର ନୂତନ ନିୟମ ମାନିବାକୁ ପଡିବ। ଧାର୍ମିକ ଭାବନାକୁ ଉତ୍ତେଜିତ କରୁଥିବା ପୋଷ୍ଟଗୁଡିକରେ ନୂତନ ନିୟମ ଲାଗୁ ହେବ। ମାର୍ଚ୍ଚରୁ ଏହି ନୂତନ ନିୟମ କାର୍ଯ୍ୟକାରୀ ହୋଇପାରେ।। ଅବୈଧ ପୋଷ୍ଟ ପାଇଁ ଉପଭୋକ୍ତାଙ୍କୁ ମଧ୍ୟ ଜରିମାନା ଦେବାକୁ ପଡ଼ିପାରେ।
