ଥୁଆମୂଳ ରାମପୁର,୧୩।୫(ଦୁର୍ଗା କୀର୍ତ୍ତି): ରାଜ୍ୟ ସରକାର ଓଡ଼ିଶାକୁ ଏକ ବିକଶିତ ରାଜ୍ୟରେ ପରିଣତ କରିବା ପାଇଁ ଅନେକ ଜନକଲ୍ୟାଣକାରୀ ଯୋଜନା ପ୍ରଣୟନ କରୁଥିବା ବେଳେ, କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ ଅନ୍ତର୍ଗତ ଓଡ୍ରି ଗ୍ରାମ ପଞ୍ଚାୟତରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ଏଠାରେ ପ୍ରଶାସନିକ ଅଧିକାରୀଙ୍କ ମନମୁଖୀ କାର୍ଯ୍ୟକଳାପ ଓ ଅବହେଳା ଯୋଗୁ ସାଧାରଣ ଜନତା ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ମାସ ମାସ ଧରି ପଞ୍ଚାୟତ କାର୍ଯ୍ୟାଳୟରେ ତାଲା ଝୁଲୁଥିବା ବେଳେ ଅଧିକାରୀଙ୍କ ଦର୍ଶନ ମିଳିବା ଏବେ ସ୍ଥାନୀୟ ଲୋକଙ୍କ ପାଇଁ ସ୍ୱପ୍ନ ପାଲଟିଛି ।
ଓଡ୍ରି ପଞ୍ଚାୟତରେ PEO ଭାବେ ଆର୍ତ୍ତତ୍ରାଣ ମାଝୀ ଏବଂ GRS (ADEO) ଭାବେ ସୁଦର୍ଶନ ଛତ୍ରିଆ ନିଯୁକ୍ତ ହୋଇଛନ୍ତି। କିନ୍ତୁ ଅଭିଯୋଗ ଅନୁଯାୟୀ, ଏହି ଦୁଇ ବାବୁ କାର୍ଯ୍ୟାଳୟକୁ ପ୍ରାୟତଃ ଆସୁ ନାହାନ୍ତି। ଟାଙ୍ଗରି ଗ୍ରାମର ଗୋପାଳ ଗୌଡ଼, ରାମ ନାଏକ ଏବଂ ଓଡ୍ରିର ମଦନ ସାହୁଙ୍କ ସମେତ ଅନେକ ଗ୍ରାମବାସୀ ଅଭିଯୋଗ କରିଛନ୍ତି ଯେ, ବାର୍ଦ୍ଧକ୍ୟ ଭତ୍ତା, ପାନୀୟ ଜଳ ସମସ୍ୟା କିମ୍ବା ମନରେଗା ଯୋଜନା ପାଇଁ ପଞ୍ଚାୟତକୁ ଗଲେ ସେଠାରେ ସବୁବେଳେ ତାଲା ପଡ଼ିଥାଏ। ଅନେକ ସମୟରେ ଲୋକେ ଆଶା ବାନ୍ଧି ବ୍ଲକ୍ କାର୍ଯ୍ୟାଳୟକୁ ଯାଉଥିଲେ ମଧ୍ୟ ସେଠାରେ ମଧ୍ୟ ଏହି ଅଧିକାରୀଙ୍କ ଦେଖା ମିଳୁନାହିଁ।
ସାଧାରଣ ଲୋକେ ସମସ୍ୟା ଜଣାଇବାକୁ ଅଧିକାରୀଙ୍କୁ ଫୋନ୍ କଲେ ସେମାନେ ପ୍ରାୟତଃ ଫୋନ୍ ଉଠାନ୍ତି ନାହିଁ। ବେଳେବେଳେ ଫୋନ୍ ଲାଗିଲେ ମଧ୍ୟ “ଜିଲା ସ୍ତରୀୟ ମିଟିଂ” ବା “ବ୍ଲକ୍ ମିଟିଂ” ର ବାହାନା ଦେଖାଇ ଫୋନ୍ କାଟି ଦିଅନ୍ତି। ଅଧିକାଂଶ ସମୟରେ ଅଧିକାରୀମାନେ ହିତାଧିକାରୀଙ୍କ ନମ୍ବରକୁ ବ୍ଲକ୍ କରି ଦେଉଥିବା ଭଳି ସଂଗୀନ ଅଭିଯୋଗ ମଧ୍ୟ ସାମ୍ନାକୁ ଆସିଛି। ଏପରିକି ଗଣମାଧ୍ୟମ ପ୍ରତିନିଧିଙ୍କ ଫୋନ୍ କଲ୍ କିମ୍ବା ହ୍ଵାଟ୍ସଆପ୍ ମେସେଜ୍ର ମଧ୍ୟ କୌଣସି ପ୍ରତିକ୍ରିୟା ମିଳୁନାହିଁ।
ସରକାର ମନରେଗା ମାଧ୍ୟମରେ ୧୨୫ ଦିନର କାମ ଯୋଗାଇବାକୁ ଲକ୍ଷ୍ୟ ରଖିଥିବା ବେଳେ, ଏହି ପଞ୍ଚାୟତରେ GRS ଙ୍କ ଅପାରଗତା ଯୋଗୁଁ କୌଣସି କାମ ସୁରୁଖୁରୁରେ ହୋଇପାରୁନାହିଁ। ଲୋକେ କାମ କରିବା ପରେ ମଧ୍ୟ ସମୟ ସୀମା ମଧ୍ୟରେ ‘ଡିମାଣ୍ଡ’ ଦିଆଯାଉ ନଥିବାରୁ ମାସ ମାସ ଧରି ସେମାନଙ୍କ ପ୍ରାପ୍ୟ ବାକି ରହିଛି।
ଆବାସ ଯୋଜନାରେ ଅବହେଳା: ଟାଙ୍ଗରି ଗ୍ରାମର ଉମେଶ ନାଏକ, ଭୁବନି ନାଏକ ଏବଂ ମଞ୍ଜୁଳା ନାଏକଙ୍କ ଭଳି ହିତାଧିକାରୀ ସରକାରୀ ସହାୟତାରେ ଘର ତିଆରି କରୁଛନ୍ତି। ସେମାନେ ନିଜ ସାମର୍ଥ୍ୟ ଅନୁଯାୟୀ ଘରର ଛାତ ଲେଭେଲ ପର୍ଯ୍ୟନ୍ତ କାର୍ଯ୍ୟ ସାରିଛନ୍ତି ।
ଜିଓ-ଟ୍ୟାଗିଂ ସମସ୍ୟା: ଦୁଇ ମାସରୁ ଅଧିକ ସମୟ ହେବ ଘର କାମ ଛାତ ଲେଭେଲରେ ଅଟକି ରହିଛି, କିନ୍ତୁ GRS ବାବୁ ଜିଓ-ଟ୍ୟାଗିଂ କରିବାକୁ ଆସୁ ନାହାନ୍ତି। ଏହି କାରଣରୁ ହିତାଧିକାରୀମାନେ ଦ୍ୱିତୀୟ କିସ୍ତି ଟଙ୍କା ପାଇବାରୁ ବଞ୍ଚିତ ହୋଇ ଅସହାୟ ଅବସ୍ଥାରେ ଅଛନ୍ତି।
GRS ସୁଦର୍ଶନ ଛତ୍ରିଆଙ୍କ କାର୍ଯ୍ୟକଳାପକୁ ନେଇ ସାରା ପଞ୍ଚାୟତବାସୀ ଅସନ୍ତୋଷ ବ୍ୟକ୍ତ କରିଛନ୍ତି। ଏଥିପାଇଁ ତାଙ୍କୁ ଓଡ୍ରି ପଞ୍ଚାୟତରୁ ବଦଳି କରିବା ପାଇଁ ପଲ୍ଲୀସଭା ଓ ଗ୍ରାମସଭାରେ ପ୍ରସ୍ତାବ ଗୃହୀତ ହୋଇଛି। ଏନେଇ ବିଡିଓ ଧ୍ରୁବ ଚରଣ ମୁଦୁଲିଙ୍କୁ ବାରମ୍ବାର ଅବଗତ କରାଯାଇଥିଲେ ମଧ୍ୟ ବ୍ଲକ୍ ପ୍ରଶାସନ କୌଣସି ପଦକ୍ଷେପ ନେଉ ନଥିବାରୁ ଜନସାଧାରଣଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି।
ଏ ସମ୍ପର୍କରେ GRS ସୁଦର୍ଶନ ଛତ୍ରିଆ ଏବଂ ବିଡିଓ ଧ୍ରୁବ ଚରଣ ମୁଦୁଲିଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ସେମାନେ ଉପଲବ୍ଧ ହୋଇ ନାହାନ୍ତି। ସରକାରୀ ଯୋଜନା କିପରି ତୃଣମୂଳ ସ୍ତରରେ ପହଞ୍ଚିବ, ତାହା ଏବେ ଏକ ବଡ଼ ପ୍ରଶ୍ନବାଚୀ।
