ନୂଆଦିଲ୍ଳୀ,୮।୪: ଦେଶରେ କରୋନା ମହାମାରୀ ସଂକ୍ରମଣର ଦ୍ୱିତୀୟ ଲହର ଅଣାୟତ୍ତ ହେବାରେ ଲାଗିଛି। କରୋନାରୁ ଦୂରେଇ ରହିବା ପାଇଁ ଜାରି ରହିଥିବା ସାର୍ବଜନୀକ ଟିକାକରଣ ଅଭିଯାନରେ ଏବେ ସଙ୍କଟ ସୃଷ୍ଟି ହୋଇଛି। ମହାରାଷ୍ଟ୍ର, ଆନ୍ଧ୍ରପ୍ରଦେଶ ଆଦି ରାଜ୍ୟରେ ଟିକାକରଣ ଲାଗି ଡୋଜ୍ର ଅଭାବ ଦେଖାଦେଇଛି। ଏନେଇ ସେମାନେ କେନ୍ଦ୍ର ସରକାରଙ୍କ ପାଖବୁ ଚିଠି ଲେଖିଛନ୍ତି। ତେବେ କେନ୍ଦ୍ର ସରକାର ଏହାର ପାଲଟା ଜବାବରେ ଟିକାକରଣ ଅଭିଯାନ ଧୀମାଗତିରେ ଚାଲିଥିବା କହିଛନ୍ତି। ଫଳରେ ଡୋଜ୍ ଅଭାବକୁ ନେଇ ରାଜ୍ୟ ଏବଂ କେନ୍ଦ୍ର ମଧ୍ୟରେ ଲେଟର ଓ୍ବାର ଆରମ୍ଭ ହୋଇଛି। କେନ୍ଦ୍ର ସରକାର ଦିଲ୍ଲୀ, ପଞ୍ଜାବ, ମହାରାଷ୍ଟ୍ରର ଟିକାକରଣ ଜାତୀୟ ଅଭିଯାନ ହାରଠାରୁ କମ୍ ଥିବା ନିଜ ଚିଠିରେ ଉଲ୍ଲେଖ କରିଛନ୍ତି। ମହାରାଷ୍ଟ୍ରକୁ ୧,୦୬,୧୯,୧୯୦ ଡୋଜ୍ ଦିଆଯାଇଥିବାବେଳେ ଏଥିରୁ ୯୦,୫୩,୫୨୩ ବ୍ୟବହୃତ ହୋଇଛି। ଏଥିରେ ନଷ୍ଟ ହୋଇଥିବା ଡୋଜ୍କୁ ମଧ୍ୟ ଅନ୍ତର୍ଭୁକ୍ତ କରାଯାଇଛି। ସେହିପରି ଦିଲ୍ଲୀକୁ କରୋନା ଟିକାର ୨୩,୭୦, ୭୧୦ ଡୋଜ୍ ଯୋଗାଇ ଦିଆଯାଇଥିଲା। ଇତିମଧ୍ୟରେ ୧୮,୭୦, ୬୬୨ ଡୋଜ୍ ବ୍ୟବହାର କରାଯାଇଛି। ଅପରପକ୍ଷରେ ପଞ୍ଜାବକୁ ଟିକାର ୨୨,୩୬,୭୭୦ ଡୋଜ୍ ଦିଆଯାଇଥିବାବେଳେ ସେଥିମଧ୍ୟରୁ ୧୪,୯୪,୬୬୩ ଡୋଜ୍ ବ୍ୟବହୃତ ହୋଇଥିବା କେନ୍ଦ୍ର ସରକାର ଚିଠିରେ ଦର୍ଶାଇଛନ୍ତି। ରାଜ୍ୟ ସରକାର କରୋନା ଟିକାକରଣ ଅଭିଯାନର ଗତିକୁ ବୃଦ୍ଧି କରିବା ଆବଶ୍ୟକ ବୋଲି କେନ୍ଦ୍ର ସରକାର କହିଛନ୍ତି।
