ବଡ଼ଚଣା,୨୪।୧(ଦିଲୀପ କୁମାର ମହାନ୍ତି): ବଡ଼ଚଣା ବ୍ଲକ୍ର ଏକମାତ୍ର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଦୀର୍ଘଦିନ ହେଲା ଅବ୍ୟବସ୍ଥାରେ ଚାଲିଛି। ଏଠାରେ ୪ ବିଶେଷଜ୍ଞ ଡାକ୍ତରଙ୍କୁ ମିଶାଇ ମୋଟ୍ ୧୪ ଡାକ୍ତର ରହିବା କଥା। ହେଲେ ଏବେ ୪ ଜଣ ଡାକ୍ତର ରହିଛନ୍ତି। ସେମାନେ ବଦଳି ହୋଇ କାର୍ଯ୍ୟ କରୁଛନ୍ତି। ସ୍ଥାୟୀ ଡାକ୍ତର କେହି ରହୁନାହାନ୍ତି। ନିର୍ଦ୍ଦିଷ୍ଟ ବିଭାଗର ମଧ୍ୟ କେହି ଡାକ୍ତର ନାହାନ୍ତି। ଅଧିକାଂଶ ସମୟ ଏଠାରେ ଡାକ୍ତର ପାଳିକରି ଆସୁଥିବା ଅଭିଯୋଗ ହେଉଛି।
ସ୍ବାସ୍ଥ୍ୟକେନ୍ଦ୍ର ୱାର୍ଡର ଶୌଚାଳୟ ଅପରିଷ୍କାର ହୋଇପଡ଼ିଛି। ପ୍ରସୂତି ବିଭାଗ ସମେତ ଅନ୍ୟ ୱର୍ଡର କାନ୍ଥରୁ ପାଣି ଝରି ଶିଉଳି ଜମିଛି। କାନ୍ଥରେ ବିଦ୍ୟୁତ୍ ସଂଯୋଗ ତାର ଛିଡ଼ି ଓହଳି ରହିଛି। କେତେକ ପଙ୍ଖା ଅଚଳ ହୋଇଝୁଲୁଛି। ଅନେକ ସମୟରେ ଆଉଟଡୋରରେ ଜଣେ ଡାକ୍ତର ରହିବା ଦ୍ୱାରା ୧୦୦ରୁ ୨୦୦ ରୋଗୀ ଦୀର୍ଘ ସମୟ ଲାଇନରେ ରହୁଛନ୍ତି।
ନିରାମୟ ଯୋଜନାରେ ଔଷଧ ଯୋଗାଇବାର ବ୍ୟବସ୍ଥା କରିଥିଲେ ମଧ୍ୟ ନାମକୁ ମାତ୍ର ଔଷଧ ମିଳୁଛି। ଫଳରେ ଅନେକ ଇଞ୍ଜେକ୍ସନ, ଔଷଧ ଗରିବ, ଅସହାୟ ରୋଗୀ ବାହାରୁ କିଣିବାକୁ ବାଧ୍ୟ ହେଉଛନ୍ତି। ଏଠାରେ ରୋଗୀଙ୍କ ସଂଖ୍ୟା ଅଧିକ ରହୁଥିବାରୁ ୪ ଜଣ ନର୍ସ ସେବା ଯୋଗାଇ ପାରୁନାହାନ୍ତି। ଏହି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ୧୬ ନମ୍ବର ଜାତୀୟ ରାଜପଥ କଡରେ ରହିଥିବାରୁ ଏଠାକୁ ଦୈନିକ ଦୁର୍ଘଟଣା ଜନିତ ରୋଗୀ ବହୁ ମାତ୍ରାରେ ଆସିଥାନ୍ତି। ପଡ଼ୋଶୀ ଜିଲା ଢେଙ୍କାନାଳ ଓ କଟକର ମାହାଙ୍ଗା, ଗୋନ୍ଦିଆ ଅଞ୍ଚଳର ରୋଗୀ ମଧ୍ୟ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରିଥାନ୍ତି। ମାତ୍ର ଡାକ୍ତର ଅନେକ ସମୟରେ ରହୁ ନ ଥିବାରୁ ରୋଗୀଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଉଥିବା ଅଭିଯୋଗ ହେଉଛି। ବହୁ ସମୟରେ ରୋଗୀସେବା ବାଧାପ୍ରାପ୍ତ ହେବା ନିତିଦିନିଆ ଘଟଣାରେ ପରିଣତ ହେଲାଣି। ବହିର୍ବିଭାଗ ୱାର୍ଡ ଆବଶ୍ୟକ ସ୍ଥଳେ ସଫା ନ ହେବାରୁ ଅବ୍ୟବସ୍ଥା ସୃଷ୍ଟି ହେଉଛି। ଉକ୍ତ ସ୍ବାସ୍ଥ୍ୟକେନ୍ଦ୍ରରେ ବଡ଼ଚଣା ବ୍ଲକର ୪୩ ପଞ୍ଚାୟତର ପ୍ରାୟ ୩ ଲକ୍ଷ ଏବଂ ପଡ଼ୋଶୀ ଜିଲାର ଲୋକେ ନିର୍ଭର କରୁଛନ୍ତି। ମାତ୍ର ବିଭିନ୍ନ ବିଭାଗ ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀଙ୍କ ଅବହେଳା ପାଇଁ ସାଧାରଣରେ ଅସନ୍ତୋଷ ପ୍ରକାଶ ପାଉଛି। ଅନ୍ୟପକ୍ଷରେ ଏଠାରେ ମେଡିକାଲ ଅଫିସର ଥିବା ଅଶୋକ ମିଶ୍ର ଦେଢ଼ ମାସ ହେଲା ବଦଳି ହୋଇଛନ୍ତି। ସିଡିଏମ୍ଓଙ୍କ ନିର୍ଦ୍ଦେଶକ୍ରମେ ଡାକ୍ତର ରଶ୍ମିରଞ୍ଜନ ପଶାୟତଙ୍କୁ ଦାୟିତ୍ୱ ଦିଆଯାଇଛି। ହେଲେ ତାଙ୍କୁ ଦାୟିତ୍ୱ ହସ୍ତାନ୍ତରରେ ବିଳମ୍ବ ହେଉଛି। ଫଳରେ ବିଭିନ୍ନ କାର୍ଯ୍ୟ ଧାବାପ୍ରାପ୍ତ ହେଉଛି। ତେଣୁ ଏସବୁ ଦିଗରେ ବିଭାଗୀୟ ମନ୍ତ୍ରୀ, ସଚିବ, ସ୍ଥାନୀୟ ବିଧାୟକ ଓ ଯାଜପୁର ସିଡିଏମ୍ଓ ଦୃଷ୍ଟିଦେବାକୁ ଦାବି ହୋଇଛି।
