ଇସ୍ଲାମାବାଦ,୨୦ ।୯: ପାକିସ୍ତାନର ଶିକ୍ଷାକର୍ମୀ ତଥା ନୋବେଲ ବିଜେତା ମଲାଲା ୟୁସୁଫଜାଇ ଚେତାବନୀ ଦେଇ କହିଛନ୍ତି କରୋନା ଭାଇରସ ଭଳି ମହାମାରୀ ସଂକ୍ରମଣ ଶେଷ ହେବା ପରେ ବି ବିଶ୍ୱରେ ପାଖାପାଖି ୨ କୋଟି କନ୍ୟା ସ୍କୁଲ ଯିବାରୁ ବଞ୍ଚିତ ହେବେ । ପାକିସ୍ତାନ ଖବରକାଗଜ ଡନର ସୂଚନା ଅନୁଯାୟୀ, ଶୁକ୍ରବାର ୟଏନ୍ ଜେନରାଲ ଆସେମ୍ଲିର ଏକ ସାଇଡଲାଇନ୍ସ ଇଭେଣ୍ଟରେ ମଲାଲା କହିଛନ୍ତି କରୋନା ଭାଇରସ ସଂକ୍ରମଣ ସରିବା ପରେ ବି ପାଖାପାଖି ୨ କୋଟି ବା ୨୦ ମିଲିୟନରୁ ଅଧିକ କନ୍ୟା କେବେବି ସ୍କୁଲ ଯାଇ ପାରିବେ ନାହିଁ । କାରଣ କରୋନା ଭାଇରସ ଆମ ସାମୁହିକ ଲକ୍ଷ୍ୟ ଯେପରିକି ମହିଳାଙ୍କୁ ଶିକ୍ଷିତ କରିବା ଆଦିକୁ ବଡ ଝଟ୍କା ଦେଇଛି । ସେ କହିଛନ୍ତି ବିଶ୍ୱ ଶିକ୍ଷା ପାଣ୍ଠି ବ୍ୟବଧାନ ପ୍ରତିବର୍ଷ ୨ଶହ ବିଲିୟନ ଡଲାରକୁ ବୃଦ୍ଧି ପାଇଛି । ମଲାଲା ଅନ୍ତର୍ଜାତୀୟ ସମୁଦାୟକୁ ମନେପକାଇ ଦେଇଛନ୍ତି ଯେ ପାଞ୍ଚ ବର୍ଷ ପୂର୍ବେ ଜାତିସଂଘ ଲକ୍ଷ ଲକ୍ଷ ବାଳିକାଙ୍କ ଭବିଷ୍ୟତ ସ୍ଥିର କରିଥିଲା । ଯେଉଁମାନେ ଶିକ୍ଷା ଚାହୁଁଥିଲେ ଓ ସମାନତା ପାଇଁ ଲଢୁଥିଲେ । ହେଲେ ଗତ ୫ ବର୍ଷରେ କିଛି କରାଯାଇ ନ ଥିବା ମଲାଲା କହିଛନ୍ତି । ଗତମାସରେ ଜାତିସଂଘ ଦ୍ୱାରା ଜାରି କରାଯାଇଥିବା ଏକ ରିପୋର୍ଟ ଅନୁଯାୟୀ, କରୋନା ମହାମାରୀ ଇତିହାସରେ ଶିକ୍ଷା ପ୍ରଣାଳୀରେ ସବୁଠାରୁ ଅଧିକ ବ୍ୟବଧାନ ସୃଷ୍ଟି କଲା । ଯେଉଁଥିରେ ୧୯୦ ଦେଶ ଓ ସମସ୍ତ ମହାଦ୍ୱୀପରେ ପାଖାପାଖି ୧.୬ ଅରବ ଶିକ୍ଷାର୍ଥୀ ପ୍ରଭାବିତ ହୋଇଛନ୍ତି । ସ୍କୁଲ ଓ ଅନ୍ୟ ଶିକ୍ଷା ପ୍ରତିଷ୍ଠାନ ବନ୍ଦ ହେବା ଫଳରେ ବିଶ୍ୱରେ ପାଖାପାଖି ୯୪ ପ୍ରତିଶତ ଶିଡକ୍ଷାର୍ଥୀ ପ୍ରଭାବିତ ହୋଇଛନ୍ତି । ଯାହାକୁ ନିମ୍ନ ଓ ନିମ୍ନ ମଧ୍ୟବିତ୍ତ ଦେଶରେ ୯୯ ପ୍ରତିଶତ ବୋଲି ସେ କହିଛନ୍ତି ।
