ପୁରୀ ଅଫିସ,୧୫।୭: ରଥଯାତ୍ରାଠାରୁ ଆରମ୍ଭ କରି ଆଡ଼ପମଣ୍ଡପ ବିଜେ ପର୍ଯ୍ୟନ୍ତ ସମସ୍ତ ନୀତିକାନ୍ତି ନିର୍ଦ୍ଧାରିତ ସମୟ ପୂର୍ବରୁ ହୋଇଥିଲେ ମଧ୍ୟ ମଙ୍ଗଳବାର ରାତ୍ର ପହୁଡ଼ ନୀତି ହୋଇପାରିନାହିଁ। ଫଳରେ ମହାପ୍ରଭୁଙ୍କୁ ଅନିଦ୍ରା ରହିବାକୁ ପଡ଼ିଛି। ମହାପ୍ରଭୁ ବଡ଼ସିଂହାର ବେଶରେ ବୁଧବାର ଭୋର ପର୍ଯ୍ୟନ୍ତ ରହିବା ପରେ ନୀତିକାନ୍ତି କରାଯାଇଛି।
ବରିଷ୍ଠ ସେବାୟତ ବିନାୟକ ଦାସମହାପାତ୍ର କହିଛନ୍ତି, ସମସ୍ତ ଚେଷ୍ଟା ଓ ବ୍ୟବସ୍ଥା ସତ୍ତ୍ବେ ପହୁଡ଼ ହୋଇପାରି ନ ଥିଲା। ମୁଖ୍ୟତଃ ରୁନ୍ଧା ନୀତିରେ ମାତ୍ରାଧିକ ସମୟ ଅତିବାହିତ ହୋଇଯାଇଥିଲା। ଏହାପରେ ଭୋର ୪ଟାରେ ଶ୍ରୀମୁଖ ଖଣ୍ଡୁଆ, ୪ଟା ୫ରେ ଚକା ପୋଛା, ୪ଟା ୧୦ରେ ସିଂହାସନ ଧୁଆ କରାଯିବା ପରେ ୪ଟା ୩୫ରେ ମହାସ୍ନାନ ସରିଥିଲା। ଏହାପରେ ବେଶ ପାଇଁ ପ୍ରସ୍ତୁତି କରାଯାଇ ପାଖାପାଖି ୫ଟା ୨୦ରେ ବେଶ ଶେଷ ହୋଇଥିଲା। ଫଳରେ ପହୁଡ଼ ପାଇଁ ସମୟ ମିଳି ନ ଥିଲା। ଏ ନେଇ ବିଳମ୍ବ ପାଇଁ କାହାକୁ ଦାୟୀ କରିହେବ ନାହିଁ। ଏହା ଗୋଷ୍ଠୀ ସେବା ହୋଇଥିବାରୁ ସମସ୍ତ ଦଇତାପତି ନିର୍ଦ୍ଧାରିତ ସମୟରେ ନୀତି ସାରିବାକୁ ପ୍ରୟାସ କରିଥିଲେ ମଧ୍ୟ ତାହା ସମ୍ଭବ ହୋଇପାରି ନ ଥିଲା। ଉଲ୍ଲେଖଯୋଗ୍ୟ, ଧାର୍ଯ୍ୟ ସମୟ ମଧ୍ୟରେ ନୀତିକାନ୍ତି ସାରିବା ପାଇଁ ଶ୍ରୀମନ୍ଦିର ପ୍ରଶାସନ ଓ ଦଇତାପତିଙ୍କ ପକ୍ଷରୁ ମିଳିତ ଭାବେ ଉଦ୍ୟମ କରାଯାଇଥିଲା। ରଥାରୂଢ଼ ଶ୍ରୀଜୀଉଙ୍କୁ ନିର୍ଦ୍ଧାରିତ ସମୟ ପୂର୍ବରୁ ରଥ ଉପରୁ ପହଣ୍ଡି କରି ଆଡ଼ପମଣ୍ଡପକୁ ନିଆଯାଇଥିଲା। ଏହାସତ୍ତ୍ୱେ ଧାର୍ଯ୍ୟ ସମୟ ମଧ୍ୟରେ ନୀତି ସମ୍ପୂର୍ଣ୍ଣ ହୋଇପାରି ନ ଥିଲା।
ତେବେ ବୁଧବାର ଚତୁର୍ଥୀ ତିଥିରେ ମହାପ୍ରଭୁଙ୍କ ନୀତିକାନ୍ତି ସଅଳ ହୋଇଥିଲା। ସାଢ଼େ ୧୨ରୁ ୧ଟା ମଧ୍ୟରେ ଆଡ଼ପ ଅବଢ଼ା ବାହାରିଥିଲା। ଫଳରେ ଶ୍ରଦ୍ଧାଳୁମାନେ ମହାପ୍ରସାଦ ସେବନର ସୁଯୋଗ ପାଇଥିଲେ। ପରବର୍ତ୍ତୀ ନୀତିକାନ୍ତି ଶୃଙ୍ଖଳିତ ଭାବେ ନିର୍ଦ୍ଧାରିତ ସମୟରେ ଶେଷ ହୋଇଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି।
