ନୂଆଦିଲ୍ଲୀ,୬।୨ : ଦିଲ୍ଲୀ ପୋଲିସକୁ ଏକ ବଡ଼ ସଫଳତା ମିଳିଛି। ଜମ୍ମୁ-କଶ୍ମୀରରେ ସକ୍ରିୟ ଥିବା ଲଶ୍କର ଆତଙ୍କବାଦୀଙ୍କୁ ପୋଲିସ ଗିରଫ କରିଛି। ସୀମା ଆରପାରିକୁ ଆସୁଥିବା ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ପାଇଁ ସେ ଏକ ପ୍ରମୁଖ ଭୂମିକା ଗ୍ରହଣ କରିଥିବା କୁହାଯାଉଛି। ତାଙ୍କ ନିକଟରୁ ମୋବାଇଲ ଫୋନ ଏବଂ ସିମ କାର୍ଡ ଜବତ କରାଯାଇଛି।
ଜମ୍ମୁ-କଶ୍ମୀରର କୁପୱାରା ଠାରେ କାର୍ଯ୍ୟ କରୁଥିବା ଲଶ୍କର-ଇ-ତୋଏବା ମଡ୍ୟୁଲର ଆତଙ୍କବାଦୀଙ୍କ ନାମ ରିୟାଜ ଅହମ୍ମଦ ବୋଲି ଜଣାପଡିଛି। ନୂଆଦିଲ୍ଲୀ ରେଳ ଷ୍ଟେଶନରୁ ପୋଲିସ ତାଙ୍କୁ ଧରିଛି। କୁହାଯାଉଛି ରିୟାଜଙ୍କ ନିକଟକୁ ଏଲଓସି ପାରରୁ ଆସୁଥିବା ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ତାଙ୍କ ପାଖରେ ପହଞ୍ଚୁଥିଲା।
ଅଭିଯୁକ୍ତ ରିୟାଜଙ୍କ ବିରୋଧରେ ଅନେକ ବିଭାଗ ଅଧୀନରେ ଏକ ମାମଲା ରୁଜୁ ହୋଇଛି। ଅଧିକ କାର୍ଯ୍ୟାନୁଷ୍ଠାନ ପାଇଁ ଆତଙ୍କବାଦୀଙ୍କ ବିଷୟରେ ଦିଲ୍ଲୀ ପୋଲିସ ଜମ୍ମୁ-କଶ୍ମୀର ପୋଲିସକୁ ସୂଚନା ଦେଇଛି।
ଆତଙ୍କବାଦୀ ରିୟାଜ ଅହମ୍ମଦ କ’ଣ କରିବାକୁ ଦିଲ୍ଲୀ ଆସିଥିଲେ? ଏ ବିଷୟରେ ଏପର୍ଯ୍ୟନ୍ତ କିଛି ଜଣା ପଡ଼ି ନାହିଁ । ତାଙ୍କର ଉଦ୍ଦେଶ୍ୟ ଜାଣିବା ପାଇଁ ଦିଲ୍ଲୀ ପୋଲିସ ତାଙ୍କୁ ପଚରାଉଚରା କରୁଛି। ଜମ୍ମୁ-କଶ୍ମୀରର କୁପୱାରା ନିବାସୀ ରିୟାଜଙ୍କ କାର୍ଯ୍ୟକଳାପ ସନ୍ଦେହଜନକ ରହିଥିବା ପୋଲିସ କହିଛି।
