ଓ୍ବାଶିଂଟନ,୧୩।୧୧: ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କ ନୂତନ ପୁସ୍ତକ ‘ଏ ପ୍ରମିଜଡ୍ ଲ୍ୟାଣ୍ଡ୍’ ଏବେ ବେଶ୍ ଚର୍ଚ୍ଚାରେ ରହିଛି। ଓବାମାଙ୍କ ନୂତନ ପୁସ୍ତକରେ କେରଳର ୱାୟାନାଡର ଲୋକସଭା ଏମ୍ପି ତଥା କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିଷୟରେ ଉଲ୍ଲେଖ କରିଛନ୍ତି। ସେ ଲେଖିଛନ୍ତି, ରାହୁଲ ଗାନ୍ଧୀ ଜଣେ ଅପରିପକ୍ୱ ବ୍ୟକ୍ତି। ଉଦାହରଣ ସ୍ବରୂପ, କିଛି ଛାତ୍ର ଅଛନ୍ତି, ଯେଉଁମାନେ ସେମାନଙ୍କ ପାଠ୍ୟକ୍ରମ ସମାପ୍ତ କରି ନିଜ ଶିକ୍ଷକଙ୍କୁ ପ୍ରଭାବିତ କରିବାକୁ ଆଗ୍ରହୀ ଅଟନ୍ତି, କିନ୍ତୁ ଏହି ବିଷୟଗୁଡିକରେ ଗୁରୁ ହେବା ପାଇଁ ତାଙ୍କର ଦକ୍ଷତା କିମ୍ବା ଉତ୍ସାହର ଅଭାବ ରହିଥାଏ। ରାହୁଲ ସେମିତି ଜଣେ ବ୍ୟକ୍ତି। ସେହିପରି ଓବାମା ତାଙ୍କ ପୁସ୍ତକରେ ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ବିଷୟରେ ମଧ୍ୟ ଲେଖିଛନ୍ତି। ସେ ମନମୋହନଙ୍କ ବିଷୟରେ ଲେଖିଛନ୍ତି ସେ ଜଣେ ନିଷ୍ଠାପର ବ୍ୟକ୍ତି। ଏହାସହ ଓବାମା ନିଜ ପୁସ୍ତକରେ ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବାଇଡେନଙ୍କୁ ଜଣେ ଯୋଗ୍ୟ ବ୍ୟକ୍ତି ଭାବରେ ବର୍ଣ୍ଣନା କରିଛନ୍ତି। ନ୍ୟୁୟର୍କ ଟାଇମ୍ସ ପୁସ୍ତକ ସମୀକ୍ଷା ଅନୁଯାୟୀ ବାରାକ ଓବାମାଙ୍କ ନୂତନ ପୁସ୍ତକ ‘ଏ ପ୍ରମିଜଡ୍ ଲ୍ୟାଣ୍ଡ୍’ ତାଙ୍କ ବ୍ୟକ୍ତିଗତ ଜୀବନ ଅପେକ୍ଷା ରାଜନୈତିକ ଆଭିମୁଖ୍ୟ ଉପରେ ଅଧିକ ଧ୍ୟାନ ଦେଇଥାଏ। ରାଜନୀତିରେ ତାଙ୍କର ପ୍ରଥମ ଦିନରୁ ପାକିସ୍ତାନର ଏବଟ୍ଟାବାଦରେ ଓସାମା ବିନ ଲାଦେନଙ୍କ ହତ୍ୟା ପର୍ଯ୍ୟନ୍ତ ଲେଖିଛନ୍ତି। ଏହା ପୂର୍ବରୁ ‘ଡ୍ରିମ୍ସ ଫର୍ମ ମାଇ ଫାଦର’, ‘ଦ ଅଡେସିଟୀ ଅଫ୍ ହୋପ’ଭଳି ଅନେକ ପୁସ୍ତକ ଓବାମା ଲେଖିଛନ୍ତି।
