ଅମରପାଲି,୨୦।୬(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ କେନଝିରିଆପାଲି ପଞ୍ଚାୟତ ଅନ୍ତର୍ଗତ ପୁଲେଶ୍ୱର ଗ୍ରାମର ଲୋକନାଥ ଜଗଦଲା (୩୩) ବର୍ତ୍ତମାନ ଅଞ୍ଚଳରେ ଜଣେ ପରିଚିତ ସାପ ଉଦ୍ଧାରକାରୀ ଭାବେ ପରିଚିତ ହୋଇପାରିଛନ୍ତି। ପ୍ରାୟ ୫ ବର୍ଷ ଧରି ସେ ସ୍ବେଚ୍ଛାସେବୀ ଭାବେ ସାପ ଧରି ଲୋକଙ୍କୁ ସୁରକ୍ଷା ଯୋଗାଇ ଆସୁଛନ୍ତି।
କୌଣସି ଗ୍ରାମ କିମ୍ବା କାହା ଘରେ ସାପ ବାହାରିଲେ ଖବର ପାଇବା ମାତ୍ରେ ସେ ତୁରନ୍ତ ଘଟଣାସ୍ଥଳକୁ ପହଞ୍ଚି ସାପକୁ ସୁରକ୍ଷିତ ଭାବେ ଉଦ୍ଧାର କରନ୍ତି। ନାଗ, ଅଜଗର ଭଳି ବିଷଧର ଏବଂ ବୃହତ୍କାୟ ସାପକୁ ମଧ୍ୟ ସେ ସଫଳତାର ସହ ଧରି ନିକଟସ୍ଥ ଜଙ୍ଗଲରେ ଛାଡ଼ି ଦେଇଥାନ୍ତି। ଏପର୍ଯ୍ୟନ୍ତ ସେ ୫୦୦ରୁ ଅଧିକ ସାପ ଉଦ୍ଧାର କରିଥିବା ସୂଚନା ମିଳିଛି। ଲୋକନାଥ ସାପ ଧରିବାର ତାଲିମ ବୀରମହାରାଜପୁର ଅଞ୍ଚଳର ରୁଗୁଡ଼ିପାଲି ଗ୍ରାମର ତ୍ରିନାଥ ଜଗଦଲାଙ୍କ ଠାରୁ ଗ୍ରହଣ କରିଥିଲେ। ତାଙ୍କର ଏହି ସେବାମୂଳକ କାର୍ଯ୍ୟ ପାଇଁ ବିଭିନ୍ନ ମହଲରୁ ପ୍ରଶଂସା ଓ ସମ୍ମାନ ମିଳୁଛି। ଲୋକନାଥ କହିଛନ୍ତି, ସରକାରୀସ୍ତରରେ ସାପ ଉଦ୍ଧାରକାରୀଙ୍କୁ ଅଧିକ ତାଲିମ ପ୍ରଦାନ କରାଯିବା ସହ ଆବଶ୍ୟକୀୟ ସୁରକ୍ଷା ଉପକରଣ ଯୋଗାଇ ଦିଆଗଲେ ଏହି କାର୍ଯ୍ୟ ଆହୁରି ଫଳପ୍ରଦ ହୋଇପାରିବ। ଏଥିସହ ସାପ ଉଦ୍ଧାର କ୍ଷେତ୍ରରେ ପ୍ରଶିକ୍ଷିତ ଯୁବକମାନଙ୍କୁ ସରକାରୀ ଭାବେ ନିଯୁକ୍ତି ଦେବାକୁ ସେ ଅନୁରୋଧ କରିଛନ୍ତି। ସାହସ, ସେବା ଓ ପରିବେଶ ସୁରକ୍ଷା ପ୍ରତି ନିଷ୍ଠାର ଏକ ଉଜ୍ଜ୍ୱଳ ଉଦାହରଣ ପାଲଟିଥିବା ଲୋକନାଥଙ୍କ କାର୍ଯ୍ୟକୁ ସ୍ଥାନୀୟ ଅଞ୍ଚଳବାସୀ ଉଚ୍ଚ ପ୍ରଶଂସା କରୁଛନ୍ତି।
