ଲୋଇସିଂହା,୨୪।୧୦(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହା ଥାନା ଅଧୀନ ରାମପୁର-ଡୁଡୁକା ରାସ୍ତାରେ ବିଷ ପିଇ ଗୁରୁତର ଅବସ୍ଥାରେ ପଡିଥିବା ଜଣେ ଅଧ୍ୟାପକଙ୍କୁ ସ୍ଥାନୀୟ କିଛି ଯୁବକ ଉଦ୍ଧାର କରି ସୋମବାର ଲୋଇସିଂହା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି। ଅବସ୍ଥା ଗୁରୁତର ହେବାରୁ ତାଙ୍କୁ ଚିକିତ୍ସା ପାଇଁ ବଲାଙ୍ଗୀର ଭୀମ ଭୋଇ ମେଡିକାଲ ଆଣ୍ଡ କଲେଜକୁ ପଠାଯାଇଛି। ଗୁରୁତର ଅଧ୍ୟାପକ ଜଣକ ହେଲେ ବଲାଙ୍ଗୀର ଚନ୍ଦନଭାଟି କଲେଜର ଇତିହାସ ବିଭାଗ ଅଧ୍ୟାପକ ହୃଦୟାନନ୍ଦ ଦାସ ।
ପରିବାର ଲୋକଙ୍କ କହିବା ଅନୁଯାୟୀ, ତାଙ୍କ ମାନସିକ ସ୍ଥିତି ଭଲନାହିଁ। ସୋମବାର ସକାଳେ ସେ ଜଳଖିଆ ଖାଇଥିଲେ । ସ୍ତ୍ରୀ ଔଷଧ ଖାଇବାକୁ କହିବାରୁ ସ୍କୁଟି ଧରି ବାହାରି ଯାଇଥିଲେ। ପୂବାହ୍ନରେ ଲୋଇସିଂହା ଥାନା ଅନ୍ତର୍ଗତ ଝାରବନ୍ଧଲି ଗ୍ରାମର ସୁଜିତ କର୍ଣ୍ଣ, ରମାକାନ୍ତ ମାଝିଙ୍କ ସହ କେତେକ ଯୁବକ ଡ୍ୟାମରୁ ଗାଧୋଇ ଆସୁଥିବା ବେଳେ ଅଧ୍ୟାପକଙ୍କୁ ମୁମୂର୍ଷୁ ଅବସ୍ଥା ପଡ଼ିଥିବା ଦେଖିବାକୁ ପାଇଥିଲେ । ପରେ ସେମାନେ ପଚାରିବାରୁ ସେ ବିଷ ପିଇ ଦେଇଥିବା କହିଥିଲେ। ତୁରନ୍ତ ତାଙ୍କୁ ଯୁବକମାନେ ଉଦ୍ଧାର କରି ଲୋଇସିଂହା ଡାକ୍ତରଖାନା ଆଣିଥିଲେ । ଖବର ପାଇ ପରିବାର ଲୋକେ ଡାକ୍ତର ଖାନାରେ ପହଞ୍ଚିଛନ୍ତି । ଲୋଇସିଂହା ପୋଲିସ ଘଟଣାସ୍ଥଳରୁ ସ୍କୁଟିକୁ ଜବତ କରିଛି ।
