କୋରାପୁଟ,୧୨ା୩( ଅମିତାଭ ବେହେରା ): ମଧ୍ୟପ୍ରାଚ୍ୟ ଅଞ୍ଚଳରେ ଚାଲୁଥିବା ଯୁଦ୍ଧ ପରିସ୍ଥିତିକୁ ନେଇ ଇନ୍ଧନ ଯୋଗାଣ ଉପରେ ପ୍ରଭାବ ପଡିପାରେ ବୋଲି ଆଶଙ୍କାରେ ରହିଛନ୍ତି ଲୋକେ । ଫଳରେ ଆଜି କୋରାପୁଟ ସହରର ବିଭିନ୍ନ ପେଟ୍ରୋଲ ପମ୍ପରେ ଗ୍ରାହକମାନଙ୍କ ଭିଡ଼ ଦେଖାଯାଇଛି । ଗୁରୁବାର ସକାଳୁ ଅନେକ ପମ୍ପ ସମ୍ମୁଖରେ ଦୁଇଚକା ଓ ଚାରିଚକା ଯାନର ଲମ୍ବା ଧାଡ଼ି ଲାଗିଥିବା ଦେଖାଯାଇଥିଲା।
କୋରାପୁଟ ସହରର ଷ୍ଟେଟ ବ୍ୟାଙ୍କ ନିକଟରେ ଥିବା ପେଟ୍ରୋଲ ପମ୍ପ, ଓଏମପି ପେଟ୍ରୋଲ ପମ୍ପ, ଗାନ୍ଧୀ ନଗର ପେଟ୍ରୋଲ ପମ୍ପ ସମେତ ବିଭିନ୍ନ ପେଟ୍ରୋଲ ପମ୍ପରେ ପେଟ୍ରୋଲ ପାଇଁ ଶହ ଶହ ଲୋକଙ୍କ ଲମ୍ବା ଲାଇନ ଦେଖିବାକୁ ମିଳିଥିଲା । ଯୁଦ୍ଧ ପରିସ୍ଥିତି ଦୀର୍ଘସ୍ଥାୟୀ ହେଲେ ଆଗାମୀ ଦିନରେ ପେଟ୍ରୋଲ ଓ ଡିଜେଲ ଦାମ ବୃଦ୍ଧି କିମ୍ବା ଯୋଗାଣରେ ଅସୁବିଧା ହୋଇପାରେ ବୋଲି ଭୟରେ ଅନେକ ଗ୍ରାହକ ଆଗୁଆଡ଼ି ଇନ୍ଧନ ଭରାଇବା ପାଇଁ ପମ୍ପଗୁଡ଼ିକୁ ଭିଡ଼ କରୁଛନ୍ତି ।
ତଥାପି ପେଟ୍ରୋଲ ପମ୍ପ ମାଲିକମାନେ କହିଛନ୍ତି ଯେ, ବର୍ତ୍ତମାନ ପାଇଁ ଇନ୍ଧନ ଯୋଗାଣ ସାଧାରଣ ଅବସ୍ଥାରେ ରହିଛି। ଗ୍ରାହକମାନେ ଅନାବଶ୍ୟକ ଭାବେ ଭିଡ଼ ନ କରିବାକୁ ଓ ଆତଙ୍କିତ ନହେବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି ।
