ବ୍ରହ୍ମପୁର ଅଫିସ,୩୧ା୧୨: ବ୍ରହ୍ମପୁର ଉପଖଣ୍ଡକୁ ଏକ ସ୍ବତନ୍ତ୍ର ଜିଲା ରୂପେ ଘୋଷଣା କରିବା ଦାବି ନେଇ ଶୁକ୍ରବାର ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ମୁଖ୍ୟ ଶାସନ ସଚିବ, ଗୃହ ସଚିବ ଓ ରାଜସ୍ବ ସଚିବଙ୍କ ଉଦ୍ଦେଶ୍ୟରେ ଦକ୍ଷିଣାଞ୍ଚଳ ରାଜସ୍ବ କମିଶନର (ଆର୍ଡିସି)ଙ୍କୁ ସ୍ମାରକପତ୍ର ପ୍ରଦାନ କରାଯାଇଛି। କମିଟି ପକ୍ଷରୁ କୋର୍ଟପେଟା ଛକଠାରୁ ଏକ ଶୋଭାଯାତ୍ରା ବାହାରି ଆର୍ଡିସି କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲା। କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। କମିଟି ପକ୍ଷରୁ କୁହାଯାଇଛି ଯେ, ୨୦୧୦ ଓ ଗତ ଅକ୍ଟୋବର ୨୪ ତାରିଖରେ ଉପରୋକ୍ତ ଦାବି ନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଥିଲା। ଐତିହାସିକ ସହର ବ୍ରହ୍ମପୁର ୧୯୩୯ରୁ ଅବହେଳିତ ହୋଇ ଆସୁଛି। ବ୍ରହ୍ମପୁର ନୂତନ ଜିଲା ଗଠନ ହେଲେ ବହୁତ ଅନୁଦାନ ଆସିବା ସହ ରେଳ, ସଡକ ଓ ଜଳ ପଥ ଭଳି ଭିତ୍ତିଭୂମି ନିର୍ମାଣ ହେବ। ଶିକ୍ଷା, ସ୍ବାସ୍ଥ୍ୟ, ପାନୀୟ ଜଳ ଓ ପର୍ଯ୍ୟଟନର ବିକାଶ ଓ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ। ବ୍ରହ୍ମପୁର ଉପଖଣ୍ଡର ଲୋକସଂଖ୍ୟା ଓ ଭୌଗଳିକ ପରିସୀମା ବିଚାରକୁ ନେଲେ ଏହି ଉପଖଣ୍ଡ ଜିଲା ରୂପେ ମାନ୍ୟତା ପାଇବାକୁ ପ୍ରଥମ ଯୋଗ୍ୟତା ଅର୍ଜନ କରୁଛି। ଜିଲା ଘୋଷଣା ହେବା ଦ୍ୱାରା ପ୍ରଶାସନର ସୁଫଳତା, ଯୋଜନା ଓ ନ୍ୟାୟ ଜନସାଧରଣଙ୍କ ନିକଟରେ ପହଞ୍ଚିପାରିବ। ଏଣୁ ରାଜ୍ୟ ସରକାର ତୁରନ୍ତ ଏ ଦିଗରେ ପଦକ୍ଷେପ ଗ୍ରହଣ କରନ୍ତୁ ବୋଲି କମିଟି ପକ୍ଷରୁ ଦାବି କରାଯାଇଛି। ନଚେତ ଆଗାମୀ ଦିନରେ ଉଚ୍ଚ ନ୍ୟାୟଳୟର ଆଶ୍ରୟ ନେବା ସହ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି କମିଟି ଚେତାବନୀ ଦେଇଛି। ସ୍ମାରକପତ୍ର ପ୍ରଦାନ ସମୟରେ କମିଟିର ସଭାପତି ସଞ୍ଜୀବ କୁମାର ପଟ୍ଟନାୟକ, ସଂପାଦକ ଡ.ଶିବ ପ୍ରସାଦ ମିଶ୍ର, ସଙ୍ଗଠନ ସମ୍ପାଦକ ଶ୍ରୀମନ୍ତ ପାଣିଗ୍ରାହୀଙ୍କ ସମେତ ଲାବଣ୍ୟ ପାତ୍ର, ସନ୍ତୋଷ ସାହୁ ଓ ସରିତା ପଣ୍ଡା ପ୍ରମୁଖ ଉପସ୍ଥିତ ଥିଲେ।
