ନୂଆଦିଲ୍ଲୀ, ୩।୧(ଆଇଏଏନ୍ଏସ୍): ଭାରତରେ ଧୂମପାନର ସର୍ବନିମ୍ନ ଆଇନଗତ ବୟସ ୨୧ ବର୍ଷ ହେବ। ପୂର୍ବରୁ ୧୮ ବର୍ଷରୁ କମ୍ ବୟସ୍କଙ୍କୁ ସିଗାରେଟ ଓ ଅନ୍ୟାନ୍ୟ ତମାଖୁ ସାମଗ୍ରୀ ବିକ୍ରି ଅନୁମତି ନ ଥିଲା। ଏବେ ସେହି ସମୟସୀମା ୨୧ ବର୍ଷକୁ ବୃଦ୍ଧି କରାଯିବ। ଏଥିପାଇଁ କେନ୍ଦ୍ର ସରକାର ଏକ ଚିଠା ଆଇନ ପ୍ରସ୍ତୁତ କରିଛନ୍ତି। ସିଗାରେଟ ଓ ଅନ୍ୟାନ୍ୟ ତମାଖୁ ସାମଗ୍ରୀ (ବିଜ୍ଞାପନ ନିଷିଦ୍ଧ, ବାଣିଜ୍ୟ ଉତ୍ପାଦନ, ଯୋଗାଣ, ବଣ୍ଟନର ନିୟନ୍ତ୍ରଣ) ସଂଶୋଧନ ଆଇନ, ୨୦୨୦ର ଚିଠା ବିଲ୍ରେ ବୟସସୀମା ୨୧ ବର୍ଷକୁ ବୃଦ୍ଧି କରିବା ଉପରେ ସ୍ବାସ୍ଥ୍ୟ ମନ୍ତ୍ରଣାଳୟ ଜୋର୍ ଦେଇଛି। ୨୦୦୩ର ଏହି ଆଇନରେ ସଂଶୋଧନ ଲାଗି ବିଲ୍ରେ ପ୍ରସ୍ତାବ ରହିଛି। ସଂଶୋଧିତ ପ୍ରସ୍ତାବ ଅନୁଯାୟୀ ୨୧ ବର୍ଷରୁ କମ୍ ବ୍ୟକ୍ତିଙ୍କୁ ସିଗାରେଟ ଓ ଅନ୍ୟ ତମାଖୁ ସାମଗ୍ରୀ ବିକ୍ରି କରାଯାଇପାରିବ ନାହିଁ। ସେହିପରି ସେହି ବୟସ ପର୍ଯ୍ୟନ୍ତ କୌଣସି ବ୍ୟକ୍ତି ଉକ୍ତ ସାମଗ୍ରୀ ବିକିପାରିବେ ନାହିଁ। ଶିକ୍ଷାନୁଷ୍ଠାନଠାରୁ ୧୦୦ ମିଟର ବ୍ୟାସାର୍ଦ୍ଧ ମଧ୍ୟରେ ସିଗାରେଟ ଓ ତମାଖୁ ସାମଗ୍ରୀ ବିକ୍ରି ନିଷିଦ୍ଧ ହେବ। ଆଇନର ଧାରା ୭ରେ ସଂଶୋଧନ କରାଯାଇଛି। ତଦନୁଯାୟୀ ଉପରୋକ୍ତ ସାମଗ୍ରୀ ବନ୍ଦ କଭରରେ ଓ ମୂଳ ପ୍ୟାକେଜ୍ରେ ବ୍ୟବସାୟ କରାଯିବ। କୌଣସି ବ୍ୟକ୍ତି ସିଧାସଳଖ କିମ୍ବା ପରୋକ୍ଷରେ ଉକ୍ତ ସାମଗ୍ରୀର ଉତ୍ପାଦନ, ଯୋଗାଣ କିମ୍ବା ବଣ୍ଟନ କରିପାରିବେ ନାହିଁ, ଯଦି ଉକ୍ତ ପ୍ୟାକେଜ୍ଗୁଡ଼ିକର ସର୍ବନିମ୍ନ ଗୁଣବତ୍ତା ନ ଥିବ। ଏହାର ଉଲ୍ଲଂଘନ କଲେ ୨ ବର୍ଷ ଜେଲ୍ କିମ୍ବା ୧ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ବ୍ୟବସ୍ଥା ରହିଛି। ଦ୍ୱିତୀୟ ଥର ଆଇନ ଉଲ୍ଲଂଘନ ପାଇଁ ୫ ବର୍ଷ ଜେଲ୍ ସହ ୫ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ଦେବାକୁ ପଡ଼ିବ। ସେହିପରି ବେଆଇନ ତମାଖୁ ସାମଗ୍ରୀ ବିକ୍ରି ଲାଗି ୧ ବର୍ଷ ଜେଲ୍ ଓ ୫୦,୦୦୦ ଟଙ୍କା ଜରିମାନା ବ୍ୟବସ୍ଥା ଥିବାବେଳେ ଦ୍ୱିତୀୟ ଥର ଧରାପଡ଼ିଲେ ୨ ବର୍ଷ ଜେଲ୍ ଓ ୧ ଲକ୍ଷ ଜରିମାନା ଦେବାକୁ ହେବ। ବେଆଇନ ସିଗାରେଟ ଉତ୍ପାଦନ ପାଇଁ ୨ ବର୍ଷ ଜେଲ୍ ଓ ଲକ୍ଷେ ଟଙ୍କା ଜରିମାନା ପ୍ରସ୍ତାବ ରହିଛି। ନିଷିଦ୍ଧାଞ୍ଚଳରେ ଧୂମପାନ ପାଇଁ ଜରିମାନା ରାଶିକୁ ୨୦୦ରୁ ୨୦୦୦ ଟଙ୍କାବୁ ବୃଦ୍ଧି କରାଯାଇଛି। କୌଣସି ବ୍ୟକ୍ତି ସିଧାସଳଖ କିମ୍ବା ପରୋକ୍ଷରେ ତମାଖୁ ସାମଗ୍ରୀ ପାଇଁ କୌଣସି ମାଧ୍ୟମରେ ବିଜ୍ଞାପନ କରିପାରିବେ ନାହିଁ। ସେହିପରି ସିଗାରେଟ ଓ ଅନ୍ୟ ତମାଖୁ ସାମଗ୍ରୀ ବ୍ୟବହାର ଲାଗି ସିଧାସଳଖ କିମ୍ବା ପରୋକ୍ଷରେ ପ୍ରୋତ୍ସାହିତ କରାଯାଇପାରିବ ନାହିଁ ବୋଲି ବିଲ୍ରେ କୁହାଯାଇଛି।
