ନୂଆଦିଲ୍ଲୀ,୧୧।୧୧: ଜୀବନକୁ ସୁରକ୍ଷିତ ରଖିବା ହିଁ ସର୍ବୋତ୍ତମ। ଜୀବନ ତୁଳନାରେ ଅନ୍ୟ କାହାର ଗୁରୁତ୍ୱ ନାହିଁ ବୋଲି ବୁଧବାର ସୁପ୍ରିମ୍କୋର୍ଟ କହିଛନ୍ତି। ଏହା ସହିତ ପଶ୍ଚିମବଙ୍ଗରେ ବାଣଫୁଟା ଉପରେ ଲାଗିଥିବା ପ୍ରତିବନ୍ଧକ ହଟାଇବା ଆବେଦନକୁ ସର୍ବୋଚ୍ଚ ନ୍ୟାୟାଳୟ ଖାରଜ କରିଦେଇଛନ୍ତି। ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଇନ୍ଦିରା ବାନାର୍ଜୀଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏଭଳି ରାୟ ଦେଇଛନ୍ତି। ପଶ୍ଚିମବଙ୍ଗ ହାଇକୋର୍ଟ ରାଜ୍ୟରେ ଦୀପାବଳି ଏବଂ ଅନ୍ୟ ଉତ୍ସବରେ ବାଣଫୁଟା ଉପରେ କଟକଣା ଜାରି କରିଥିଲେ। ଏହା ବିରୋଧରେ ସୁପ୍ରିମ୍କୋର୍ଟରେ ଏକ ଆବେଦନ କରାଯାଇଥିଲା। ଏନେଇ ସୁପ୍ରିମ୍କୋର୍ଟ ଖଣ୍ଡପୀଠ କହିଛନ୍ତି ଯେ, ଜୀବନରେ ପାର୍ବଣର ଗୁରୁତ୍ୱ ରହିଛି। ମାତ୍ର ମଣିଷ ଜୀବନ ଯେତେବେଳେ ସଙ୍କଟରେ ପଡ଼ିଛି, ସେତେବେଳେ ଜୀବନକୁ ସୁରକ୍ଷିତ ରଖିବା ସର୍ବୋପରି। ବର୍ତ୍ତମାନର କରୋନା ମହାମାରୀ ସମୟରେ ସଭିଏଁ ଏକଜୁଟ ହୋଇ ଲଢ଼େଇ ଜାରି ରଖିବା ଅପରିହାର୍ଯ୍ୟ ବୋଲି ସୁପ୍ରିମ୍କୋର୍ଟ କହିଛନ୍ତି।
