ବାଲେଶ୍ୱର ଅଫିସ, ୪।୩-ହର୍ବାଲ ଚା’। ଏଥିରେ ପଡୁନି ଚା’ ପତି କି ଚିନି। କପ୍ ୫ଟଙ୍କାର ଏଇ ଚା’ ପିଇବାକୁ ବି ଭିଡ଼ ଲାଗୁଛି। ବାଲେଶ୍ୱର ସହର ଫକୀରମୋହନ ଗୋଲେଇ ନିିକଟରେ ଏବେ ମନୁଭାଇଙ୍କ ହର୍ବାଲ ଚା’ର ଢେର ଚାହିଦା। ଅବଶ୍ୟ ଏହା ଚା’ ଭଳି ଦେଖାଯାଉଥିଲେ ବି ପ୍ରକୃତରେ ଆୟୁର୍ବେଦିକ ମିଶ୍ରଣର ଗରମ ପାଣି। ଯାହା ରୋଗ ପ୍ରତିରୋଧକ ଶକ୍ତି ବଢ଼ାଇବାରେ ସହାୟକ ହୋଇଥାଏ। ଗରମ ପାଣିରେ ନିର୍ଦ୍ଦିଷ୍ଟ ଭାଗମାପ ଥିବା ଅଦା, ସୁଣ୍ଠି, ପିପ୍ପଳି, ଡାଲଚିନି, ଅଳେଇଚ, ଲବଙ୍ଗ, ଗୋଲମରିଚ, ଜୁଆଣି, ଜାଷ୍ଟିମଧୁ, ଅଶ୍ୱଗନ୍ଧା, ଘୋଡ଼ାବଚ, ତେଜପତ୍ର, ତୁଳସୀ, ଧନ୍ବନ୍ତରୀ ପତ୍ର, ଆମ୍ବଅଦା, କଞ୍ଚାହଳଦୀ, ଗୁଡ଼, ଲେମ୍ବୁ, ମହୁ, ମୁସଳି, ସୈନ୍ଧବ ଲବଣରେ ପ୍ରସ୍ତୁତ ହେଉଛି ହର୍ବାଲ ଚା’।
ମନୁ ଭାଇ(ମନୋରଞ୍ଜନ ଦାସ)ଙ୍କ ବୟସ ୬୮। ତାଙ୍କ ଘର ସିମୁଳିଆରେ। ତେବେ ୧୯୮୪ରୁ ସପରିବାର ବାଲେଶ୍ୱର ସହରକୁ ଚାଲି ଆସିଥିଲେ। ଆଉ ସେ ଫକୀରମୋହନ ଗୋଲେଇରେ ଏକ ଚା’ ଦୋକାନ ଖୋଲିଲେ। ଆରମ୍ଭରୁ କ୍ଷୀର ଚା’, ବିସ୍କୁଟ ବିକ୍ର କରି ପରିବାର ଚଳାଇ ଆସୁଥିଲେ। ମହାମାରୀ କରୋନା ପାଇଁ ଲକ୍ଡାଉନ୍ ତାଙ୍କର ଜୀବିକାକୁ ଏକ ପ୍ରକାର ଶକ୍ତ ପ୍ରହାର ଦେଇଥିଲା। ତେବେ ଲକ୍ଡାଉନ ପରେ ଦୋକାନ ଖୋଲିଥିଲେ, ମାତ୍ର ବିକ୍ରି ହୋଇ ନ ଥିଲା କ୍ଷୀର ଚା’। ଲୋକମାନେ ନାଲି ଚା’ ପିଇବା ପାଇଁ ଆଗ୍ରହ ପ୍ରକାଶ କରିଥିଲେ। ଏହି ସମୟରେ ହର୍ବାଲ ଚା’ କଥା ମନୁଭାଇଙ୍କ ମୁଣ୍ଡକୁ ଢୁକିଥିଲା। ଜୀବିକାକୁ ବଞ୍ଚାଇବା ସହ ଲୋକଙ୍କ ସେବା କିପରି କରିବେ ସେଥିପାଇଁ କେତେକ ଆୟୁର୍ବେଦିକ ବହିରୁ ଉପାୟ ଖୋଜିଥିଲେ। ପରେ ବିଭିନ୍ନ ଆୟୁର୍ବେଦିକ ଚେରମୂଳି ଏକାଠି କରି ଭାଗମାପ ସମାନ ରଖି ପ୍ରସ୍ତୁତ କରିଥିଲେ ହର୍ବାଲ ଚା’। ତେବେ ଗ୍ରାହକ ଏହି ଚା’କୁ ପସନ୍ଦ କଲେ। ଆଉ ଚାହିଦା ମଧ୍ୟ ଦିନକୁ ଦିନ ବଢ଼ିବାରେ ଲାଗିଲା। ଦିନକୁ ଏବେ ପ୍ରାୟ ୨ଶହରୁ ଅଧିକ କପ୍ ଚା’ ବିକ୍ରି ହେଉଥିବା କୁହନ୍ତି ସେ। ସକାଳ ୭ରୁ ରାତି ୧୦ଟା ପର୍ଯ୍ୟନ୍ତ ଦୋକାନ ଖୋଲା ରହୁଛି। ମନୁଭାଇ କୁହନ୍ତି,‘ଏବେ ଯାହା ମିଳୁଛି ଶାନ୍ତିରେ ପରିବାର ଭରଣପୋଷଣ କରିପାରୁଛି। ’
