ଯାଜପୁର,୨୯ା୭(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ରାଜନୀତିରେ ବିରୋଧୀଙ୍କ ଭୂମିକା ଅତି ନଗଣ୍ୟ। ତୃଣମୂଳସ୍ତରରେ ବିରୋଧୀଙ୍କ ସଂଗଠନ ଅତି ଦୁର୍ବଳ ରହିଥିବାବେଳେ ସବୁଠି ପ୍ରାୟ ଫାଳ ଫାଳ। ଶାସକ ବିଜେଡିର ସଂଗଠନ ଆଗରେ ବିରୋଧୀ ସମ୍ପୂର୍ଣ୍ଣ ଭାବେ ହାତ ଟେକିଦେଇଥିବା ମନେହେଉଛି। ସାଧାରଣ ନିର୍ବାଚନ ପାଇଁ ପ୍ରାୟ ସମସ୍ତ ଦଳ ଏବେଠୁ ସଜବାଜ ହେଉଛନ୍ତି। କିନ୍ତୁ ଜିଲାର ବିଭିନ୍ନ ଗୁରୁତ୍ୱପୂର୍ଣ୍ଣ ବିଷୟକୁ ଭୁଲିଯାଇ କିଛି ହାଲୁକା ଘଟଣାକୁ ଧରି ବିରୋଧୀ ନିଜର ବଳ ପ୍ରଦର୍ଶନ କରିବାରେ ମଗ୍ନ ରହିଛନ୍ତି। ବିରୋଧୀଙ୍କ ଏଭଳି କାର୍ଯ୍ୟ ଜିଲାର ନିଷ୍ପେଷିତ, ଅସହାୟ, ଗରିବ ଲୋକଙ୍କ ଆସ୍ଥାଭାଜନ ହେବାରେ ଯଥେଷ୍ଟ ହେଉନାହିଁ। ସ୍ଥାନୀୟ ନିଯୁକ୍ତି, ଶିକ୍ଷା, ଗମନାଗମନ, ସ୍ବାସ୍ଥ୍ୟ ଭଳି ମୌଳିକ ସମସ୍ୟାଗୁଡ଼ିକର ସମାଧାନ କରିବାରେ ଶାସକ ବିଜେଡି ଆଜି ବି ସମ୍ପୂର୍ଣ୍ଣ ଭାବେ ସଫଳ ହୋଇପାରିନାହିଁ। ବିରୋଧୀ ଦଳଗୁଡ଼ିକ ଏହାର ସୁଯୋଗ ନେବାରେ ବିଫଳ ହୋଇଛନ୍ତି। ଏହିସବୁ ବିରୋଧରେ କୌଣସି ଏକ ବଡ଼ଧରଣର ଆନ୍ଦୋଳନ କିମ୍ବା ଶୋଭାଯାତ୍ରା ହେଉଥିବା ଦେଖିବାକୁ ମିଳୁନାହିଁ। ଜିଲା ବିଜେଡିର ସଂଗଠନ ଗ୍ରାମାଞ୍ଚଳସ୍ତରରେ ଏକକ ସୈନିକ ଭଳି ଆଧିପତ୍ୟ ବିସ୍ତାର କରି ଚାଲିଛି। କିନ୍ତୁ ବିରୋଧୀ ଦଳର ନେତୃବର୍ଗ ଗଣମାଧ୍ୟମରେ ମନ୍ତବ୍ୟ ଦେବାରେ ସିଦ୍ଧହସ୍ତ ହୋଇଛନ୍ତି। ସେମାନଙ୍କ ମଧ୍ୟରେ ମନୋବଳର ଅଭାବ ଏବଂ କେନ୍ଦ୍ର ସରକାରଙ୍କ ହାୱା ଉପରେ କେବଳ ଭରସା ଏହାର ପ୍ରମୁଖ କାରଣ ବୋଲି କୁହାଯାଉଛି।
କେନ୍ଦ୍ର ଓ ରାଜ୍ୟସ୍ତରରେ ପ୍ରଣୀତ ହେଉଥିବା ବିଭିନ୍ନ ଯୋଜନା ତଥା ରାଶନ କାର୍ଡ, ଭତ୍ତା, ପ୍ରଧାନମନ୍ତ୍ରୀ ଆବାସ ଯୋଜନା, ପାଇଖାନା, ଏମ୍ଜିଏନ୍ଆରଇଜିଏସ୍, ଗ୍ରାମାଞ୍ଚଳକୁ ରାସ୍ତା ନିର୍ମାଣ, ଧାନକିଣା ଆଦି ସରକାରୀ କାର୍ଯ୍ୟରେ ବ୍ୟାପକ ଅନିୟମିତତା ଆଉ ଲୁଚି ଛପି ରହିନାହିଁ। କୌଣସି ଏକ ଦୁର୍ନୀତି କିମ୍ବା ଅବହେଳା ବିରୋଧରେ ବିରୋଧୀ ଭାଜପା ଓ କଂଗ୍ରେସ ସଫଳ ହେବା ଦେଖିବାକୁ ମିଳୁନାହିଁ। ଜିଲାର ଶତାଧିକ ଗ୍ରାମକୁ ସଡ଼କ ସଂଯୋଗ ବାକି ରହିଛି। ଯେଉଁମାନେ ବାସ୍ତବ ହିତାଧିକାରୀ ସେମାନଙ୍କୁ ଆବାସ ଯୋଜନା ଏବଂ ରାଶନ କାର୍ଡ ପ୍ରଦାନ କରାଯାଇ ପାରିନାହିଁ। ଠିକାଦାରି ରାଜନୀତିକୁ ଗୁରୁତ୍ୱ ଦିଆଯାଉଥିବାବେଳେ କଳିଙ୍ଗନଗର ଶିଳ୍ପ ଓ ସୁକିନ୍ଦା ଖଣି ଅଞ୍ଚଳରେ ସ୍ଥାନୀୟ ନିଯୁକ୍ତିକୁ ଅଣଦେଖା କରାଯାଉଛି। ଅଣଓଡ଼ିଆଙ୍କୁ ଉଚ୍ଚସ୍ତରରେ ନିଯୁକ୍ତି ଦିଆଯାଉଥିବାବେଳେ ସମାନ ଶିକ୍ଷାଗତ ଯୋଗ୍ୟତା ଥିବା ଓଡ଼ିଆ ଯୁବତୀଯୁବକଙ୍କୁ ସାମାନ୍ୟ ପଦପଦବୀରେ ନିଯୁକ୍ତି ମିଳୁଛି। ଆବଶ୍ୟକସ୍ଥଳେ ସେମାନଙ୍କୁ ବହୁ ନିର୍ଯାତନା ଦେଇ ଚାକିରି ଛାଡ଼ିବାକୁ ପରୋକ୍ଷରେ ବାଧ୍ୟ କରାଯାଉଛି। ଜମିବାଡି ହରାଇଥିବା ପ୍ରଭାବିତ ଲୋକେ ନିଯୁକ୍ତି ପାଇଁ ଯେତେ ଆନ୍ଦୋଳନ କଲେ ବି କିଛି ସୁଫଳ ମିଳିପାରୁନାହିଁ। ସେମାନଙ୍କ ସପକ୍ଷରେ କୌଣସି ବିରୋଧୀ ଦଳ ନେତୃବର୍ଗ ଠିଆହେବାର ଉଦାହରଣ ଦେଖିବାକୁ ମିଳୁନାହିଁ। ପ୍ରାୟ ସମସ୍ତ ମେଗା ଉଠା ଜଳସେଚନ ଏବଂ ପାନୀୟ ଜଳ ପ୍ରକଳ୍ପରେ ଅଣଓଡ଼ିଆ ଠିକାସଂସ୍ଥା ନିୟୋଜିତ ହୋଇ ଲୁଟିବାରେ ଲାଗିଛନ୍ତି। ଏହିସବୁ ପ୍ରକଳ୍ପରେ ବହୁ କୋଟି ଟଙ୍କା ଖର୍ଚ୍ଚ ହେଉଥିଲେ ହେଁ ସମ୍ପୃକ୍ତ ଅଞ୍ଚଳବାସୀ ପାଣି ପାଇଁ ଡହଳବିକଳ ହେଉଛନ୍ତି। କିନ୍ତୁ ବିରୋଧୀ ଦଳଗୁଡ଼ିକ କ’ଣ ପାଇଁ ନୀରବ ରହୁଛନ୍ତି ତାହା ସାଧାରଣରେ ସନ୍ଦେହ ସୃଷ୍ଟି କରୁଛି। ଏହିସବୁ ମୂଳକୁ ଛାଡ଼ି ଅମୂଳକ ବିଷୟକୁ ନେଇ ଦାବି ଓ ଆନ୍ଦୋଳନ ବିରୋଧୀଙ୍କ ପାଇଁ କାଳ ହେଉଥିବାବେଳେ ବିଜେଡି ଏଥିରେ ଆହୁରି ଶକ୍ତିଶାଳୀ ହୋଇଛି। ୨୦୧୯ ସାଧାରଣ ନିର୍ବାଚନରେ ଭାଜପାର ଭୋଟହାର ବୃଦ୍ଧି କେବଳ ପ୍ରଧାନମନ୍ତ୍ରୀ ମୋଦିଙ୍କ ହାୱା ବୋଲି କୁହାଯାଉଛି। ଏହିସବୁ କାରଣରୁ ଗତ ପଞ୍ଚାୟତ ନିର୍ବାଚନରେ ବିଜେଡି ସମସ୍ତ ଜିଲା ପରିଷଦ ଆସନକୁ ହାତେଇପାରିଛି ବୋଲି ମତପ୍ରକାଶ ପାଇଛି। ଅନ୍ୟପକ୍ଷେ କଂଗ୍ରେସ ସମ୍ପୂର୍ଣ୍ଣ ଭାବେ ହାତ ଟେକିଥିବା ମନେହେଉଛି। କଁା ଭଁା କାର୍ଯ୍ୟକ୍ରମକୁ ବାଦ୍ ଦେଲେ ଉଭୟ ବିରୋଧୀ ଦଳ ଭାଜପା ଓ କଂଗ୍ରେସ ଏକପ୍ରକାର ଅସହାୟ ବୋଲି ମନେହେଉଛି।
