ଏମ୍ଭି ୭୯,୧୯ା୪(ଡି.ଏନ.ଏ.): ଦିନେ ଜାତୀୟ ସ୍ତରର କ୍ରୀଡ଼ା ପ୍ରତିଯୋଗିତାରେ ତୀରନ୍ଦାଜୀରେ ଦେଶ ତଥା ରାଜ୍ୟ ପାଇଁ ରୌପ୍ୟ ପଦକ ଜିତି ସେ ଆଣିଥିଲେ ଗୌରବ। ଆଗକୁ ବଢ଼ିବାର ସ୍ବପ୍ନ ଓ ଲକ୍ଷ୍ୟ ଥିଲେ ମଧ୍ୟ ଅଭାବ ଓ ଦାରିଦ୍ର୍ୟ ତାଙ୍କ ପାଇଁ ସାଜିଲା ପ୍ରତିବନ୍ଧକ। ସରକାରୀ ସ୍ତରରେ ତାଙ୍କୁ କୌଣସି ସହାୟତା ନ ମିଳିବାରୁ ଏବେ ନିଜ ପାଇଁ ଦାନା ସଂଗ୍ରହ କରିବା ଏହି କ୍ରୀଡ଼ାବିତ୍ଙ୍କ ପାଇଁ ହୋଇପଡିଛି କଷ୍ଟକର। ଏପରି ପରିସ୍ଥିତିରେ ତୀରନ୍ଦାଜୀଠାରୁ ଦୂରେଇ ରହିବାକୁ ବାଧ୍ୟ ହୋଇଛନ୍ତି ଏହି ଖେଳାଳି। ସେ ହେଲେ ମାଲକାନଗିରି ଜିଲା କାଲିମେଳା ବ୍ଲକ ଅନ୍ତର୍ଗତ ମାଲାବରମ ଗ୍ରାମର ଏରା ତାତି।
୧୫ ବର୍ଷର ଏହି ଆଦିବାସୀ ଯୁବକ ଏରା ୨୦୧୯-୨୦ରେ ମଧ୍ୟ ପ୍ରଦେଶର ଉଜ୍ଜୟିନୀ ଠାରେ ବିଦ୍ୟାଳୟ ସ୍ତରର ଛାତ୍ରୀଛାତ୍ରଙ୍କ ପାଇଁ ହୋଇଥିବା ଜାତୀୟ ସ୍ତରର ତୀରନ୍ଦାଜୀ ପ୍ରତିଯୋଗିତାରେ ଅଂଶଗ୍ରହଣ କରି ରୌପ୍ୟ ପଦକ ଜିତିଥିଲେ। ତାଙ୍କର ଏହି ସଫଳତା ପାଇଁ ସେତେବେଳେ ତାଙ୍କୁ ବେଶ୍ ପ୍ରଶଂସା ମିଳିଥିଲା ସତ; ମାତ୍ର ଆଗକୁ ବଢ଼ିବା ନେଇ ତାଙ୍କ ମନରେ ଥିବା ଇଚ୍ଛା ଆଗ୍ରହକୁ କେହି ଗୁରୁତ୍ୱ ଦେଇ ନ ଥିଲେ। ଏରାଙ୍କ ବାପା ବୋଜା ତାତି ୮ବର୍ଷ ତଳେ ଆନ୍ଧ୍ର ପ୍ରଦେଶ କାମ କରିବାକୁ ଯାଇ ଏପର୍ଯ୍ୟନ୍ତ ନିଖୋଜ ଅଛନ୍ତି। ରୋଗଗ୍ରସ୍ତ ମା’ ଜିଇ ତାତିଙ୍କ ଗତ ୩୧ ତାରିଖରେ ମୃତ୍ୟୁ ଘଟିଛି। ଫଳରେ ଏରାଙ୍କ ସହ ଭଉଣୀ ଭିମେ ଓ ସାନଭାଇ ଗଙ୍ଗା ତାତି ଏବେ ଅସହାୟ ହୋଇପଡିଛନ୍ତି। ଜଙ୍ଗଲରୁ ମହୁଲ ଗୋଟାଇ ଏହାକୁ ନିକଟସ୍ଥ ବଜାରରେ ବିକ୍ରିକରି ପରିବାର ଚଳାଉଛନ୍ତି ଏରା। ପ୍ରତ୍ୟହ ଦିଓଳି ଖାଇବା ଯୋଗାଡ଼ କରିବା ଏହି ଭଉଣୀଭାଇଙ୍କ ପାଇଁ ହୋଇଯାଉଛି କଷ୍ଟକର। ଏରାଙ୍କ ଭଳି ପ୍ରତିଭାବାନ ତୀରନ୍ଦାଜୀଙ୍କୁ ସୁଯୋଗ ମିଳିଲେ ସେ ଆଗକୁ ନିଶ୍ଚିତ ଆମ ପାଇଁ ଗୌରବ ଆଣିପାରିବେ ଏଥିରେ ସନ୍ଦେହ ନାହିଁ ବୋଲି କହନ୍ତି ସ୍ଥାନୀୟ ଅଞ୍ଚଳର ସରପଞ୍ଚ, ଓ୍ବାର୍ଡମେମ୍ବରଙ୍କ ସହ ଅଞ୍ଚଳବାସୀ। ଏହି ଅସହାୟ ପରିବାରକୁ ଜିଲା ପ୍ରଶାସନ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି।
