ମୋରଡ଼ା,୧୬ା୯(ଡି.ଏନ.ଏ.):୧୦ ବର୍ଷ ହଷ୍ଟେଲରେ ରହି ପାଠ ପଢ଼ିଲେ। ସଫଳତାର ସହ ମାଟ୍ରିକ୍ ବି ପାସ୍ କଲେ। ହେଲେ ପାରିପାର୍ଶ୍ୱିକ ପରିସ୍ଥିତି ଏବେ ତାଙ୍କ ଉଚ୍ଚଶିକ୍ଷା ଆଶାକୁ ମଉଳାଇ ଦେଇଛି। ଇଚ୍ଛା ଥାଇ ପାଠରେ ଡୋରି ବାନ୍ଧି ସନ୍ତୁଳି ହେଉଛନ୍ତି ଲୋଧା ସମ୍ପ୍ରଦାୟର ଛାତ୍ରୀ ସାବି ମଲ୍ଲିକ। ମା’ ବାପାଙ୍କ ସହ ପର ପିଣ୍ଡାରେ ଆଶ୍ରୟ ନେଉଥିବା ସାବି ଏବେ ବଣୁଆ ଛତୁ, ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ପରିବାର ପ୍ରତିପୋଷଣରେ ସହାୟତା କରୁଛନ୍ତି।
ସାବିଙ୍କ ବାପା ଅଜିତ ମଲ୍ଲିକ ଓ ମା’ ଦୀର୍ଘ ୨୦ ବର୍ଷ ଧରି ଗଡିଗଁା ପଞ୍ଚାୟତର ଲୋଧା କଲୋନୀରେ ରହି ଆସୁଛନ୍ତି। ସ୍ଥାୟୀ ଭାବରେ ବସବାସ କରି ଆସୁଥିଲେ ସୁଦ୍ଧା ଅଦ୍ୟାବଧି ପ୍ରଶାସନ ପକ୍ଷରୁ ଘରଡିହ ଯୋଗାଇ ଦିଆଯାଇନାହିଁ। ଚିକିଟାମାଟିଆ ଏସ୍ଏସ୍ଡି ବାଳିକା ଉଚ୍ଚ ବିଦ୍ୟାଳୟରେ ପାଠ ପଢ଼ୁଥିବା ସାବି ଗତ ମାଟ୍ରିକ ପରୀକ୍ଷାରେ ୨୯୧ ନମ୍ବର ରଖି ପାସ କରିଛନ୍ତି। ହଷ୍ଟେଲରୁ ଘରକୁ ଫେରି ଦେଖନ୍ତି ଯେ, ଘର ଖଣ୍ଡେ ନାହିଁ। ମା’ ବାପା ପର ପିଣ୍ଡାରେ ଆଶ୍ରୟ ନେଇଛନ୍ତି। ସ୍ବଚ୍ଛ ଭାରତ ମିଶନ ଜରିଆରେ ମିଳିଥିବା ପାଇଖାନାରେ ରୋଷେଇ କରୁଛନ୍ତି ତାଙ୍କ ମା’ ବାପା। ରାତି ହେଲେ ସାବି ତାଙ୍କ ମାମୁଙ୍କ ଘର ପିଣ୍ଡାରେ ଶୁଅନ୍ତି। ସ୍ଥାୟୀ ବାସିନ୍ଦା ପ୍ରମାଣପତ୍ର ନ ଥିବାରୁ ସବୁ କ୍ଷେତ୍ରରେ ଅସୁବିଧା ହେଉଛି ବୋଲି ସାବିଙ୍କ ପରିବାର ଲୋକେ କହିଛନ୍ତି। ମୋରଡ଼ା ତହସିଲଦାର ଅନନ୍ତ କୁମାର ହଁାସଦାଙ୍କୁ ପଚାରିବାରୁ ସାବିଙ୍କ ପରିବାରଙ୍କୁ ସ୍ଥାୟୀ ବାସିନ୍ଦା ପ୍ରମାଣ ପତ୍ର ଯୋଗାଇ ଦିଆଯିବ ବୋଲି କହିଛନ୍ତି। ତେବେ ଲୋଧା ଜନଜାତିଙ୍କ ବିକାଶ ଲାଗି ସରକାର ବିଭିନ୍ନ ଯୋଜନା କରିଥିଲେ ମଧ୍ୟ ସାବି ମଲ୍ଲିକଙ୍କ ପରିବାର ଭଳି ବହୁ ପରିବାର ବାସହରା ଭାବେ ଦିନ କାଟୁଥିବା ପୂର୍ବତନ ଗଡିଗଁା ସରପଞ୍ଚ ଶତୃଘନ ମଲ୍ଲିକ ଅଭିଯୋଗ କରିଛନ୍ତି। ପ୍ରଶାସନ ତୁରନ୍ତ ହସ୍ତକ୍ଷେପ କରି ସାବିଙ୍କ ପାଠପଢ଼ା ବ୍ୟବସ୍ଥା କରିବାକୁ ସେ ଦାବି କରିଛନ୍ତି।
