ଚାନ୍ଦବାଲି,୩।୮(କିଷାନ ପାତ୍ର): ଭାଜପା ରାଜ୍ୟ ସଭାପତି ମନମୋହନ ସାମଲ ସୋମବାର ଭଦ୍ରକ ଜିଲାର ବନ୍ୟା ପ୍ରଭାବିତ ଚାନ୍ଦବାଲି ଅଞ୍ଚଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଖେରଙ୍ଗ ଓ ମାଧପୁର ପଞ୍ଚାୟତ ସମେତ ବିଭିନ୍ନ ବନ୍ୟା ପ୍ରଭାବିତ ଗାଁ ବୁଲି ଲୋକଙ୍କ ସହ ଆଲୋଚନା କରିବା ସହ ବନ୍ୟା ବିପନ୍ନଙ୍କ ସମସ୍ୟା ବୁଝିଥିଲେ। ଏହା ସହ ଚାଷୀଙ୍କ କ୍ଷୟକ୍ଷତିର ଆକଳନ କରି ସରକାରଙ୍କ ପକ୍ଷରୁ ଆବଶ୍ୟକ ସହାୟତା ଯୋଗାଇ ଦିଆଯିବା ନେଇ ସେ ପ୍ରକାଶ କରିଛନ୍ତି।
ଏପରିକି ସଭାପତି ସାମଲ ଚାନ୍ଦବାଲି ବ୍ଲକର ଖେରଙ୍ଗ ଓ ମାଧପୁର, ଘଟପୁର ପଞ୍ଚାୟତର ବିଭିନ୍ନ ବନ୍ୟା ପ୍ରଭାବିତ ଗ୍ରାମ ପରିଦର୍ଶନ କରିଥିଲେ। ବନ୍ୟା ପାଣି ଘେରରେ ରହିଥିବା ଲୋକଙ୍କ ସହ କଥା ହୋଇ ସେମାନଙ୍କ ସମସ୍ୟା ଓ ଆବଶ୍ୟକତା ସମ୍ପର୍କରେ ଅବଗତ ହୋଇଥିଲେ। ବନ୍ୟା ଯୋଗୁ ଚାଷ ଜମିରେ ହୋଇଥିବା କ୍ଷତି, ପାନୀୟ ଜଳ ସଙ୍କଟ, ରାସ୍ତାଘାଟର ଅବସ୍ଥା ଏବଂ ସ୍ବାସ୍ଥ୍ୟସେବା ସମ୍ପର୍କରେ ଲୋକଙ୍କ ସହ ଆଲୋଚନା କରିଥିଲେ।
ଗଣମାଧ୍ୟମକୁ ପ୍ରତିକ୍ରିୟା ଦେଇ ସଭାପତି ସାମଲ କହିଛନ୍ତି, ବନ୍ୟା ପ୍ରଭାବିତ ଅଞ୍ଚଳରେ ରାସ୍ତାଘାଟର ମରାମତି, ବିଶୁଦ୍ଧ ପାନୀୟ ଜଳ ଓ ଆବଶ୍ୟକ ମେଡିକାଲ ସୁବିଧା ଯଥାଶୀଘ୍ର ଯୋଗାଇ ଦେବା ସହ ଚାଷୀଙ୍କ କ୍ଷତିପୂରଣ ଓ ସହାୟତା ପାଇଁ ସରକାର ତ୍ୱରିତ ପଦକ୍ଷେପ ନେବେ।
ଅନ୍ୟମାନଙ୍କ ମଧ୍ୟରେ ଭଦ୍ରକ ବିଧାୟକ ସୀତାଂଶୁ ଶେଖର ମହାପାତ୍ର, ଜିଲା ସଭାପତି ଭଗବାନ ପଣ୍ଡା, ସାଧାରଣ ସମ୍ପାଦକ କମଳାକାନ୍ତ ସୂତାର,ରାଜ୍ୟ କୃଷକ ମୋର୍ଚ୍ଚା ସଂଯୋଜକ ଉପେନ୍ଦ୍ର କୁମାର ରାଉଳ, ଜିଲା ମହିଳା ମୋର୍ଚ୍ଚା ସମ୍ପାଦିକା ସାଗତିକା ପଲାଇ,ଜିଲା କୃଷକ ମୋର୍ଚ୍ଚା ସଭାପତି ଅଶୋକ ରାଉଳ, ପୂର୍ଣ୍ଣଚନ୍ଦ୍ର ପାଣି, ପ୍ରଶାନ୍ତ ମାଝୀ, ରବୀନ୍ଦ୍ର ଦାସ, ପ୍ରତାପ ରାୟ,ସନାତନ ସାହୁ, ଅମୁଲ୍ୟ ବିଶ୍ୱାଳ,ଜଗନ୍ନାଥ ରାଉତ, ସରପଞ୍ଚ ଭାରତୀ ବିଶ୍ୱାଳ, ସମିତି ସଭ୍ୟ ଅଭୟ ବଳ,ସୁଶାନ୍ତ ପୁହାଣ, ବିଜୟ ବେହେରା, ବିଶ୍ୱଜିତ ବିଶ୍ୱାଳ, କିଷାନ ପାତ୍ର ପ୍ରମୁଖ ଉପସ୍ଥିତ ଥିଲେ।
