ଅମ୍ବାଭୋନା,୨୦ା୮(ଡି.ଏନ.ଏ): ଛତିଶଗଡ଼ ଉପରମୁଣ୍ଡରେ ଲଘୁଚାପ ଜନିତ ଲଗାଣ ବର୍ଷା ଯୋଗୁ ମହାନଦୀର ଜଳସ୍ତର ବୃଦ୍ଧି ପାଇଥିଲା। ରାୟପୁର ସ୍ଥିତ ଗାଁଗରେଲ ଡ୍ୟାମ୍ରୁ ମହାନଦୀକୁ ଅଧିକ ଜଳ ନିଷ୍କାସନ, ଶାଖା ନଦୀ ଗୁଡ଼ିକରେ ଅଧିକ ଜଳ ପ୍ରବେଶ କରିବାରୁ ମହାନଦୀ ଫୁଲି ଉଠି ପାର୍ଶ୍ୱବର୍ତ୍ତୀ ଗ୍ରାମ ଗୁଡ଼ିକୁ ୭ଦିନ ହେଲା ଜଳମଗ୍ନ କରି ରଖିଛି। ହୀରାକୁଦ ଜଳଭଣ୍ଡାରର ପଛୁଆ ପାଣିରେ ବରଗଡ଼ ଜିଲା ଅମ୍ବାଭୋନା ବ୍ଲକ ଚିଖିଲି ସମେତ ବେନିଆଁପାଲି, ବରଙ୍ଗାକୋଟ, ଅନ୍ତରାଡ଼ି, ଘୁଘୁରାପାଲି ଆଦି ଗ୍ରାମରେ ୫୦୦ ହେକ୍ଟର ଚାଷଜମି ଜଳମଗ୍ନ ହୋଇଛି। ଚିଖିଲି ଗ୍ରାମରେ ୬ଫୁଟ୍ର ବନ୍ୟାଜଳ ପଶି ଆସି ଘରଦ୍ୱାର, ଡଙ୍ଗା, ଜାଲ, ଜାଳେଣି, ପାଲଗଦା ଆଦି ଭସାଇ ନେଇଛି। ବନ୍ଧ, ଗାଡ଼ିଆରେ ମତ୍ସ୍ୟଚାଷୀମାନେ କରିଥିବା ମାଛ ଚାଷ ବନ୍ୟାଜଳରେ ଧୋଇ ହୋଇଯାଇଛି। ଫଳରେ ବନ୍ୟା ପ୍ରପୀଡ଼ିତଙ୍କ ଜୀବନ ଜୀବିକା ଦୁର୍ବିସହ ହୋଇ ପଡ଼ିଛି। ବାରମ୍ବାର ଏଭଳି ବନ୍ୟାସ୍ଥିତି ଯୋଗୁ ଅଞ୍ଚଳର ଲୋକଙ୍କ ଜୀବନ ଜୀବିକା ପ୍ରଭାବିତ ହୋଇଛି। ୧୯୬୧, ୧୯୮୦, ୨୦୦୩, ୨୦୦୮, ୨୦୧୪, ୨୦୧୭, ୨୦୨୦, ୨୦୨୧, ୨୦୨୨ ମସିହା ବନ୍ୟାରେ ଚାଷୀଙ୍କ ଚାଷଜମି ସମେତ ଘରଦ୍ୱାର ଆଦି ଉଜୁଡ଼ିଛି। ଜଳସ୍ତର କମିଛି, ହେଲେ ଲୋକଙ୍କ ଦୁର୍ଦ୍ଦଶା କମିନାହିଁ। ସେହିପରି ପୁଣି ଲଘୁଚାପ ଜନିତ ବର୍ଷା ସମ୍ଭାବନା ଥିବାରୁ ବନ୍ୟା ଆଶଙ୍କାର ପୁନରାବୃତ୍ତି ଟଳିନାହିଁ। ଏବେ ମଧ୍ୟ ଉପରୋକ୍ତ ଗ୍ରାମବାସୀ ବନ୍ୟା ଆଶଙ୍କାରେ ରହିଛନ୍ତି। ବନ୍ୟାରେ ଉକ୍ତ ଅଞ୍ଚଳର ୩୭୯ ବିପନ୍ନଙ୍କୁ ଗଣ୍ଠିଆପାଲି ଆଶ୍ରୟସ୍ଥଳୀକୁ ଅଣାଯାଇ ରନ୍ଧାଖାଦ୍ୟ ଯୋଗାଇ ଦିଆଯାଇଥିଲା। ତେବେ ବନ୍ୟାଜଳ କମିବାରୁ ୭ଦିନ ପରେ ବିପନ୍ନମାନେ ନିଜ ଘରକୁ ଫେରିଛନ୍ତି। ସେମାନେ ଭଙ୍ଗାଘର, ଗୁହାଳ ସଜାଡ଼ିବାରେ ଲାଗିଛନ୍ତି। ସେହିପରି ଘରେ ସଂରକ୍ଷିତ ଧାନ, ଗହମ, ଚାଉଳ ଓଦା ହୋଇଯାଇଥିବାରୁ ଲୋକେ ଚିନ୍ତିତ ହୋଇ ପଡ଼ିଛନ୍ତି। ପ୍ରଶାସନ ପକ୍ଷରୁ ଯାହା କିଛି ସହାୟତା ମିଳିଛି, ତାହା ସମୁଦ୍ରକୁ ଶଙ୍ଖେ ବୋଲି ବନ୍ୟା ପ୍ରପୀଡ଼ିତ ଲୋକେ କହିଛନ୍ତି। ବିଭିନ୍ନ ସ୍ବେଚ୍ଛାସେବୀ ଅନୁଷ୍ଠାନ ଗ୍ରାମକୁ ରିଲିଫ୍ ସାମଗ୍ରୀ ପଠାଇଛନ୍ତି। ମାତ୍ର ବନ୍ୟା ଯେଭଳି ଭାବେ ଗ୍ରାମବାସୀଙ୍କ ଜୀବିକାକୁ ଉଜାଡ଼ି ଦେଇଛି, ତୁରନ୍ତ ସେମାନଙ୍କୁ ପର୍ଯ୍ୟାପ୍ତ ସହାୟତା ଯୋଗାଇ ଦେବାକୁ ଦାବି ହେଉଛି।
