କଟକ ଅଫିସ,୧୧।୧୦: କରୋନା ମହାମାରୀକୁ ନିୟନ୍ତ୍ରଣ କରିବା ପାଇଁ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ଏପଟେ କିନ୍ତୁ ରାଜ୍ୟରେ ସ୍ବାସ୍ଥ୍ୟ ସେବା ବିଗିଡିବାରେ ଲାଗିଛି। କୋଭିଡ୍ ଗାଇଡ୍ଲାଇନ୍ ଆଳରେ ହସ୍ପିଟାଲଗୁଡ଼ିକରେ ଡାକ୍ତର ଓ ସ୍ବାସ୍ଥ୍ୟ କର୍ମୀମାନେ ଚିକିତ୍ସାରେ ଅବହେଳା ପ୍ରଦର୍ଶନ କରୁଥିବାରୁ କାହିଁକେତେ ଜୀବନ ଚାଲିଯାଉଛି। ରାଜ୍ୟର ପ୍ରମୁଖ ଚିକିତ୍ସାଳୟ ଏସ୍ସିବି ମେଡିକାଲରେ ଏମିତି ଆଉଏକ ଘଟଣା ଘଟିଛି। ୧୦ଦିନ ଧରି ଆଇସିୟୁ ବେଡ୍କୁ ଅପେକ୍ଷା କରି ଜଣେ ଗୁରୁତର ମହିଳା ରୋଗୀ ଶନିବାର ଆଖି ବୁଜିଛନ୍ତି। ମୃତ ମହିଳା ଜଣକ ହେଲେ କେନ୍ଦ୍ରାପଡ଼ା ଜିଲା ରାଜନଗର ବ୍ଲକ କଣ୍ଡିରା ପଞ୍ଚାୟତର ଶ୍ୱେତପଦ୍ମା ନାୟକ। ହସ୍ପିଟାଲରେ ଆଇସିୟୁ ବେଡ୍ ଖାଲିଥିଲେ ମଧ୍ୟ ଅବହେଳା ପାଇଁ ଶ୍ୱେତପଦ୍ମାଙ୍କ ଜୀବନ ଚାଲିଗଲା ବୋଲି ପରିବାର ଲୋକେ କହିଛନ୍ତି।
ଶ୍ୱେତପଦ୍ମା କୀଟନାଶକ ପିଇଦେବାରୁ ଗତ ୧ ତାରିଖରେ ପରିବାର ଲୋକେ ତାଙ୍କୁ ପ୍ରଥମେ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ପ୍ରାଥମିକ ଚିକିତ୍ସା ପରେ ସେହିଦିନ ପୂର୍ବାହ୍ନ ୧୦ଟାରେ କଟକ ଏସ୍ସିବି ମେଡିକାଲ୍ରେ ଭର୍ତ୍ତି କରିଥିଲେ। କରୋନା ଗାଇଡ୍ଲାଇନ ଆଧାରରେ କାଜୁଆଲଟିରେ ତାଙ୍କର ରାପିଡ୍ ଆଣ୍ଟିଜେନ ଟେଷ୍ଟ କରାଇବା ସହ ଚିକିତ୍ସା ଆରମ୍ଭ ହୋଇଥିଲା। ରିପୋର୍ଟ ନେଗେଟିଭ ଆସିବାରୁ ମେଡିସିନ ବିଭାଗ ଅଧୀନ ଟ୍ରମା ୱାର୍ଡରେ ରଖି ଚିକିତ୍ସା କରାଯାଇଥିଲା। ଆଇସିୟୁରେ ରଖି ଚିକିତ୍ସା କରିବାକୁ ଅନୁମୋଦନ ମିଳିଥିଲା। ହେଲେ ଆର୍ଟିପିସିଆର୍ ଟେଷ୍ଟ୍ ପରେ ହିଁ ଆଇସିୟୁକୁ ନିଆଯିବ ବୋଲି ଡାକ୍ତର ଓ ଦାୟିତ୍ୱରେ ରହୁଥିବା ନର୍ସମାନେ କହୁଥିଲେ ମଧ୍ୟ ସ୍ବାବ୍ ସଂଗ୍ରହ କରାଯାଇ ନ ଥିଲା। ଶ୍ୱେତପଦ୍ମା ସେମିତି ବେଡ୍ରେ ଗୁରୁତର ଅବସ୍ଥାରେ ପଡି ରହିଥିଲେ ମଧ୍ୟ କେହି ଗୁରୁତ୍ୱ ଦେଇ ନ ଥିଲେ। ଶୁକ୍ରବାର ବିଳମ୍ବିତ ରାତିରୁ ତାଙ୍କ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହେବାକୁ ଲାଗିଲା। ପରିବାର ଲୋକେ ବାରମ୍ବାର ଡାକ୍ତରଙ୍କୁ ସାକ୍ଷାତ କରି ନେହୁରା ହୋଇଥିଲେ। କିନ୍ତୁ ଆର୍ପିଟିସିଆର୍ ପରୀକ୍ଷା ହୋଇ ନ ଥିବାରୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇ ପାରି ନ ଥିଲା। ଏହାପରେ ତରବରିଆ ଭାବେ ସ୍ବାବ୍ ସଂଗ୍ରହ କରାଯାଇଥିଲା। ରିପୋର୍ଟ ଆସିବା ପରେ ହିଁ ଆଇସିୟୁରେ ଭର୍ତ୍ତି କରାଯିବ ବୋଲି ଡାକ୍ତର କହିଥିଲେ। ସେପଟେ ରୋଗୀଙ୍କୁ କେବଳ ଅକ୍ସିଜେନ୍ ଦିଆଯାଇ ଥିଲେ ମଧ୍ୟ ସ୍ବାବ୍ ସଂଗ୍ରହ ପାଇଁ ଅନ୍ୟ ଚିକିତ୍ସା ଅଟକି ରହିଥିଲା। ଫଳରେ ଦୀର୍ଘ ସମୟ ଧରି ଛଟପଟ ହେବା ପରେ ଶ୍ୱେତପଦ୍ମାଙ୍କ ଶରୀର ନିସ୍ତେଜ ହୋଇଯାଇଥିଲା। ଏପରି କି ମୃତ ଘୋଷଣା ପରେ ବି ହସ୍ପିଟାଲ ପକ୍ଷରୁ ଆବଶ୍ୟକ କାଗଜପତ୍ର ପ୍ରସ୍ତୁତ କରିବାରେ ବିଳମ୍ବ ହୋଇଥିଲା। ଫଳରେ ବ୍ୟବଚ୍ଛେଦ ପାଇଁ ପରିବାର ଲୋକେ ସକାଳକୁ ଅପେକ୍ଷା କରିଥିବା ତାଙ୍କ ପୁତୁରା ନିଗମାନନ୍ଦ ନାୟକ ଅଭିଯୋଗ କରିଛନ୍ତି ା
ଏସ୍ସିବି ଅଧୀକ୍ଷକ ଡା.ଅନ୍ନଦା ପ୍ରସାଦ ପଟ୍ଟନାୟକ କୁହନ୍ତି, ଆଇସିୟୁ ବେଡ୍ ପାଇଁ ଆର୍ଟିପିସିଆର୍ ଟେଷ୍ଟ ବାଧ୍ୟତାମୂଳକ। ତଥାପି ଜରୁରିକାଳୀନ ରୋଗୀଙ୍କ ପାଇଁ ସ୍ବତନ୍ତ୍ର ଭାବେ ଆଇସୋଲେଶନଯୁକ୍ତ ଆଇସିୟୁର ବ୍ୟବସ୍ଥା ଅଛି ା ଚିକିତ୍ସା କରୁଥିବା ଡାକ୍ତର ଏ ବାବଦରେ ଉପଯୁକ୍ତ ନିଷ୍ପତ୍ତି ନେବା କଥା। ସମ୍ପୃକ୍ତ ରୋଗୀଙ୍କ ପାଇଁ କ’ଣ ଆବଶ୍ୟକ ଥିଲା ନ ଜାଣି କିଛି କହିବାଟା ଠିକ୍ ହେବ ନାହିଁ।
