କୋଲକାତା,୫।୧୦ : ପଶ୍ଚିମବଙ୍ଗ ଦୁର୍ଗା ପୂଜାରେ ଅଖିଳ ଭାରତୀୟ ହିନ୍ଦୁ ମହାସଭା ଦକ୍ଷିଣ-ପଶ୍ଚିମ କୋଲକାତାର ରୁବି କ୍ରସିଂ ନିକଟରେ ଥିବା ପୂଜା ପେଣ୍ଡାଲରେ ମହିଷାସୁର ବଦଳରେ ମହାତ୍ମା ଗାନ୍ଧୀଙ୍କ ଭଳି ଦେଖାଯାଉଥିବା ମୂର୍ତ୍ତି ରଖାଯାଇଥିଲା। ଜାତିର ପିତାଙ୍କ ପ୍ରତିମୂର୍ତ୍ତି ସ୍ଥାପନକୁ ନେଇ କ୍ରୋଧିତ ହୋଇ ସଂଗଠକଙ୍କୁ ତୁରନ୍ତ ଗିରଫ କରିବାକୁ ଦାବି କରଥିଲେ। ଏଥିପାଇଁ ଲୋକମାନେ ସୋସିଆଲ ମିଡିଆର ସାହାଯ୍ୟ ନେଇ ଶୀଘ୍ର କାର୍ଯ୍ୟାନୁଷ୍ଠାନ ଦାବି କରିଛନ୍ତି।
୪୪ ବର୍ଷିୟ ରତନ ଦେ ଏବଂ ତାଙ୍କ ପୁଅ ଲ୍ୟୁଟନାଟ ତାରାପଦ ଦେ ଏନେଇ ପୋଲିସ ଷ୍ଟେଶନ ଅଭିଯୋଗ କରିଥିଲେ। ସୂଚନାଯୋଗ୍ୟ, ବିଭିନ୍ନ ରାଜନୈତିକ ଦଳଗୁଡ଼ିକର ସମାଲୋଚନା ଏବଂ ପୋଲିସର ହସ୍ତକ୍ଷେପ ପରେ ରବିବାର ସମ୍ପୃକ୍ତ ପେଣ୍ଡାଲରେ ଦୁର୍ଗା ପୂଜାର ଆୟୋଜକମାନେ ନିର୍ଦ୍ଦେଶନାମା ଅନୁଯାୟୀ ମୂର୍ତ୍ତିର ରୂପ ବଦଳାଇଥିଲେ। ହିନ୍ଦୁ ମହାସଭାର କାର୍ଯ୍ୟକାରୀ ସଭାପତି ଚନ୍ଦ୍ରଚୁର ଗୋସ୍ବାମୀ କହିଛନ୍ତି ଯେ ଏହି ପରିବର୍ତ୍ତନ ବାଧ୍ୟତାମୂଳକ ଭାବେ କରାଯାଇଛି। ଗୋସ୍ବାମୀ କହିଛନ୍ତି, ଆମକୁ ଧମକପୂର୍ଣ୍ଣ କଲ ଆସୁଥିଲା। ପୋଲିସ କହିଥିଲା ଯେ ଯଦି ଆମେ ମୂର୍ତ୍ତି ପରିବର୍ତ୍ତନ ନକରିବୁ ତେବେ ସେମାନେ ଆମର ପୂଜା ବନ୍ଦ କରିବେ। ପୋଲିସ ଜବରଦସ୍ତ ମୂର୍ତ୍ତି ଉପରେ ଏକ ୱିଗ ଲଗାଇ ଚଷମା ହଟାଇ ଦେଇଥିଲା କିନ୍ତୁ ଆମର ସଂଗ୍ରାମ ଜାରି ରହିବ।
ହିନ୍ଦୁ ମହାସଭାର ରାଜ୍ୟ ସଭାପତି ସୁନ୍ଦର ଗିରି ଦାବି କରିଛନ୍ତି ଯେ ମହାତ୍ମା ଗାନ୍ଧୀ ଏଭଳି କିଛି କରି ନାହାନ୍ତି ଯେ ତାଙ୍କୁ ମହାତ୍ମା କୁହାଯିବ। ଏହା ଉଲ୍ଲେଖ ଯୋଗ୍ୟ ଯେ ହିନ୍ଦୁ ମହାସଭା ନାଥୁରାମ ଗୋଡସେଙ୍କୁ ଜଣେ ଦେଶପ୍ରେମୀ ବୋଲି ବିବେଚନା କରିଥାନ୍ତି ଏବଂ ଗାନ୍ଧୀ ଜୟନ୍ତୀକୁ ଏକ କଳା ଦିବସ ଭାବେ ପାଳନ କରନ୍ତି।
ରାଜ୍ୟ ଭାଜପା ଅଧ୍ୟକ୍ଷ ସୁକାନ୍ତ ମଜୁମଦାର ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି। ଏହା ଏକ ଲଜ୍ଜାଜନକ ଘଟଣା ଏବଂ ଏହି ପ୍ରକାର କାର୍ଯ୍ୟକୁ ଉତ୍ସାହିତ କରାଯିବା ଉଚିତ ନୁହେଁ ବୋଲି ମଜୁମଦାର କହିଛନ୍ତି। ଟିଏମସିର ରାଜ୍ୟ ସାଧାରଣ ସମ୍ପାଦକ ତଥା ମୁଖପାତ୍ର କୁନାଲ ଘୋଷ କହିଛନ୍ତି ଯେ ଯଦିଓ ଗାନ୍ଧୀଙ୍କୁ ନେଇ ବିବାଦ ଲାଗି ରହିଛି, ତଥାପି ଏଭଳି ଘଟଣାକୁ ଉତ୍ସାହିତ କରାଯିବା ଉଚିତ ନୁହେଁ।
