ନୂଆଦିଲ୍ଲୀ,୧୭।୫ : ଆସନ୍ତା ବର୍ଷ ଇଣ୍ଡିଆନ ପ୍ରିମିୟର ଲିଗ୍ର ୧୫ତମ ସଂସ୍କରଣ ପାଇଁ ଦୁଇଟି ନୂଆ ଫ୍ରାଞ୍ଚାଇଜକୁ ସାମିଲ କରାଯାଇପାରେ। ଆଇପିଏଲର ବୃଦ୍ଧି ହୋଇଥିବାରୁ ବିଦେଶୀ ଖେଳାଳିଙ୍କ ନିୟମରେ ପରିବର୍ତ୍ତନ ସପକ୍ଷରେ ମତ ବାଢ଼ିଛନ୍ତି ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ସଞ୍ଜୟ ମାଞ୍ଜରେକର। ବର୍ତ୍ତମାନ ନିୟମ ଅନୁସାରେ, ଚୂଡ଼ାନ୍ତ ଏକାଦଶରେ ୪ ବିଦେଶୀ ଖେଳାଳି ସାମିଲ ହୋଇପାରିବେ। ଏଥି ଯୋଗୁ ବହୁ ପ୍ରତିଭାଶାଳୀ ବିଦେଶୀ କ୍ରିକେଟରଙ୍କୁ ସୁଯୋଗ ମିଳୁନାହିଁ।
ଆଇପିଏଲରେ ଦଳ ସଂଖ୍ୟା ୧୦କୁ ବୃଦ୍ଧି ହେଉଥିବାରୁ ଚୂଡ଼ାନ୍ତ ଏକାଦଶରେ ୫ ବିଦେଶୀ ଖେଳାଳିଙ୍କୁ ସୁଯୋଗ ଦିଆଯାଇପାରେ। ଦଳ ସଂଖ୍ୟା ବଢ଼ିଲେ ୬୦ ଭାରତୀୟ ଖେଳାଳି ୨୦୨୨ ଆଇପିଏଲରେ ଖେଳିବାକୁ ସୁଯୋଗ ପାଇବେ। ଆଉ ମୋ ମତରେ ଏହା ଯଥେଷ୍ଟ। ଆଇପିଏଲ ଯୋଗୁ ବହୁ ଭାରତୀୟ ଖେଳାଳି ସାମ୍ନାକୁ ଆସିଛନ୍ତି। କିନ୍ତୁ ନିୟମ ଯୋଗୁ ପ୍ରତିଭାଶାଳୀ ବିଦେଶୀ ଖେଳାଳିଙ୍କୁ ସୁଯୋଗ ନ ମିଳିବା ଲଜ୍ଜାର ବିଷୟ। ତେବେ ଏହା ଇଣ୍ଡିଆନ ପ୍ରିମିୟର ଲିଗ୍ ହୋଇଥିବାରୁ ଅଧିକରୁ ଅଧିକ ଭାରତୀୟ ଖେଳାଳିଙ୍କୁ ଖେଳାଇବା ଦରକାର ନାହିଁ ବୋଲି ଇଏସ୍ପିଏନ୍କ୍ରିକଇନ୍ଫୋ ସହ ଆଲୋଚନାବେଳେ ମାଞ୍ଜରେକର କହିଛନ୍ତି।
