ନୂଆଦିଲ୍ଲୀ, ୧।୨: ପଶ୍ଚିମବଙ୍ଗ ଜନସାଧାରଣଙ୍କ ପ୍ରତି ମମତା ବାନାର୍ଜୀ ଅନ୍ୟାୟ କରିଛନ୍ତି। ତେଣୁ ବହୁସଂଖ୍ୟାରେ ଟିଏମ୍୍ସି ନେତା ଭାଜପାରେ ଯୋଗ ଦେଉଥିବା ହାଓଡ଼ାଠାରେ ଭାଜପାର ଏକ ରାଲିକୁ ଭର୍ଚୁଆଲି ସମ୍ବୋଧନ କରି ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କହିଛନ୍ତି। ଟିଏମ୍ସି ସମେତ ଅନ୍ୟ ଦଳର ନେତାମାନେ ଭାଜପାରେ ସାମିଲ ହେଉଛନ୍ତି। ନିର୍ବାଚନ ବେଳକୁ ମମତା ଦିଦି ଏକା ହୋଇଯାଇଥିବେ। ମୋଦି ସରକାର ‘ଜନ କଲ୍ୟାଣ’ ପାଇଁ କାର୍ଯ୍ୟ କରୁଥିବାବେଳେ ମମତା ବାନାର୍ଜୀଙ୍କ ସରକାର ପୁତୁରା କଲ୍ୟାଣ ପାଇଁ କାର୍ଯ୍ୟ କରୁଥିବା ସ୍ବରାଷ୍ଟ୍ରମନ୍ତ୍ରୀ ଅଭିଯୋଗ କରିଥିଲେ। ତୃଣମୂଳ କଂଗ୍ରେସର ଡାଇମଣ୍ଡ ହାର୍ବର ଏମ୍ପି ଅଭିଷେକ ବାନାର୍ଜୀଙ୍କୁ ଲକ୍ଷ୍ୟ କରି ଶାହା ଏଭଳି କହିଥିଲେ। ଆଗାମୀ ବିଧାନସଭା ନିର୍ବାଚନକୁ ଆଖି ଆଗରେ ରଖି ଭାଜପାର କେନ୍ଦ୍ରୀୟ ନେତୃବୃନ୍ଦ ବାରମ୍ବାର ପଶ୍ଚିମବଙ୍ଗ ଗସ୍ତରେ ଆସୁଛନ୍ତି। ଶାହା ଦୁଇଦିନିଆ ଗସ୍ତରେ ଆସିବା କାର୍ଯ୍ୟକ୍ରମ ଥିଲେ ହେଁ କୃଷକ ଆନ୍ଦୋଳନ ଓ ଦିଲ୍ଲୀରେ ବିସ୍ଫୋରଣ ଯୋଗୁ ଶେଷ ମୁହୂର୍ତ୍ତରେ ତାଙ୍କ ଗସ୍ତକୁ ବାତିଲ କରିଦିଆଯାଇଥିଲା। ତାଙ୍କ ବଦଳରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ରାଲିରେ ଯୋଗ ଦେଇଥିଲେ।
ବାମଦଳ ଶାସନଠାରୁ ବର୍ତ୍ତମାନର ପଶ୍ଚିମବଙ୍ଗ ସ୍ଥିତି ଆହୁରି ଖରାପ। ଇରାନୀ ରାଜ୍ୟର ମମତା ବାନାର୍ଜୀ ସରକାରଙ୍କୁ ସମାଲୋଚନା କରିଥିଲେ। ଏହି ସରକାର ଦୁର୍ନୀତିରେ ଲିପ୍ତ ରହିଛି। ମହାମାରୀ ସମୟରେ କେନ୍ଦ୍ର ସରକାର ଦେଶର ୮୦ କୋଟି ଜନସାଧାରଣଙ୍କ ପାଇଁ ମାଗଣା ଖାଦ୍ୟଶସ୍ୟ ଯୋଗାଇଥିଲେ। ପଶ୍ଚିମବଙ୍ଗର ଶାସକ ଦଳ ଏହି ରାଶନକୁ ହଡ଼ପ କରିଥିବା ସ୍ମୃତି ଅଭିଯୋଗ କରିଛନ୍ତି। ମମତାଙ୍କ ଦଳ ଅନ୍ତର୍ଦ୍ୱନ୍ଦ୍ୱକୁ ସମର୍ଥନ କରୁଛି ଏବଂ ‘ଜୟ ଶ୍ରୀରାମ’ ସ୍ଲୋଗାନକୁ ଅପମାନିତ କରୁଛି। ଏହି ଦଳରେ କେହି ରହିପାରିବେ ନାହିଁ ବୋଲି ଇରାନୀ କହିଥିଲେ। ନରେନ୍ଦ୍ର ମୋଦିଙ୍କ ଶାସନ କାଳରେ ରାମ ମନ୍ଦିର ନିର୍ମାଣ ହେବା ସହ ବେଙ୍ଗଲକୁ ରାମ ରାଜ୍ୟ ଖୁବ୍ଶୀଘ୍ର ଆସୁଛି ବୋଲି ସେ କହିଥିଲେ।
ନିକଟରେ ଭାଜପାରେ ଯୋଗଦେଇଥିବା ପୂର୍ବତନ ଟିଏମ୍ସି ନେତା ରାଜୀବ ବାନାର୍ଜୀ, ବୈଶାଳୀ ଡାଲମିଆ, ପ୍ରବୀର ଘୋଷାଲ, ରାଠିନ୍ ଚକ୍ରବର୍ତ୍ତୀ ଏବଂ ରୁଦ୍ରନିଲ୍ ଘୋଷ ରାଲିରେ ଯୋଗଦେଇଥିଲେ। ପଶ୍ଚିମବଙ୍ଗ ଭାଜପା ଉପସଭାପତି ମୁକୁଲ ରାୟ, ଦଳର ସାଧାରଣ ସମ୍ପାଦକ କୈଳାସ ବିଜୟଭର୍ଗୀୟ ପ୍ରମୁଖ ଡୁମୁରଜାଲା ଷ୍ଟାଡିୟମ ରାଲିରେ ଉପସ୍ଥିତ ଥିଲେ। ପଶ୍ଚିମବଙ୍ଗରେ ଆମେ ଡବଲ୍ ଇଞ୍ଜିନ୍ ସରକାର ଚାହୁଁ ବୋଲି ରାଜୀବ ବାନାର୍ଜୀ କହିଥିଲେ। ସୋନାର ବାଙ୍ଗ୍ଲା ପାଇଁ ଉଭୟ କେନ୍ଦ୍ର ଓ ରାଜ୍ୟରେ ଭାଜପା ସରକାର ଆବଶ୍ୟକ। ଟିଏମ୍ସି ଏକ ଦଳ ନୁହେଁ ଏକ ଘରୋଇ ଲିମିଟେଡ କମ୍ପାନୀ। ଫେବୃୟାରୀ ୨୮ ବେଳକୁ ମମତାଙ୍କ ଦଳରେ କେହି ନେତା ନ ଥିବେ ବୋଲି ଭାଜପାରେ ଯୋଗଦେଇଥିବା ପୂର୍ବତନ ଟିଏମ୍ସି ନେତା ଶୁଭେନ୍ଦୁ ଅଧିକାରୀ କହିଥିଲେ। ଆଗାମୀ ଏପ୍ରିିଲ-ମେ’ରେ ପଶ୍ଚିମବଙ୍ଗ ବିଧାନସଭା ନିର୍ବାଚନ ହେବାକୁ ଥିବାବେଳେ ଭାଜପା କ୍ଷମତାକୁ ଆସିବା ଲାଗି ଜୋର୍ଦାର ପ୍ରଚାର ଚଳାଇଛି।
