ମୁମ୍ବାଇ: ବଲିଉଡ ଷ୍ଟାର୍ ଆମିର ଖାଁଙ୍କୁ ରବିବାର ୫୬ ବର୍ଷ ପୂରଣ ହୋଇଛି। ୧୯୬୫ ମାର୍ଚ୍ଚ ୧୪ରେ ସେ ମୁମ୍ବାଇଠାରେ ଜନ୍ମଗ୍ରହଣ କରିଥିଲେ। ୧୯୭୩ରେ ଆଦୋଁ କି ବାରାତ୍ ଫିଲ୍ମରେ ସେ ଶିଶୁ କଳାକାର ଭାବେ ଅଭିନୟ କରିଥିଲେ। ପରେ ୧୯୮୪ରେ ଫିଲ୍ମରେ ହୋଲିରେ ମଧ୍ୟ ଅଭିନୟ କରି ସେ ଦର୍ଶକଙ୍କୁ ବେଶ୍ ଆକର୍ଷିତ କରିପାରିଥିଲେ। ତେବେ ୧୯୮୮ରେ ଫିଲ୍ମ କୟାମତ୍ ସେ କୟାମତ୍ ତକ୍ରେ ଅଭିନୟ କରି ସେ ବଲିଉଡ୍ରେ ଷ୍ଟାର ଭାବେ ଡେବ୍ୟୁ କରିଥିଲେ। ପରବର୍ତ୍ତି ସମୟରେ ବହୁ ଫିଲ୍ମରେ ତାଙ୍କର ଅଭିନୟ ଅତି ଉଚ୍ଚକୋଟୀର ଥିଲା। ଦିଲ୍, ରାଜାହିନ୍ଦୁସ୍ତାନୀ, ସରଫୋରଶ୍, ଲଗାନ୍, ଫନା, ରଙ୍ଗ୍ ଦେ ବସନ୍ତୀ, ଘଜନୀ, ୩ ଇଡିୟଟ୍, ଧୁମ୍-୩, ପିକେ, ଦଙ୍ଗଲ, ତାରେ ଜମିନ୍ ପର୍, ସିକ୍ରେଟ ସୁପରଷ୍ଟାର୍ ଆଦି ଫିଲ୍ମରେ ଅଭିନୟ କରି ଦର୍ଶକଙ୍କ ପ୍ରଶଂସା ସାଉଁଟିଥିଲେ। ଫିଲ୍ମ ଲାଇଫ୍ ପରି ଆମିରଙ୍କ ବାସ୍ତବ ଜୀବନ ମଧ୍ୟ ବେଶ୍ ରୋମାଞ୍ଚକର। ରୀନା ଦତ୍ତଙ୍କ ପ୍ରେମରେ ଆମିର ପାଗଳ ଥିଲେ। ସେ ନିଜ ହାତ କାଟି ରକ୍ତରେ ରୀନାଙ୍କ ପାଖକୁ ପ୍ରେମପତ୍ର ଲେଖିଥିଲେ। ଆମିର ମୁସଲମାନ ଥିବାବେଳେ ରୀନା ହିନ୍ଦୁ ଥିବାରୁ ବିବାହରେ ବାଧା ଉପୁଜିଥିଲା। ତେବେ ଏହାକୁ ଖାତିର ନ କରି ଦୁହେଁ ୧୯୮୬ରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ପାରିବାରିକ ସମସ୍ୟା ଯୋଗୁ ୨୦୦୨ରେ ଆମିର ଏବଂ ରୀନାଙ୍କର ଛାଡପତ୍ର ହୋଇଥିଲା। ଏହାର ୩ ବର୍ଷ ପରେ ଆମିର ୨୦୦୫ରେ କିରଣ ରାଓଙ୍କୁ ବିବାହ କରିଥିଲେ।
