କେନ୍ଦୁଝର, ୧୮ା୯ (ସ୍ବ.ପ୍ର.)-ନିର୍ମାଣ କାର୍ଯ୍ୟରେ ଲାଗୁଥିବା ସିମେଣ୍ଟ ବସ୍ତାଗୁଡ଼ିକ ପରବର୍ତ୍ତୀ ସମୟରେ ଅଦରକାରୀ ହୋଇପଡ଼େ। ତେଣୁ ଏହାକୁ ଏଣେ ତେଣେ ଫୋପାଡ଼ି ଦିଆଯାଏ। ଏହି ଜରି ବସ୍ତା ପରିବେଶ ପାଇଁ ହାନିକାରକ ହୋଇଥାଏ। କିନ୍ତୁ ତେଲକୋଇ ବ୍ଲକର ଛାମୁଣ୍ଡା ଗ୍ରାମର ମହିଳାମାନେ ଏହି ସିମେଣ୍ଟ ଜରି ବସ୍ତାରୁ ବିଭିନ୍ନ ପ୍ରକାରର ନିତ୍ୟ ବ୍ୟବହାର୍ଯ୍ୟ ଓ ଘରେ ବ୍ୟବହୃତ ସାମଗ୍ରୀ ପ୍ରସ୍ତୁତ କରି ସ୍ବାବଲମ୍ବୀ ହୋଇ ପାରିଛନ୍ତି। ତାଲିମ ମିଳିଲେ ସେମାନେ ଅଧିକ ରୋଜଗାରକ୍ଷମ ହୋଇପାରିବେ ବୋଲି ପ୍ରକାଶ କରିଛନ୍ତି। କୌଣସି ଜିନିଷ ଅଦରକାରୀ ନୁହେଁ ବୋଲି ଏହି ମହିଳାମାନେ ପ୍ରମାଣ କରି ଦେଖାଇ ପାରିଛନ୍ତି।
ଆଜିକାଲି ଝୋଟ ଚାଷ କମିଗଲାଣି ା ଏଣୁ ଝୋଟରେ ପ୍ରସ୍ତୁତ ଦଉଡ଼ି, ବ୍ୟାଗ, ବସ୍ତା ଆଦି ସାମଗ୍ରୀ ଆଗଭଳି ମିଳୁନାହିଁ ା ଏଣୁ ଗୋରୁ ବାନ୍ଧିବା, ହଳ କରିବା ଆଦି କାମରେ ଝୋଟ ଦଉଡ଼ି ମିଳୁନାହିଁ। ଏବେ ପ୍ଲାଷ୍ଟିକର ବ୍ୟବହାର ବଢ଼ିଯାଇଛି ା ଛାମୁଣ୍ଡା ଗ୍ରାମର ପ୍ରାୟ ୪୦ରୁ ଊର୍ଦ୍ଧ୍ୱ ପରିବାର ଘର କାମ ପରେ ବଳକା ସମୟକୁ ବିନିଯୋଗ କରି ଅବ୍ୟବହୃତ ସିମେଣ୍ଟ ଜରି ବସ୍ତାରୁ ବିଭିନ୍ନ ପ୍ରକାରର ଦଉଡ଼ି ପ୍ରସ୍ତୁତ କରି ବେଶ ଦୁଇ ପଇସା ରୋଜଗାର କରିପାରୁଛନ୍ତି ା ଏନେଇ ଅଧିକ ତାଲିମ ମିଳିଲେ ଏଥିରୁ ବିଭିନ୍ନ ପ୍ରକାରର ସାଜସଜା, ସୌଖୀନ ସାମଗ୍ରୀ ମଧ୍ୟ ପ୍ରସ୍ତୁତ କରି ବିଭିନ୍ନ ହାଟବଜାର ତଥା ମେଳାମହୋତ୍ସବରେ ବିକି ଅଧିକ ଲାଭବାନ ହୋଇ ପାରନ୍ତେ ବୋଲି ସେମାନେ ମତବ୍ୟକ୍ତ କରିଛନ୍ତି ା ଗ୍ରାମର କେତେକ ମହିଳା ଜରି ବସ୍ତାକୁ ଖୋଲି ସେଥିରୁ ସୂତା ବାହାର କରି ଝୋଟ ଦଉଡ଼ି ଭଳି ବଳିି ବିଭିନ୍ନ ପ୍ରକାର ସାଇଜର ଦଉଡ଼ି ପ୍ରସ୍ତୁତ କରୁଛନ୍ତି। ଯାହାକି ଲୋକଙ୍କ ଦ୍ୱାରା ଆଦୃତ ହେଉଛି। ଏହାକୁ ଦେଖି ଗ୍ରାମର ଅନେକ ମହିଳା ଯୋଡ଼ି ହେଉଛନ୍ତି ଏବଂ ବଳକା ସମୟରେ ଏହି କାମ କରୁଛନ୍ତି। ଏହାଦ୍ୱାରା ଚାଷୀମାନଙ୍କ ଆବଶ୍ୟକତା ଦଉଡ଼ି ପୂରଣ କରିବା ସହ ଘର ପାଇଁ ରୋଜଗାରକ୍ଷମ ହୋଇପାରୁଛନ୍ତି। ଏଥିରୁ ବିଭିନ୍ନ ପ୍ରକାର ଗୋରୁବାନ୍ଧିବା ଦଉଡି, ପଘା, ଭାର ବୋହିବା ପାଇଁ ସିକା, ଘରେ ବନ୍ଧାବନ୍ଧି କରିବା ପାଇଁ ଦଉଡ଼ି, ଦଉଡ଼ିଆ ଖଟ ପାଇଁ ଦଉଡ଼ି, ବ୍ୟାଗ, ତାରପୋଲିନ ଭଳି ଘୋଡାଇବା ସାମଗ୍ରୀ, ଧାନ ସାଇତି ରଖିବା ପାଇଁ ବଡ଼ ବଡ଼ ବସ୍ତା ଆଦି ସାମଗ୍ରୀ ପ୍ରସ୍ତୁତ କରିପାରୁଛନ୍ତି। ସେମାନଙ୍କୁ ନେଇ ସ୍ବୟଂ ସହାୟକ ଗୋଷ୍ଠୀ କରି ଏବଂ ସୋସାଇଟି ଗଠନ କରାଗଲେ ସେମାନେ ଅଧିକ ପରିମାଣର ଏହି ସାମଗ୍ରୀ ପ୍ରସ୍ତୁତ କରିପାରନ୍ତେ ଏବଂ ଲାଭବାନ ହୋଇପାରନ୍ତେ ବୋଲି ସ୍ଥାନୀୟ ସାମାଜିକ କର୍ମୀ ଚିନ୍ମୟ କୁମାର ସାହୁ କହିଛନ୍ତି। ଘର ଦାୟିତ୍ୱ ଓ ଛୁଆପିଲାଙ୍କ ଦେଖାରଖା ପରେ ବଳକା ସମୟକୁ ଏହି କାମରେ ବ୍ୟବହାର କରିଥାନ୍ତି ବୋଲି ମହିଳାମାନେ କହିଛନ୍ତି। ମିଳୁଥିବା ଅର୍ଥରେ ଘର ପାଇଁ ଛୋଟ ବଡ଼ ଖର୍ଚ୍ଚ ତୁଲାଇବାରେ ସାହାଯ୍ୟ ହୋଇଯାଉଛି ବୋଲି ମହିଳାମାନେ କହିଛନ୍ତି।
