ବଡଗାଁ ,୧୧।୧(ଡି.ଏନ.ଏ.): ୩୦ ବର୍ଷ ପୂର୍ବେ ସ୍ବାମୀଙ୍କ ମୃତ୍ୟୁ ହୋଇଥିଲା। ଫଳରେ ଏକମାତ୍ର ପୁଅର ଲାଳନପାଳନ ଦାୟିତ୍ୱ ଏକାକୀ ସମ୍ଭାଳିବାକୁ ପଡ଼ିଲା। ଯେଉଁ ମାଟି ଘର ଖଣ୍ଡିଏ ଥିଲା, ଉପଯୁକ୍ତ ମରାମତି ଅଭାବରୁ ତାହା ଏବେ ଜରାଜୀର୍ଣ୍ଣ ହୋଇପଡିଛି ା ସେହି ଭଙ୍ଗା, ଦଦରା ଘର ଯେ କୌଣସି ମୁହୂର୍ତ୍ତରେ ଧସି ପଡ଼ିବା ଆଶଙ୍କା ଥିଲେ ବି ଆର୍ଥିକ ସ୍ଥିତି ଦୁର୍ବଳ ଥିବାରୁ ରକ୍ଷଣାବେକ୍ଷଣ କରିବା ସମ୍ଭବ ହୋଇପାରିନି। ଆବାସ ଯୋଜନାରେ ଘର ଖଣ୍ଡିଏ ଯୋଗାଇ ଦେବା ପାଇଁ ଦୀର୍ଘ ବର୍ଷ ହେଲା ଚାହିଁ ବସିଛି ା ହେଲେ ଘର ମିଳିବା ସାତସପନ ପାଲଟିଛି ବୋଲି ସୁନ୍ଦରଗଡ ଜିଲା ବଡ଼ଗାଁ ବ୍ଲକ ଫୁଲବାରି ପଞ୍ଚାୟତ କୁରେଇବଗା ଗ୍ରାମର ସ୍ବର୍ଗତ ଗୋପାଳ ପୃଷେଟଙ୍କ ସ୍ତ୍ରୀ ହରିପ୍ରିୟା ପୃଷେଟ କ୍ଷୋଭର ସହ କହିଛନ୍ତି ା
ଏନେଇ ହରିପ୍ରିୟା କୁହନ୍ତି , ୧୫ ବର୍ଷ ହେଲା ସରପଞ୍ଚ, ସମିତି ସଭ୍ୟ,ୱାର୍ଡ ମେମ୍ବରଙ୍କୁ ଜଣାଇ ଆସୁଛି। ଆବାସ ଯୋଜନାରେ ଘର ପାଇବା ପାଇଁ ବିଡ଼ିଓଙ୍କୁ ତିନି ଥର ଲେଖି ଜଣାଇଲି ା ତଥାପି ମୋ ଗୁହାରି କେହି ଶୁଣିଲେ ନାହିଁ। ଯାହା ଜମି ଅଛି, ସେଥିରୁ ବର୍ଷକର ଖାଇବା ଖର୍ଚ୍ଚ ହେଉନାହିଁ। ପୁଅ ରାଉରକେଲାର ଏକ କମ୍ପାନୀରେ ଶ୍ରମିକ ଭାବେ କାମ କରୁଛି ା ସେଥିରେ ପରବାର ଚଳାଇବା ବହୁ କଷ୍ଟକର ହେଉଛି। ଘର ତିଆରି ପାଇଁ ସମ୍ବଳ ନାହିଁ। ଫଳରେ ଭାଗ୍ୟକୁ ଆଦରି ପଡିଛନ୍ତି ା ତାଙ୍କୁ ଯଥାଶୀଘ୍ର ଆବାସ ଯୋଜନାରେ ଘର ଯୋଗାଇ ଦେବା ପାଇଁ ଦାବି ହେଉଛି । ସୂଚନାଯୋଗ୍ୟ, ବଡ଼ଗାଁ ବ୍ଲକରେ ଏପରି ଅନେକ ଗରିବ ପରିବାର ଆବାସ ଯୋଜନାରେ ଘର ନ ପାଇ ଦୁର୍ଦ୍ଦଶାରେ ଦିନ କାଟୁଥିବା ବେଳେ ଥିଲାବାଲାଙ୍କୁ ଘର ମିଳିଥିବାର ଦୃଷ୍ଟାନ୍ତ ରହିଛି। ଜନ ପ୍ରତିନିଧି ଓ ସରକାରୀ ଅଧିକାରୀ ଏଭଳି ଗରିବ ପରିବାରଙ୍କୁ ଚିହ୍ନଟ କର ବିହିତ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି ା
