ଓ୍ବାଶିଂଟନ୍, ୧୨।୪: ଶୀତଋତୁରେ ମଶା ନିଷ୍କ୍ରିୟ ହୋଇପଡ଼ନ୍ତି। ଫଳରେ ଶୀତଦିନେ ମଶା କାମୁଡ଼ାରୁ ସାମାନ୍ୟ ଆଶ୍ୱସ୍ତି ମିଳିଥାଏ। କିନ୍ତୁ ସହରାଞ୍ଚଳରେ ବଢ଼ୁଥିବା ଆଲୋକ ପ୍ରଦୂଷଣ ଯୋଗୁ ଏଣିକି ଶୀତ ଋତୁରେ ମଧ୍ୟ ମଶା ପୂର୍ବ ପ୍ରକାରେ ସକ୍ରିୟ ରହିବେ। ସ୍ତନ୍ୟପାୟୀ ଏବଂ ଅନ୍ୟ ଜୀବଜନ୍ତୁ ମଶା କାମୁଡ଼ାରୁ ଆଉ ରକ୍ଷା ପାଇବେ ନାହିଁ ବୋଲି ଆମେରିକାର ଓହିଓ ଷ୍ଟେଟ୍ ୟୁନିଭର୍ସିଟି ପକ୍ଷରୁ କରାଯାଇଥିବା ଅଧ୍ୟୟନରୁ ଜଣାପଡ଼ିଛି। ଫଳରେ ମଶାଙ୍କ ଆୟୁଷରେ ହ୍ରାସ ଘଟିବ ବୋଲି ବିଶେଷଜ୍ଞ ଓଲ୍କୋଫ୍ କହିଛନ୍ତି।
ନିକଟରେ ଜର୍ନାଲ୍ ‘ଇନ୍ସେକ୍ଟସ୍’ରେ ଅଧ୍ୟୟନ ସମ୍ପର୍କିତ ବିସ୍ତୃତ ବିବରଣୀ ପ୍ରକାଶ ପାଇଛି। କୃତ୍ରିମ ଆଲୋକ ଦ୍ୱାରା ମଶାଙ୍କ ବ୍ୟବହାର ପରିବର୍ତ୍ତନ ଲକ୍ଷ୍ୟ କରିଥିବା ବିଶେଷଜ୍ଞମାନେ କହିଛନ୍ତି। ମଶାଙ୍କଠାରେ ଦେଖାଯାଉଥିବା ପରିବର୍ତ୍ତନ ଭିନ୍ନ ଭିନ୍ନ ଋତୁ ପାଇଁ ଅଲଗା ହୋଇଥାଏ। ମଶା କାମୁଡ଼ିବା ଯୋଗୁ ଓ୍ବେଷ୍ଟ ନିଲେ ଭୂତାଣୁ ସଂକ୍ରମଣ ବଢ଼ିବା ଆଶଙ୍କା ରହିଛି। ବିଶେଷ କରି ମଶାଙ୍କ ଜରିଆରେ ଓ୍ବେଷ୍ଟ ନିଲେ ଭୂତାଣୁ ଅଧିକମାତ୍ରାରେ ବ୍ୟାପିଥାଏ। ଆମେରିକାର ଲୋକେ ଏହି ଭାଇରସ୍ ଦ୍ୱାରା ଅଧିକମାତ୍ରାରେ ଆକ୍ରାନ୍ତ ହେଉଥିବା ଅଧ୍ୟୟନର ବରିଷ୍ଠ ବିଶେଷଜ୍ଞ ମେଗାନ ମେଉଟି କହିଛନ୍ତି। ଶୀତଦିନର ଆଗମନରେ ମଶା ଖାଇବାକୁ ପାଇ ନ ଥାନ୍ତି। ରକ୍ତ ନ ଖାଇବାରୁ ମାଈ ମଶା ଦେହରେ ଡିମ୍ବାଣୁ ସୃଷ୍ଟି ହୋଇପାରେ ନାହିଁ। କିଛି ମଶା ଓ୍ବେଷ୍ଟ ନିଲେ ଭାଇରସ୍ ଦ୍ୱାରା ଆକ୍ରାନ୍ତ ପଶୁ କିମ୍ବା ପକ୍ଷୀଙ୍କ ରକ୍ତ ଶୋଷି ଖାଇବା ଫଳରେ ସେମାନେ ସଂକ୍ରମିତ ହୋଇଯାଆନ୍ତି।
ପରବର୍ତ୍ତୀ ସମୟରେ ସେମାନେ ଯେତେବେଳେ ଅନ୍ୟ ଜୀବ, ଘୋଡ଼ା ଓ ସ୍ତନ୍ୟପାୟୀଙ୍କୁ କାମୁଡନ୍ତି ସେମାନେ ଏହି ଭୂତାଣୁ ଦ୍ୱାରା ସଂକ୍ରମିତ ହୋଇଥାନ୍ତି। କୃତ୍ରିମ ଆଲୋକ ଫଳରେ କେବଳ ମଶା ନୁହେଁ ଅନ୍ୟ କୀଟପତଙ୍ଗଙ୍କ ଜୀବନଶୈଳୀ ମଧ୍ୟ ପ୍ରଭାବିତ ହୋଇଥିବା ଅଧ୍ୟୟନରୁ ଜଣାପଡ଼ିଛି। ଶୀତଦିନେ କାର୍ବୋହାଇଡ୍ରେଡ୍ ସୁଗାର ମଶାଙ୍କୁ ମୁଖ୍ୟ ଖୋରାକ ହୋଇଥାଏ।ଶୀତଦିନକୁ ଛାଡ଼ିଦେଲେ ଅନ୍ୟ ସବୁ ଋତୁରେ ମଶାମାନେ ସ୍ତନ୍ୟପାୟୀମାନଙ୍କୁ କାମୁଡ଼ୁଥିବାବେଳେ ଏଣିକି ଶୀତଦିନେ ମଧ୍ୟ ସେମାନେ ମଶା କାମୁଡ଼ାରୁ ରକ୍ଷା ପାଇବେ ନାହିଁ।
