ବାଙ୍ଗାଲୁରୁ(କର୍ନାଟକ): ବଞ୍ଜର ପାହାଡ଼ ଅଞ୍ଚଳରେ ୧୬ ପୋଖରୀ ଖୋଳି ପୋଖରୀ ମାନବଭାବେ ଚର୍ଚ୍ଚାର ପରିସରକୁ ଆସିଥିବା କର୍ନାଟକର ୮୪ ବର୍ଷୀୟ କାମେଗୌଡ଼ା(ମେଣ୍ଢା ଚରାଳି)ଙ୍କୁ କର୍ନାଟକ ରାଜ୍ୟ ସଡ଼କ ପରିବହନ ନିଗମ(କେଏସ୍ଆର୍ଟିସି) ଆଜୀବନ ମାଗଣା ବସ୍ ପାସ୍ ପ୍ରଦାନ କରିଛି। ମୁଖ୍ୟମନ୍ତ୍ରୀ ବି.ଏସ୍. ୟେଦୁରାପ୍ପାଙ୍କ ନିର୍ଦ୍ଦେଶକ୍ରମେ ଏହା ପ୍ରଦାନ କରାଯାଇଛି। ସୂଚନାଯୋଗ୍ୟ, କର୍ନାଟକର ମାଣ୍ଡ୍ୟ ଜିଲା ଅନ୍ତର୍ଗତ ଦାଶନଦୋଦ୍ଦି ଗ୍ରାମର କାମେଗୌଡ଼ାଙ୍କ ପରିବେଶ ପ୍ରତି ଚିନ୍ତା ଓ ୪୦ବର୍ଷର ଅବଦାନକୁ ଗତ ରବିବାର ପ୍ରଧାନମନ୍ତ୍ରୀ ‘ମନ୍ କି ବାତ୍’ କାର୍ଯ୍ୟକ୍ରମରେ ପ୍ରଶଂସା କରିଥିଲେ। ଏହାର କିଛି ସମୟ ପୂର୍ବରୁ କେନ୍ଦ୍ର ଜଳ ଶକ୍ତି ମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତ ମଧ୍ୟ କାମେଗୌଡ଼ାଙ୍କ ସହ ଭିଡିଓ କଲ୍ ମାଧ୍ୟମରେ ଆଲୋଚନା କରି ଜଳ ସଂରକ୍ଷଣ ଦିଗରେ ତାଙ୍କ ମହତ୍ କାର୍ଯ୍ୟର ପ୍ରଶଂସା କରିଥିଲେ। ମୁଖ୍ୟମନ୍ତ୍ରୀ କାମେଗୌଡ଼ାଙ୍କ ନିଃସ୍ବାର୍ଥପର କାର୍ଯ୍ୟକୁ ସମ୍ମାନ ଜଣାଇ ମାଗଣା ପାସ୍ ପ୍ରଦାନ ପାଇଁ ନିର୍ଦ୍ଦେଶ ଦେଇଥିଲେ। ଏ ନେଇ କେଏସ୍ଆର୍ଟିସିର ପରିଚାଳନା ନିର୍ଦ୍ଦେଶକ ଶିବୟୋଗୀ କଲାଶଦ୍ କହିଛନ୍ତି, କାମେଗୌଡ଼ାଙ୍କ ଅବଦାନ ଆଶ୍ଚର୍ଯ୍ୟଜନକ ଏବଂ ଅନୁକରଣୀୟ। ସେ ନିଗମର ସମସ୍ତ ଶ୍ରେଣୀର ବସ୍ସେବା ମାଗଣାରେ ପାଇବେ। ଏହା ଜାଣିବା ପରେ କାମେଗୌଡ଼ା ଅତ୍ୟନ୍ତ ଖୁସି ପ୍ରକାଶ କରିଛନ୍ତି। ଏଥିସହ ସେ ମେଲ ମହାଦେଶ୍ୱର ମନ୍ଦିର ଏବଂ କେଙ୍ଗଲ ହନୁମନ୍ତ ମନ୍ଦିର ଦର୍ଶନ କରିବାକୁ ଚାହୁଁଥିବା କହିଛନ୍ତି। ଏଥିସହ ସେ କହିଛନ୍ତି, ଏବେ ଆଉ ଟଙ୍କାର ଚିନ୍ତା ନାହିଁ। ମାଗଣା ପାସ୍ ସାହାଯ୍ୟରେ ସେ ବସ୍ ଯୋଗେ ଯେକୌଣସି ମନ୍ଦିର ଦର୍ଶନ କରିବାର ସୁଯୋଗ ପାଇପାରିବେ। ସେହିପରି ସେ ସୁଯୋଗ ମିଳିଲେ ଥିମ୍ମାପ୍ପାଙ୍କ ଦର୍ଶନ କରିବାକୁ ଆଶା ରଖିଥିବା କହିବା ସହ ତାଙ୍କ କୃପାରୁ ବସ୍ ପାସ୍ ମିଳିଛି ବୋଲି କହିଛନ୍ତି। ଅଞ୍ଚଳବାସୀ ଏହି ପୋଖରୀ ମାନବଙ୍କୁ ପଦ୍ମଶ୍ରୀ ପୁରସ୍କାର ପ୍ରଦାନ ପାଇଁ ଦାବି କରୁଛନ୍ତି। ଏଥିସହ କେନ୍ଦ୍ର ଜଳ ଶକ୍ତି ମନ୍ତ୍ରଣାଳୟ ପକ୍ଷରୁ ଦିଆଯାଉଥିବା ଜଳ ଯୋଦ୍ଧା ସମ୍ମାନ ପାଇଁ ମଧ୍ୟ ତାଙ୍କୁ ମନୋନୀତ କରିବାକୁ ନିବେଦନ କରିଛନ୍ତି। ଗୁରୁବାର ମୁଖ୍ୟମନ୍ତ୍ରୀ ୟେଦୁରାପ୍ପା କାମେଗୌଡ଼ାଙ୍କୁ ଫୋନ୍ ଯୋଗେ ଅଧିକ ପୋଖରୀ ଖୋଳିବା ପାଇଁ ଆର୍ଥିକ ସହାୟତା ଦେବାକୁ ପ୍ରତିଶ୍ରୁତି ଦେଇ କହିଛନ୍ତି। ଏହା ବ୍ୟତୀତ ରାଜ୍ୟ ସରକାରଙ୍କ ପକ୍ଷରୁ ତାଙ୍କୁ ଏକ ଜମି ଏବଂ ଘର ମିଳିବା ସମ୍ଭାବନା ମଧ୍ୟ ରହିଥିବା ଜଣାପଡ଼ିଛି।
