ମହାକାଳପଡ଼ା,୭ା୬ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ତେରଗାଁ ପଞ୍ଚାୟତ ଘୋଡ଼ାବନ୍ଧ ଗ୍ରାମରେ ଶନିବାର ଅପରାହ୍ନରେ ମଇଁଷିପଲ ଚରୁଥିବା ବେଳେ ତାଙ୍କ ଉପରେ ବଜ୍ରପାତ ଘଟିଛି। ଏଥିରେ ଗୋଟିଏ ମଇଁଷି ଏବଂ ଜଗୁଆଳଙ୍କ ମୃତ୍ୟୁ ହୋଇଛି। ମୃତକ ହେଲେ ବାସୁଦେବ ଦାସ(୫୦)।
ସୂଚନା ଅନୁସାରେ, ଶନିବାର ହଠାତ୍ କାଳବୈଶାଖୀ ପବନ ସାଙ୍ଗକୁ ତୁହାକୁ ତୁହା ବର୍ଷା ସହ ବଜ୍ରପାତ ହୋଇଥିଲା। ଲୁଣାନଦୀ ଅପର ପାର୍ଶ୍ୱ ଗୋଖାପଡ଼ା ଚାଷଜମି ଭେଡାରେ ମଇଁଷିପଲ ଚରୁଥିଲେ। ଏହି ସମୟରେ ପ୍ରବଳ ବର୍ଷା ସହ ବଜ୍ରପାତ ହୋଇଥିଲା। ମଇଁଷିପଲ ଉପରେ ବଜ୍ରପାତ ହେବାରୁ ଗୋଟିଏ ମଇଁଷିର ମୃତ୍ୟୁ ହୋଇଥିବା ବେଳେ ଜଗୁଆଳ ବାସୁଦେବଙ୍କର ମଧ୍ୟ ଘଟଣାସ୍ଥଳରେ ମୃତ୍ୟୁ ହୋଇଥିଲା। ପାଖରେ ଥିବା ଅନ୍ୟ ମଇଁଷି ଚରାଳିମାନେ ଗ୍ରାମ ଲୋକଙ୍କୁ ଡାକିଥିଲେ। ସେଠାରୁ ତାଙ୍କ ମୃତଦେହ ଲୋକେ ନେଇଥିବା ଜଣାପଡିଛି।
ଖବର ପାଇ ମହାକାଳପଡ଼ା ତହସିଲଦାର ରବି ନାରାୟଣ ଆଚାର୍ଯ୍ୟ ସବିଶେଷ ତଥ୍ୟ ତଦନ୍ତ ରିପୋର୍ଟ ପ୍ରଦାନ ପାଇଁ ସ୍ଥାନୀୟ ରାଜସ୍ବ ନିରୀକ୍ଷକ ରଘୁନାଥ ହାଁସ୍ଦାଙ୍କୁ ଘଟଣାସ୍ଥଳକୁ ପଠାଇଛନ୍ତି। ସେହିପରି ପଲ୍ଲୀ ଗ୍ରାମର ଏକ ଗୁହାଳ ଘର ଉପରେ ବଜ୍ରପାତ ଘଟିଛି। ଏ ସମ୍ପର୍କରେ ମହାକାଳପଡ଼ା ତହସିଲଦାର ଆଚାର୍ଯ୍ୟଙ୍କ ମତାମତ ନେବାରେ ତଦନ୍ତ ରିପୋର୍ଟ ମିଳିବା ପରେ ଆଇନ ଅନୁସାରେ ଆର୍ଥିକ ସହାୟତା ପ୍ରଦାନ କରାଯିବା ବ୍ୟବସ୍ଥା ରହିଛି ବୋଲି କହିଛନ୍ତି।
