ନୂଆଦିଲ୍ଲୀ: ଫିଲ୍ମ ‘ଜଙ୍ଗଲ ବୁକ୍’ରେ ବେଶ୍ ଲୋକପ୍ରିୟ ହୋଇଥିଲା ମୋଗଲି ଚରିତ୍ର। ଜଙ୍ଗଲରେ ରହିବା ସହ ପଶୁପକ୍ଷୀଙ୍କ ମଧ୍ୟରେ ସମୟ ବିତାଉଥିବାକୁ ନେଇ ଚଳଚ୍ଚିତ୍ରର କାହାଣୀ ଗତିଶୀଳ ହୋଇଥିଲା। ହେଲେ ବାସ୍ତବରେ ମୋଗଲୀଙ୍କୁ ଦେଖିବାକୁ ଚାହାନ୍ତି ଯଦି ଆପଣଙ୍କୁ ପୂର୍ବ ଆଫ୍ରିକାର ରଓ୍ବାଣ୍ଡା ଯିବାକୁ ହେବ। ସେଠାରେ ରୁହନ୍ତି ୨୧ ବର୍ଷୀୟ ଏଲି। ସେ ମାଇକ୍ରୋସେଫଲି ନାମକ ରୋଗରେ ପୀଡ଼ିତ। ଫଳରେ ତାଙ୍କର ମୁଣ୍ଡ ସାଧାରଣ ମନୁଷ୍ୟଠାରୁ ବଡ଼। ପିଲାଦିନୁ ଏଲିଙ୍କୁ ଏହି ରୋଗ ହୋଇଛି। ଫଳରେ ସେ ଅନ୍ୟମାନଙ୍କଠାରୁ ଅଲଗା ଦେଖାଯାଇଥାନ୍ତି। ତାଙ୍କୁ ଦେଖିବାରେ ଓ ଶୁଣିବାରେ ଅସୁବିଧା ହେବା ଯୋଗୁ ସେ କେବେ ସ୍କୁଲ ଯାଇନାହାନ୍ତି। ଲୋକମାନେ ତାଙ୍କ ବିଷୟରେ ଅଜବ କଥା କହିବା ସହ ଅଶୋଭନୀୟ ବ୍ୟବହାର କରିଥାନ୍ତି। ଫଳରେ ସେ ନିଜର ଅଧିକାଂଶ ସମୟ ଜଙ୍ଗଲରେ ଏକାକି ବିତାଇଥାନ୍ତି। ଏଣୁ ତାଙ୍କୁ ଗାଁ ସହ ଆଖପାଖର ଲୋକେ ‘ମୋଗଲୀ’ ବୋଲି ଡାକିଥାନ୍ତି। ଜଙ୍ଗଲରେ ରହିବା ସମୟରେ ସେ ଅନେକ କଥା ଶିଖିଛନ୍ତି। ଦୀର୍ଘ କିଲୋମିଟର ପର୍ଯ୍ୟନ୍ତ ସେ ଏକାକି ଚାଲିପାରନ୍ତି। ଏହାଛଡ଼ା ବଡ଼ ବଡ଼ ଗଛ ଉପରେ ଆଖି ପିଛୁଳାକେ ଚଢ଼ିଯାଆନ୍ତି। ଏବେ ଏଲିଙ୍କ ଜୀବନକାହାଣୀ ସର୍ବସମ୍ମୁଖକୁ ଆସିବା ପରେ ଲୋକମାନେ ତାଙ୍କ ସହାୟତା ପାଇଁ ଆଗକୁ ଆସୁଛନ୍ତି। ଏଯାବତ ୨.୯୨ ଲକ୍ଷରୁ ଅଧିକ ଟଙ୍କା ଜମା କରାଯାଇଥିବା ଜଣାପଡ଼ିଛି।
ଦେଖନ୍ତୁ ଭିଡିଓ:
