ପାରାଦୀପ,୧୭।୯(ଶରତ ରାଉତ): ପାରାଦୀପର ପ୍ରସିଦ୍ଧ ବିଶ୍ୱକର୍ମା ପୂଜା ମହୋତ୍ସବ ଗୁରୁବାରଠାରୁ ଆରମ୍ଭ ହେଉଛି। ଏହା ସେପ୍ଟେମ୍ବର ୨୩ ପର୍ଯ୍ୟନ୍ତ ଚାଲିବ। ଏଥିପାଇଁ ଆୟୋଜକମାନଙ୍କ ପ୍ରସ୍ତୁତି କାର୍ଯ୍ୟ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ବିଶେଷକରି ପାରାଦୀପର ସିନେମା ହଲଠାରୁ ଆରମ୍ଭ କରି ବ୍ୟାଙ୍କ ଲେନ୍ ଛକ ଓ ନୂଆବଜାର ହୋଟେଲ ଛକ ପର୍ଯ୍ୟନ୍ତ ସୁଉଚ୍ଚ ମଣ୍ଡପ ନିର୍ମିତ ହୋଇଛି। ଉକ୍ତ ଅଞ୍ଚଳରେ ୧୧ଟି ବଡ଼ ମଣ୍ଡପ ହୋଇଛି। ସେଗୁଡିକ ମଧ୍ୟରେ ଉତ୍କଳ ପୋର୍ଟ ଆଣ୍ଡ ଡକ୍ ୱାର୍କର୍ସ ୟୁନିୟନ, ପୋର୍ଟ ଆଣ୍ଡ ଡକ୍ ମଜଦୁର୍ ୟୁନିୟନ, ବନ୍ଦର ଜନସ୍ବାସ୍ଥ୍ୟ ବିଭାଗ, ମେରାଇନ ବିଭାଗ, ବିଦ୍ୟୁତ୍ ବିଭାଗ, ଓଡ଼ିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ (ଓମ୍ଫା), ଜଗନ୍ନାଥ ଟ୍ରକ୍ ମାଲିକ ସଂଘ, ପାରାଦୀପ ଟ୍ରକ୍ ମାଲିକ ସଂଘ, ଡମ୍ପର ମାଲିକ ସଂଘ, ଭାରତୀୟ ମଜଦୁର୍ ସଂଘ ଆଦି ମଣ୍ଡପ କରିଛନ୍ତି। ସେଥିମଧ୍ୟରୁ ଦୁଇଟି ବଡ଼ ଆୟୋଜକ ଗତ ୨୦୨୧ ପରଠାରୁ ଆଉ ମଣ୍ଡପ କରୁନାହାଁନ୍ତି। ସେମାନେ ହେଲେ ଜଗତସିଂହପୁର ଜିଲା ଟ୍ରକ୍ ମାଲିକ ସଂଘ ଓ ପାରାଦୀପ-ଏରସମା ଶିଳ୍ପାଞ୍ଚଳ ଶ୍ରମିକ ସଂଘ। ଏଥିସହ ମୀନବଜାର, ଦୋଳି, ବିଭିନ୍ନ ଦୋକାନ, ଖାଇବା ଷ୍ଟଲ ଆଦି ହୋଇଛି। ପ୍ରତ୍ୟେକ ମଣ୍ଡପ ନିକଟରେ ସପ୍ତାହ ବ୍ୟାପୀ ସାଂସ୍କୃତିକ କାର୍ଯ୍ୟକ୍ରମ ହେବ ବୋଲି ଜଣାପଡ଼ିଛି। ପୂଜା ସମୟରେ ଶାନ୍ତି ଶୃଙ୍ଖଳା ରକ୍ଷା କରିବା ପାଇଁ ପାରାଦୀପ ଆଦର୍ଶଥାନା ପୋଲିସ ପକ୍ଷରୁ ୧୫ ପ୍ଲାଟୁନ ଫୋର୍ସ ସହ ବ୍ୟାପକ ବନ୍ଦୋବସ୍ତ କରାଯାଇଛି। ତେବେ ଦୋଛକିଠାରୁ ଅଠରବାଙ୍କି ଓ ବଡ଼ପଡିଆ ପର୍ଯ୍ୟନ୍ତ ରାସ୍ତା ମରାମତି କାର୍ଯ୍ୟ ଚାଲିଥିବାରୁ ଅସୁବିଧା ହେଉଛି। ଫଳରେ ୪ ଲେନ୍ ବିଶିଷ୍ଟ ରାସ୍ତା ଗୋଟିଏ ପାଖ ବନ୍ଦ ରହିଛି। ଏଥିଯୋଗୁ ଯାତାୟାତ ସମୟରେ ଭିଡ ହେଉଛି। ପୂଜା ମହୋତ୍ସବ ପାଇଁ ବନ୍ଦରାଞ୍ଚଳର ଅଧିବାସୀମାନଙ୍କ ମଧ୍ୟରେ ଉତ୍ସାହ ଦେଖା ଦେଇଛି।
ସୂଚନାଯୋଗ୍ୟ, ଏହି ପୂଜା ମହୋତ୍ସବ ୧୯୬୮ ମସିହାରୁ ଆରମ୍ଭ ହୋଇଥିଲା। ପ୍ରାଥମିକ ପର୍ଯ୍ୟାୟରେ ଛୋଟ ମଣ୍ଡପ ହେଉଥିଲା। ସମୟ ସହ ମଣ୍ଡପ ସଂଖ୍ୟା ବୃଦ୍ଧି ପାଇବା ସହ ଆକର୍ଷଣୀୟ କରିବା ପାଇଁ ଅଘୋଷିତ ପ୍ରତିଯୋଗିତା ହୋଇଥାଏ। କାରଣ ପଞ୍ଚମ ଦିନରେ ଜିଲା ପ୍ରଶାସନ ଓ ପାରାଦୀପ ପୌରପରିଷଦ ପକ୍ଷରୁ ଆକର୍ଷଣୀୟ ମଣ୍ଡପ, ଆଲୋକୀକରଣ ଆଦି ପାଇଁ ଆୟୋଜକଙ୍କୁ ପୁରସ୍କାର ସହିତ ପଦକ ଦିଆଯିବ। ଗୋଟିଏ ଲେଖା ମଣ୍ଡପ ନିର୍ମାଣ ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିବା ଜଣାପଡ଼ିଛି। ଏ ସମ୍ପର୍କରେ ଓମ୍ଫା ସଭାପତି ଶ୍ରୀକାନ୍ତ ପରିଡ଼ା କୁହନ୍ତି, ପୂଜା ଏବେ ବ୍ୟୟବହୁଳ ହୋଇଥିଲେ ମଧ୍ୟ ସଂଘର ଓ ପାରାଦୀପର ସମ୍ମାନକୁ ନେଇ କରିବାକୁ ପଡ଼ୁଛି। ଆୟୋଜକମାନଙ୍କୁ ବିଦ୍ୟୁତ୍ ଓ ଜାଗା ପାଇଁ ଅର୍ଥ ଛାଡ କରାଗଲେ ଅଧିକ ପ୍ରୋତ୍ସାହନ ମିଳିବ ବୋଲି ପରିଡ଼ା କହିଛନ୍ତି।
