ନୂଆଦିଲ୍ଲୀ,୧।୯: ଭାରତୀୟ ଜୀବନ ବୀମା ନିଗମ (ଏଲ୍ଆଇସି) ୬୫ ବର୍ଷରେ ପଦାର୍ପଣ କରିଛି। ଦେଶ ମଧ୍ୟରେ ଜୀବନ ବୀମା ସେବା ଯୋଗାଣ କ୍ଷେତ୍ରରେ ଏହା ଏକ ପ୍ରମୁଖ ସ୍ଥାନ ହାସଲ କରିଛି। ଏଲ୍ଆଇସି ବର୍ତ୍ତମାନ ୧୪ଟି ଦେଶର ନିଜର ଉପସ୍ଥିତି ଜାହିର କରିଛି। ଏଲ୍ଆଇସି ଏହାର ସହାୟକ ଏବଂ ସହଯୋଗୀ କମ୍ପାନୀଙ୍କ ନେଇ ସେବା ଯୋଗାଣ ଧାରା ଜାରି ରଖିଛି। ଏହା ମଧ୍ୟରେ ଏଲ୍ଆଇସି ଏଚ୍ଏଫ୍ଏଲ୍ ଲିମିଟେଡ୍, ଏଲ୍ଆଇସି ପେନ୍ସନ ଫଣ୍ଡ ଲିମିଟେଡ୍, ଏଲ୍ଆଇସି ମ୍ୟୁଚୁଆଲ ଫଣ୍ଡ, ଏଲ୍ଆଇସି କାର୍ଡସ ଏବଂ ଏଲ୍ଆଇସିଏଚ୍ଏଫ୍ଏଲ୍ ଆସେଟ ମ୍ୟାନେଜମେଣ୍ଟ କମ୍ପାନୀ ଲିମିଟେଡ୍ ରହିଛି। ୧୯୫୬ରେ ୫ କୋଟି ଟଙ୍କାର ମୂଳ ପୁଞ୍ଜି ସହ ଆରମ୍ଭ ହୋଇଥିବା ଏଲ୍ଆଇସିର ସମ୍ପତ୍ତି ବର୍ତ୍ତମାନ ୩୧.୯୬ ଲକ୍ଷ କୋଟି ଟଙ୍କାରେ ପହଞ୍ଚିଛି। ଏହା ମଧ୍ୟରେ ଲାଇଫ ଫଣ୍ଡ ପରିମାଣ ୩୧.୧୪ ଲକ୍ଷ କୋଟି। ପଲିସିଧାରୀଙ୍କ ସ୍ବାର୍ଥ ରକ୍ଷା ସହ ଦେଶ ଗଠନରେ କମ୍ପାନୀ ସର୍ବଦା ଯୋଗଦାନ ଦେଇ ଆସିଛି। କମ୍ପାନୀ ୮ ଜୋନାଲ କାର୍ଯ୍ୟାଳୟ, ୧୧୩ ଡିଭିଜନ କାର୍ଯ୍ୟାଳୟ, ୭୪ କଷ୍ଟମର ଜୋନ, ୨୦୪୮ ଶାଖା କାର୍ଯ୍ୟାଳୟ, ୧୫୨୬ ସାଟେଲାଇଟ ଅଫିସ, ୩୩୫୪ ଲାଇଫ ପ୍ଲସ୍ ଅଫିସ, ୩୧୫୫୬ ପ୍ରିମିୟମ ପଏଣ୍ଟ ସହ ସେବା ଯୋଗାଉଛି। ସେହିଭଳି ୧ ଲକ୍ଷ କର୍ମଚାରୀ, ୧୨.୦୮ ଲକ୍ଷ ଏଜେଣ୍ଟ, ୨୮.୯୨ କୋଟିରୁ ଊର୍ଦ୍ଧ୍ୱ ପଲିସି ଏହା ନିକଟରେ ରହିଛି। ବିଭିନ୍ନ ବର୍ଗରେ ପ୍ରାୟ ୨୮ ପ୍ଲାନ୍ ଗ୍ରାହକଙ୍କ ଲାଗି ରହିଛି। ୨୦୧୯-୨୦ରେ କମ୍ପାନୀର ଅଭିବୃଦ୍ଧି ନୂଆ ବିଜ୍ନେସରେ ୨୫.୧୭% ରହିଛି। ୧.୭୮ ଲକ୍ଷ କୋଟି ଟଙ୍କାର ପ୍ରଥମ ବର୍ଷ ପ୍ରିମିୟମ ସଂଗ୍ରହ ସହ ୬୮.୭୪% ବଜାର ଅଂଶ କମ୍ପାନୀ ନିକଟରେ ରହିଥିବା ସୂଚନା ମିଳିଛି।
