ମୁମ୍ବାଇ: ମେଲୋଡି କୁଇନ୍ ତଥା ଭାରତ ରତ୍ନ ଲତା ମଙ୍ଗେସକରଙ୍କର ରବିବାର ୯୨ ବର୍ଷ ବୟସରେ ପରଲୋକ ହୋଇଛି । ଏବେ ସେ ରହିବେ ପ୍ରତିଟି ଭାରତୀୟର ସ୍ମୃତିରେ । ପିଲାଟି ଦିନରୁ ଅନେକ ସଂଘର୍ଷ ମଧ୍ୟ ଦେଇ ଗତି କରିଥିବା ଲତା କିନ୍ତୁ ଚଢିଥିଲେ ସଫଳତାର ଶୀର୍ଷ ପାହାଚ । କେବଳ ଦେଶ ନୁହେଁ ବିଦେଶରେ ବି ଲତାଙ୍କର ଥିଲା ଖୁବ୍ ନାଁ । ସାରା ଜୀବନ ଅବିବାହତ ଥିବା ଲତା ନିଜର ସୁମଧୁର ସ୍ୱରରେ ସମସ୍ତଙ୍କୁ ବାନ୍ଧି ରଖି ପାରୁଥିଲେ । ଲତାଙ୍କ ସମ୍ପତିର କଥା ଯଦି କୁହାଯାଏ ମୁମ୍ବାଇର ପରେଡ ରୋଡରେ ରହିଛି ତାଙ୍କର ଏକ ଆଲିସାନ ବଙ୍ଗଳା । ଯାହାର ମୂଲ୍ୟ କୋଟି କୋଟି ଟଙ୍କା । ଏହାର ନାଁ ରହିଛି ପ୍ରଭୁ କୁଞ୍ଜ ଭବନ । ନିଜର କୋକିଳ କଣ୍ଠରେ ସେ ସମସ୍ତଙ୍କୁ ମନୋରଞ୍ଜନ ଦେଉଥିବା ବେଳେ ଏଥିରୁ ସେ ରୋଜଗାର କରିଛନ୍ତି କୋଟି କୋଟି ଟଙ୍କା । ମିଳିଥିବା ସୂଚନା ଅନୁଯାୟୀ, ଲତାଙ୍କ ନେଟ ୱର୍ଥ ୫୦ ମିଲିୟନ ଡଲାର ବା ପାଖାପାଖି ୩୬୮ କୋଟି ବୋଲି କୁହାଯାଉଛି ।
