ପୁରୀ ଅଫିସ,୨୫ା୬: ମହାପ୍ରଭୁ ଜନ୍ମବେଦୀରେ ବିଜେ କରିବା ପରେ ଆଡ଼ପ ଅବଢ଼ା ପାଇବା ଲାଗି ଭକ୍ତଙ୍କ ମଧ୍ୟରେ ଏକପ୍ରକାର ଉତ୍କଣ୍ଠା ରହିଥାଏ। ଏବେ ଏହି ଉତ୍କଣ୍ଠାର ପରିସମାପ୍ତି ଘଟିଛି। ବାହାରିଛି ଆଡ଼ପ ଅବଢ଼ା। ମଙ୍ଗଳବାର ରାତିରେ ଚତୁର୍ଦ୍ଧା ବିଗ୍ରହ ଜନ୍ମବେଦୀକୁ ବିଜେ କରିଥିଲେ। ରାତିରେ ସମସ୍ତ ପ୍ରକାର ନୀତିକାନ୍ତି ସରି ଭୋର୍ ୫.୫୭ରେ ଦ୍ୱାର ଫିଟିଥିଲା। ଏହା ପରେ ମଙ୍ଗଳ ଆଳତି ଓ ଅନ୍ୟାନ୍ୟ ନୀତି ସମ୍ପନ୍ନ ପରେ ସକାଳ ଧୂପରେ ବାହାରିଛି ଆଡ଼ପ ଅବଢ଼ା। ଯଦିଓ ଏହା ପର୍ଯ୍ୟାପ୍ତ ନୁହେଁ ତଥାପି ଭକ୍ତମାନଙ୍କ ମଧ୍ୟରେ ଆଡ଼ପ ଅବଢ଼ା ନେବା ଲାଗି ବେଶ୍ ଉତ୍କଣ୍ଠା ଦେଖିବାକୁ ମିଳିଛି। ଟୋକନ ବ୍ୟବସ୍ଥା ମାଧ୍ୟମରେ ଅବଢ଼ା ନେବା ଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଛି। ତେବେ ଭୋଗ ମଣ୍ଡପ ବଢ଼ିବା ପରେ ପର୍ଯ୍ୟାପ୍ତ ପରିମାଣରେ ମହାପ୍ରସାଦ ମିଳିପାରିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
