କୁଜଙ୍ଗ,୨୭ା୬(ଡି.ଏନ୍.ଏ.): ବିଦ୍ୟୁତ୍ ସଂସ୍ପର୍ଶରେ ଆସି ମାନସିକ ସ୍ଥିତି ହରାଇବା ପରେ ବାରମ୍ବାର ଆତ୍ମହତ୍ୟା ଉଦ୍ୟମ କରିବାରୁ ଓ ଘର ଛାଡି ପଳାଇବାକୁ ଉଦ୍ୟମ କରିବାକୁ ଜଣେ ଯୁବକଙ୍କୁ ମା’ ବାପା ଶିକୁଳିରେ ବାଧ୍ୟିବାକୁ ବାଧ୍ୟ ହୋଇଛନ୍ତି। ଅର୍ଥ ଅଭାବକରୁ ତାଙ୍କ ଚିକିତ୍ସା ହୋଇପାରୁ ନଥିବା ବେଳେ ମାସେ ହେବ ସେ ବନ୍ଧୀ ଜୀବନ କାଟୁଛନ୍ତି। ସେ ହେଲେ କୁଜଙ୍ଗ ବ୍ଲକ ଗୋପିଆକୁଦ ପଂଚାୟତର ଗୋଠଡିଆ ଗ୍ରାମର ବାସୁଦେବ ରାଉତ(୨୮)।
ବାପା ବୈଷ୍ଣବଙ୍କ କହିବା ଅନୁଯାୟୀ, ବାସୁଦେବଙ୍କ ପାରାଦୀପସ୍ଥିତ ଜିଜେଏଆଇ କଲୋନିରେ ପରିବାରସହ ରହୁଥିଲେ। ସେ ପୋର୍ଟ ହାଇସ୍କୁଲର ଜଣେ ମେଧାବି ଛାତ୍ର ଥିଲେ। ୧୮ ବର୍ଷତଳେ ମାଟ୍ରିକ ପରୀକ୍ଷାର କିଛିଦିନ ପୂର୍ବରୁ ପଡ଼ିଶାଘର ବାଡ଼ିରେ ପଡ଼ିଥିବା ଆମ୍ବ ଆଣିବାକୁ ଯାଇଥିଲେ। ବାଡ଼ିରୁ ଆମ୍ବ ଚୋରି ନ ହେବା ପାଇଁ ପଡିଶା ଘର ଲୋକେ ବାଡି ଚର୍ତୁପାର୍ଶ୍ୱରେ ତାରବାଡ଼ କରି ବିଦ୍ୟୁତ୍ ଚାର୍ଜ କରି ଦେଇଥିଲେ। ବାସୁଦେବ ଆମ୍ବ ଆଣିବାକୁ ଗଲାବେଳେ ଉକ୍ତ ତାର ସଂସ୍ପର୍ଶରେ ଆସି ଗୁରୁତର ହୋଇଥିଲେ। ସେବେଠାରୁ ବାସୁଦେବ ମାନସିକ ସ୍ଥିତି ହାରାଇ ବସିଛନ୍ତି। ତାଙ୍କ ପାଠପଢ଼ାରେ ଡୋରି ବାନ୍ଧି ହୋଇଯାଇଛି। ବହୁଚିକିତ୍ସା ପରେବି ବାସୁଦେବଙ୍କ ମାନସିକ ସ୍ଥିତିରେ ପରିବର୍ତ୍ତନ ହୋଇ ନ ଥିଲା। ପ୍ରାୟ ଏକମାସରୁ ଉର୍ଦ୍ଧ୍ୱହେବ ବାସୁଦେବର ମାନସିକ ବିକୃତି ବୃଦ୍ଧିପାଇବାରେ ଲାଗିଛି। ଫଳରେ ସେ ବାରମ୍ବାର ଘରୁ ପଳାଇଯିବାକୁ ଉଦ୍ୟମ କରିବା ସହ କୂଅକୁ ଡେଇଁପଡିବାକୁ ଉଦ୍ୟମ କରୁଛନ୍ତି ବୋଲି ମା’ ଦୁଲଣା କହିଛନ୍ତି। ପୁଅର ଚିକିତ୍ସା ପାଇଁ ସମସ୍ତ ସଞ୍ଚତ୍ତ ଅର୍ଥ ଖର୍ଚ୍ଚ ହୋଇସାରିଥିବାବେଳେ ଆଗକୁ କିପରି ଚଳିବେ ସେନେଇ ବୈଷ୍ଣବଙ୍କ ଚିନ୍ତା ବଢ଼ିଯାଇଛି। ଅପରପକ୍ଷେ ଅର୍ଥ ବାଧକ ଯୋଗୁ ଚିକିତ୍ସା ହୋଇପାରୁ ନଥିବାରୁ ବାସୁଦେବଙ୍କ ମାନସିକସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି। କିଛି ସରକାରୀ ବା ବେସରକାରୀସ୍ତରରେ ସାହାଯ୍ୟ ମିଳିପାରିଲେ ପୁଅର ଚିକିତ୍ସା କରାଯାଇପାରନ୍ତା ବୋଲି ବୈଷ୍ଣବ କହିଛନ୍ତି।
ଏସମ୍ପର୍କରେ ଗୋପିଆକୁଦ ସରପଞ୍ଚ ଶ୍ରୀନିବାସ କହିଛନ୍ତି, ବାସୁଦେବଙ୍କ ପରି ଅନେକ ବାସୁଦେବ ଚିକିତ୍ସା ଅଭାବରୁ କଷ୍ଟ ପାଉଛନ୍ତି। ସେମାନଙ୍କୁ ଚିହ୍ନଟ କରି ଚିକିତ୍ସା କରିବା ନିମନ୍ତେ ସରକାର ପକ୍ଷରୁ ଉଦ୍ୟମ ହେବା ଆବଶ୍ୟକ।
