ବାରଙ୍ଗ,୩୦।୮(ଲିଙ୍ଗରାଜ ରାଉତ):ନନ୍ଦନକାନନର ଅନ୍ୟତମ ଆକର୍ଷଣ ସିଂହୀ ବିଜ୍ଲୀ ଗୁରୁବାର ୫ ଛୁଆ ଜନ୍ମ ଦେଇଛି। ୨୦୨୦ ମସିହାରେ ବିଜ୍ଲୀକୁ ଇନ୍ଦୋର ପ୍ରାଣୀ ଉଦ୍ୟାନରୁ ନନ୍ଦନକାନନକୁ ଅଣାଯାଇଥିଲା। ଏଥର ସିଂହ ‘ସମ୍ରାଟ’ ସହ ମିଶି ୪ର୍ଥ ଥର ପାଇଁ ୯ ବର୍ଷୀୟା ବିଜ୍ଲୀ ମା’ ହେବାର ସୌଭାଗ୍ୟ ଅର୍ଜନ କରିଛି। ବିଜ୍ଲୀର ଜନ୍ମ ବୃତ୍ତାନ୍ତ ସହ ଏବେକାର ସ୍ଥିତିକୁ ସିସି କ୍ୟାମେରା ମାଧ୍ୟମରେ ଅନୁଧ୍ୟାନ କରାଯାଉଛି। ତା’ର ଗତିବିଧି ଉପରେ ନନ୍ଦନକାନନ ତୀକ୍ଷ୍ମ ନଜର ରଖିଛି। ମା’ ଛୁଆଙ୍କ ଯତ୍ନ ନେଉଥିବାରୁ ତା’ଠାରୁ ଛୁଆଙ୍କୁ ଅଲଗା କରାଯାଇନାହିଁ। ଫଳରେ ଜନ୍ମିତ ଛୁଆଙ୍କ ଲିଙ୍ଗ ନିରୂପଣ ହୋଇପାରିନାହିଁ। ଏହି ୫ ଛୁଆଙ୍କ ଜନ୍ମ ପରେ ସିଂହସଂଖ୍ୟା ବୃଦ୍ଧି ପାଇ ୨୫ରେ ପହଞ୍ଚିଛି। ୨୦୨୧ରେ ବିଜ୍ଲୀ ପ୍ରଥମ କରି ମା’ ହୋଇ ୩ଟି ଛୁଆ ଜନ୍ମ ଦେଇଥିଲା। ସେଥିମଧ୍ୟରୁ ୨ଟିର ମୃତ୍ୟୁ ହୋଇଥିବାବେଳେ ତୃତୀୟ ଛୁଆକୁ ସେ ଗ୍ରହଣ କରି ନ ଥିଲା। ବାଧ୍ୟ ହୋଇ ଛୁଆକୁ ବଞ୍ଚାଇ ରଖିବାକୁ ମା’ଠାରୁ ଅଲଗା କରି ଲାଳନପାଳନ କେନ୍ଦ୍ରରେ ରଖି ବଡ଼ କରାଯାଇ ପରେ ତା’ର ନାମ ‘ବର୍ଷା’ ରଖାଯାଇଥିଲା। ୨୦୨୨ ମାର୍ଚ୍ଚରେ ବିଜ୍ଲୀର ଦ୍ୱିତୀୟ ସନ୍ତାନ କାମିନିକୁ ମଧ୍ୟ ଅଲଗା କରି ଲାଳନପାଳନ କେନ୍ଦ୍ରରେ ରଖାଯାଇଥିଲା। ୨୦୨୨ ନଭେମ୍ବରରେ ତୃତୀୟ ଗର୍ଭରେ ୫ଟି ଛୁଆକୁ ଜନ୍ମ ଦେଇଥିବାବେଳେ ଗୋଟିକର ମୃତ୍ୟୁ ଘଟିଥିଲା। ୪ ଛୁଆଙ୍କୁ ମା’ ଗ୍ରହଣ କରିବା ସହ ଠିକ୍ ଭାବେ ଲାଳନପାଳନ କରିଥିଲା। ଏହି ଛୁଆ ପର୍ଯ୍ୟାୟକ୍ରମେ ବଡ଼ ହେବା ସହ ସେଥିମଧ୍ୟରୁ ୨ଟି ଛୁଆକୁ କୋଲକାତାର ଆଲିପୁର ଚିଡ଼ିଆଖାନାକୁ ଗତ ୨୭ ତାରିଖରେ ପଠାଯାଇଛି।
