କରାଚି,୧୬ା୧: କରାଚିର ଗୁଲଶନ-ଇ-ଇକ୍ବଲରେ ଏକ ଲୋମହର୍ଷଣକାରୀ ଘଟଣା ଦେଖିବାକୁ ମିଳିଛି। ଜଣେ ବ୍ୟକ୍ତି ତାଙ୍କ ୬ ପିଲାଙ୍କ ଆଗରେ ସ୍ତ୍ରୀଙ୍କୁ ମାରି କଡ଼େଇରେ ସିଝାଇବା ପରି ଅତ୍ୟନ୍ତ ଅମାନବିକ ଦୃଶ୍ୟ ଦେଖିବାକୁ ମିଳିଛି।
ଗୁଲଶନ-ଇ-ଇକ୍ବଲର ବ୍ଲକ ୪ରେ ଥିବା ଏକ ଘରୋଇ ବିଦ୍ୟାଳୟର ଜଗୁଆଳି ଭାବରେ ଆଶିକ୍ ନାମକ ଜଣେ ବ୍ୟକ୍ତି କାମ କରନ୍ତି। ସେ ତାଙ୍କ ସ୍ତ୍ରୀ ଏବଂ ୬ ପିଲାଙ୍କ ସହ ବିଦ୍ୟାଳୟର ସେବକ କ୍ୱାର୍ଟରରେ ରହୁଥିଲେ। ଆଶିକ ପ୍ରତିଦିନ ମଦ ପିଇବା ସହ ସ୍ତ୍ରୀଙ୍କୁ ଅନ୍ୟ ପୁରୁଷଙ୍କ ସହ ସମ୍ପର୍କ ରଖିବାକୁ ବାଧ୍ୟ କରୁଥିଲେ। ଏଥିରେ ନର୍ଗିସ ଅରାଜି ହେବାରୁ ପାଟିତୁଣ୍ଡ ଲାଗୁଥିଲା। ଗତ ବୁଧବାର ରାତିରେ ଆଶିକ ପ୍ରଚୁର ମଦ ପଇ ସ୍ତ୍ରୀ ନର୍ଗିସଙ୍କ ସହ ଝଗଡ଼ା କରିଥିଲେ। ଏଥିରେ ଉତ୍କ୍ଷିପ୍ତ ହୋଇ ଆଶିକ ନର୍ଗିସଙ୍କ ମୁହଁରେ ତକିଆ ପକାଇ ମାରିଦେବା ସହ ରୋଷେଇ ଘରେ ଥିବା ଏକ କଡ଼େଇରେ ତାଙ୍କ ମୃତଦେହକୁ ସିଝାଇ ଥିଲେ। ଏହାକୁ ଦେଖି ନେଇଥିଲେ
ନର୍ଗିସଙ୍କ ୧୫ ବର୍ଷୀୟା ଝିଅ। ସେ ସଙ୍ଗେ ସଙ୍ଗେ ପୋଲିସ ହେଲ୍ପଲାଇନ ନମ୍ବରରେ ଡାଏଲ କରିବା ପରେ ମୋବିନା ଟାଉନ ପୋଲିସ ବିଦ୍ୟାଳୟରେ ପହଞ୍ଚିଥିଲା। ସେତେବେଳକୁ ଆଶିକ ୩ ପିଲାଙ୍କୁ ନେଇ ଫେରାର ହୋଇଯାଇଥିଲେ। ଅନ୍ୟ ୩ ପିଲା ପୋଲିସ ହେପାଜତରେ ଅଛନ୍ତି। ଅଭିଯୁକ୍ତଙ୍କୁ ଗିରଫ କରିବା ପାଇଁ ପୋଲିସ ଏକ ମାମଲା ରୁଜୁ କରିଛି। ଜଣେ ପୋଲିସ ଅଧିକାରୀ କହିଛନ୍ତି, ଅଭିଯୁକ୍ତଙ୍କ ଫୋନ୍ ବନ୍ଦ ଅଛି। ତାଙ୍କୁ ଖୋଜା ଚାଲିଛି। ଖୁବ୍ଶୀଘ୍ର ଗିରଫ କରାଯିବ।
